ആലപ്പുഴ: സംസ്ഥാന നിയമസഭാ തിരഞ്ഞെടുപ്പ് ഫലം പുറത്തുവരാനിരിക്കെ, രാഷ്ട്രീയ പ്രവചനങ്ങളുമായി എസ്.എന്.ഡി.പി യോഗം ജനറല് സെക്രട്ടറി വെള്ളാപ്പള്ളി നടേശന്. കേരളത്തില് എല്.ഡി.എഫ് തന്നെ അധികാരത്തില് വരണമെന്നാണ് തന്റെ ആഗ്രഹമെന്നും നേരിയ ഭൂരിപക്ഷത്തോടെ ഇടതുമുന്നണി ഭരണം നിലനിര്ത്തുമെന്നാണ് പ്രതീക്ഷയെന്നും അദ്ദേഹം പറഞ്ഞു. യു.ഡി.എഫ് അധികാരത്തില് വന്നാല് മുന്നണിക്കുള്ളില് കടുത്ത കലഹമായിരിക്കും ഉണ്ടാകുകയെന്നും ഭരണ സാധ്യത തെളിഞ്ഞപ്പോള് തന്നെ കോണ്ഗ്രസിലെ അവസ്ഥ ഇതാണെന്നും അദ്ദേഹം പരിഹസിച്ചു.
യു.ഡി.എഫ് അധികാരത്തില് എത്തിയാല് ഗ്രൂപ്പ് പോരും അധികാര വടംവലിയും കാരണം ഭരണം സുഗമമാകില്ലെന്ന് വെള്ളാപ്പള്ളി മുന്നറിയിപ്പ് നല്കി. അതേസമയം, പത്തു വര്ഷത്തെ തുടര്ച്ചയായ ഭരണം ഇടതുപക്ഷത്തിന്റെ താഴെത്തട്ടിലുള്ള അണികളില് ഒരുതരം ആലസ്യം ഉണ്ടാക്കിയിട്ടുണ്ടെന്നും ഇത്തവണ ഗ്രൗണ്ട് തലത്തിലുള്ള പ്രവര്ത്തനം അത്ര ശക്തമല്ലെന്നും അദ്ദേഹം നിരീക്ഷിച്ചു. എങ്കിലും വികസന കാര്യങ്ങളില് എല്.ഡി.എഫ് ഒരുപാട് കാര്യങ്ങള് ചെയ്തിട്ടുണ്ടെന്നും ഭരണം ലഭിച്ചാല് പിണറായി വിജയന് തന്നെ മുഖ്യമന്ത്രിയാകുമെന്നും അദ്ദേഹം കൂട്ടിച്ചേര്ത്തു.
ഇത്തവണ നിയമസഭയില് ബി.ജെ.പി അക്കൗണ്ട് തുറക്കുമെന്നാണ് വെള്ളാപ്പള്ളിയുടെ പ്രവചനം. ഇന്ത്യ ഭരിക്കുന്ന പാര്ട്ടിയായ ബി.ജെ.പി കേരള നിയമസഭയില് എത്തുന്നത് ഒരു പ്രശ്നമായി കാണേണ്ടതില്ലെന്നും അവര് ഒരു 'തിരുത്തല് ശക്തി'യായി സഭയിലുണ്ടാകുമെന്നും അദ്ദേഹം പറഞ്ഞു. തിരുവനന്തപുരം ജില്ലയിലാകും ബി.ജെ.പിയുടെ വിജയം ഉറപ്പെന്നും അദ്ദേഹം സൂചിപ്പിച്ചു.
താന് പറയുന്നത് സത്യസന്ധമായ കാര്യങ്ങളാണെന്നും ഇതില് ആര്ക്കും പരിഭവം തോന്നിയിട്ട് കാര്യമില്ലെന്നും വ്യക്തമാക്കിയ വെള്ളാപ്പള്ളി നടേശന്, തന്റെ നിലപാടുകള്ക്ക് പിന്നില് വ്യക്തമായ കാരണങ്ങളുണ്ടെന്നും ആവര്ത്തിച്ചു. തിരഞ്ഞെടുപ്പ് ഫലം വരാന് മണിക്കൂറുകള് മാത്രം ബാക്കിനില്ക്കെ വെള്ളാപ്പള്ളിയുടെ ഈ പ്രസ്താവനകള് രാഷ്ട്രീയ കേരളത്തില് വലിയ ചര്ച്ചകള്ക്ക് വഴിതുറന്നിട്ടുണ്ട്.