ഡൽഹി: ഇന്ത്യയെക്കുറിച്ച് ഇന്റർനെറ്റിൽ പ്രചരിക്കുന്ന മുൻവിധികൾ തെറ്റാണെന്ന് സ്വന്തം അനുഭവങ്ങളിലൂടെ ലോകത്തോട് വിളിച്ചുപറയുകയാണ് ജാക്ക് ഹീറ്റൺ എന്ന വിദേശ സഞ്ചാരി. തന്റെ സന്ദർശനത്തിനിടെ ഉണ്ടായ ഹൃദ്യമായ അനുഭവങ്ങൾ പങ്കുവെച്ചുകൊണ്ട് ജാക്ക് ഇൻസ്റ്റാഗ്രാമിൽ പോസ്റ്റ് ചെയ്ത വീഡിയോ ഇതിനോടകം ദശലക്ഷക്കണക്കിന് ആളുകൾ കണ്ടുകഴിഞ്ഞു.
ഒരിക്കൽ റോഡിൽ വീണ് കാലിന് പരിക്കേറ്റ ജാക്കിനെ ഒട്ടും പരിചയമില്ലാത്ത രണ്ട് ഇന്ത്യക്കാർ സഹായിക്കുകയും തങ്ങളുടെ വീട്ടിലേക്ക് കൊണ്ടുപോയി മുറിവ് വെച്ചുകെട്ടുകയും ചെയ്തു. പകരമായി അവർ ഒന്നും തന്നെ ആവശ്യപ്പെട്ടില്ല എന്നത് ജാക്കിനെ ഏറെ അത്ഭുതപ്പെടുത്തി.
ഒരു റെസ്റ്റോറന്റിൽ വെച്ച് വിഭവങ്ങൾ തിരഞ്ഞെടുക്കാൻ വിഷമിച്ച ജാക്കിനെ സഹായിക്കാൻ അവിടുത്തെ ജീവനക്കാരി അല്ലാതിരുന്നിട്ടും ഒരു സ്ത്രീ സ്വമേധയാ മുന്നോട്ടുവരികയും വിഭവങ്ങളെക്കുറിച്ച് വിശദീകരിച്ചു നൽകുകയും ചെയ്തു.
ഓൺലൈനിൽ പ്രചരിക്കുന്നതുപോലെ ഇന്ത്യ തട്ടിപ്പുകാരുടെ നാടല്ലെന്നും താൻ കണ്ടുമുട്ടിയവരിൽ 99 ശതമാനവും ദയയുള്ളവരാണെന്നും ജാക്ക് വ്യക്തമാക്കുന്നു. ഇന്ത്യയെക്കുറിച്ച് മറ്റുള്ളവർ പറയുന്നത് കേട്ട് വിലയിരുത്താതെ നേരിട്ട് വന്ന് അനുഭവിക്കാനാണ് അദ്ദേഹം തന്റെ ഫോളോവേഴ്സിനോട് ആവശ്യപ്പെടുന്നത്.
ഈ വീഡിയോയ്ക്ക് താഴെ സമ്മിശ്രമായ പ്രതികരണങ്ങളാണ് ലഭിക്കുന്നത്. പരിക്കേറ്റ ഭാഗത്ത് മഞ്ഞൾ പുരട്ടാൻ ചിലർ ഉപദേശിച്ചപ്പോൾ, ഇന്ത്യ എന്നത് വൈരുദ്ധ്യങ്ങളുടെ നാടാണെന്നും നല്ലതിനെ ആസ്വദിക്കാൻ ശ്രമിക്കുകയുമാണ് വേണ്ടതെന്നും മറ്റ് ചിലർ കുറിച്ചു. വിദേശ സഞ്ചാരികളിൽ നിന്ന് ഇത്തരം പോസിറ്റീവ് വാർത്തകൾ വരുന്നത് ഇന്ത്യയുടെ ടൂറിസം മേഖലയ്ക്ക് വലിയ മുതൽക്കൂട്ടാണ്.