വാഷിങ്ടണ്: പശ്ചിമേഷ്യയില് അമേരിക്കയും ഇറാനും തമ്മില് കടുത്ത രാഷ്ട്രീയ സംഘര്ഷം നിലനില്ക്കുമ്പോഴും, വരാനിരിക്കുന്ന ഫിഫ ലോകകപ്പില് ഇറാന് കളിക്കുന്നതിനെ പിന്തുണച്ച് യുഎസ് പ്രസിഡന്റ് ഡൊണാള്ഡ് ട്രംപ്. ഇറാനെ ടൂര്ണമെന്റില് നിന്ന് പുറത്താക്കി പകരം യോഗ്യത നേടാത്ത ഇറ്റലിയെ ഉള്പ്പെടുത്തണമെന്ന ആവശ്യം തള്ളിക്കൊണ്ടാണ് ട്രംപിന്റെ പ്രതികരണം. 'അവര് കളിക്കട്ടെ' എന്ന ട്രംപിന്റെ നിലപാട് ലോകകപ്പിന് ആതിഥേയത്വം വഹിക്കുന്ന അമേരിക്കയുടെ രാഷ്ട്രീയവും കായികവുമായ നിലപാടുകളില് നിര്ണ്ണായകമാണ്.
അമേരിക്കയുടെ പ്രത്യേക പ്രതിനിധി പൗലോ സാംപോളിയാണ് ഇറാനെ ലോകകപ്പില് നിന്ന് ഒഴിവാക്കി പകരം ഇറ്റലിയെ ഉള്പ്പെടുത്തണമെന്ന നിര്ദ്ദേശം മുന്നോട്ടുവെച്ചത്. തുടര്ച്ചയായി മൂന്ന് ലോകകപ്പുകള്ക്ക് യോഗ്യത നേടാനാവാത്ത ഇറ്റലിക്ക് ഇതൊരു സുവര്ണ്ണാവസരമാകുമെന്നായിരുന്നു വാദം. എന്നാല്, ഫിഫ പ്രസിഡന്റ് ജിയാനി ഇന്ഫാന്റിനോയുടെ നിലപാടിനൊപ്പമാണ് താനെന്ന് ട്രംപ് വ്യക്തമാക്കി. ഇന്ഫാന്റിനോ സമ്മതിച്ചാല് തനിക്ക് കുഴപ്പമില്ലെന്നും ട്രംപ് മാധ്യമങ്ങളോട് പറഞ്ഞു.
ഇറാന് ടീം ലോകകപ്പിന് എത്തുമെന്ന് ഫിഫ തലവന് ജിയാനി ഇന്ഫാന്റിനോ ആവര്ത്തിച്ചു. വ്യാഴാഴ്ച നടന്ന ഫിഫ കോണ്ഗ്രസിലും അദ്ദേഹം ഇക്കാര്യം വ്യക്തമാക്കി. ഇന്ഫാന്റിനോ തന്റെ സുഹൃത്താണെന്നും അദ്ദേഹം എന്ത് തീരുമാനിച്ചാലും അത് അംഗീകരിക്കുമെന്നും ട്രംപ് പറഞ്ഞു. ഇറാന് നല്ല ടീമാണോ എന്ന് തമാശരൂപേണ ചോദിച്ച ട്രംപ്, അവര് ജയിച്ചാല് അത് പിന്നീട് നോക്കാമെന്നും കൂട്ടിച്ചേര്ത്തു.
ലോകകപ്പില് നിന്ന് പിന്മാറാന് ഉദ്ദേശിക്കുന്നില്ലെന്ന് ഇറാന് ഫുട്ബോള് ഫെഡറേഷന് കഴിഞ്ഞ ബുധനാഴ്ച പ്രസ്താവനയിലൂടെ അറിയിച്ചു. ഏഷ്യന് സോണില് നിന്ന് യോഗ്യത നേടിയ എട്ട് ടീമുകളില് ഒന്നാണ് ഇറാന്. ബെല്ജിയം, ഈജിപ്ത്, ന്യൂസിലാന്ഡ് എന്നിവരടങ്ങുന്ന ഗ്രൂപ്പിലാണ് ഇറാന്റെ മത്സരം. ജൂണ് 15-ന് ന്യൂസിലാന്ഡിനെതിരെയാണ് അവരുടെ ആദ്യ പോരാട്ടം.
യൂറോപ്പില് നിന്നുള്ള 16 സ്ഥാനങ്ങളില് ഇടംപിടിക്കാന് കഴിയാത്തതാണ് ഇറ്റലിക്ക് തിരിച്ചടിയായത്. ഏതെങ്കിലും രാജ്യം ലോകകപ്പ് ബഹിഷ്കരിക്കുകയോ പുറത്താക്കപ്പെടുകയോ ചെയ്താല് പകരം ആരെ ഉള്പ്പെടുത്തണം എന്നത് ഫിഫയുടെ മാത്രം അധികാരമാണ്. നേരത്തെ ഇന്റര് മയാമിയെ ക്ലബ് ലോകകപ്പില് ഉള്പ്പെടുത്തിയതുപോലെ ഫിഫ തങ്ങളുടെ അധികാരം ഉപയോഗിക്കുമോ എന്നായിരുന്നു ഇറ്റലിയുടെ പ്രതീക്ഷ. എന്നാല് ട്രംപിന്റെയും ഇന്ഫാന്റിനോയുടെയും നിലപാടോടെ ഇറ്റലിയുടെ വൈല്ഡ് കാര്ഡ് എന്ട്രി സാധ്യതകള് അവസാനിച്ചിരിക്കുകയാണ്.
അമേരിക്ക, കാനഡ, മെക്സിക്കോ എന്നീ രാജ്യങ്ങള് സംയുക്തമായി ആതിഥേയത്വം വഹിക്കുന്ന ലോകകപ്പ് ജൂണ് 11-നാണ് ആരംഭിക്കുന്നത്. ജൂലൈ 19-ന് ന്യൂജേഴ്സിയിലെ മെറ്റ്ലൈഫ് സ്റ്റേഡിയത്തിലാണ് ഫൈനല്. രാഷ്ട്രീയ സംഘര്ഷങ്ങള്ക്കിടയിലും കായിക മാമാങ്കത്തിന് ഇറാന് എത്തുന്നത് ടൂര്ണമെന്റിന് വലിയ വാര്ത്താ പ്രാധാന്യം നല്കുന്നുണ്ട്.