ഒരു നിമിഷം ശ്വാസമെടുക്കാൻ പോലും സമയം കൊടുത്തില്ല; എതിരാളിയെ റിങ്ങിൽ കിട്ടിയതും പഞ്ച് മുഴുവൻ മുഖം നോക്കി തന്നെ കൊടുത്തു; വിയർത്ത് കുളിച്ച് ചോര വന്നിട്ടും വിട്ടില്ല; ഒടുവിൽ കളി അഞ്ചാം റൗണ്ടിലേക്ക് എത്തിയതും റഫറിയുടെ നിർണായക തീരുമാനം; കിക്ക്ബോക്സിംങ്ങിലെ ഇതിഹാസ താരം റോഡ്ടാങ്ങിനെ വിറപ്പിച്ച് ആ ജപ്പാൻ താരം; കടുത്ത നിരാശയിൽ ആരാധകർ

ടോക്കിയോ: ടോക്കിയോയിലെ അരിയാകെ അരീനയിൽ ആയോധനകലയുടെ വന്യമായ കരുത്തും ആവേശവും അലതല്ലിയ 'വൺ സാമുറായി 1' (ONE SAMURAI 1) പോരാട്ടത്തിൽ, ചരിത്രവിജയത്തോടെ ജപ്പാന്റെ ടകെരു സെഗാവ വൺ ഇന്ററിം ഫ്ലൈവെയിറ്റ് കിക്ക്ബോക്സിംഗ് ലോക കിരീടം അണിഞ്ഞു. തായ്‌ലൻഡിന്റെ ഇതിഹാസ താരം റോഡ്ടാങ്ങിനെ അഞ്ചാം റൗണ്ടിൽ സാങ്കേതികമായി നോക്കൗട്ട് (TKO) ചെയ്താണ് ടകെരു തന്റെ കരിയറിലെ സുവർണ്ണ അധ്യായത്തിന് വിരാമമിട്ടത്.

2025 മാർച്ചിൽ നടന്ന ഇവരുടെ ആദ്യ ഏറ്റുമുട്ടലിൽ വെറും 80 സെക്കൻഡുകൾക്കുള്ളിൽ റോഡ്ടാങ്ങിന് മുന്നിൽ അടിപതറിയ ടകെരുവിന്, ആ തോൽവിക്ക് സ്വന്തം നാട്ടുകാർക്ക് മുന്നിൽ വെച്ച് തന്നെ മധുരപ്രതികാരം വീട്ടാൻ കഴിഞ്ഞു എന്നത് ഈ വിജയത്തിന്റെ തിളക്കം വർദ്ധിപ്പിക്കുന്നു. പ്രതിഭയും പോരാട്ടവീര്യവും ഒത്തുചേർന്ന ഈ മത്സരം കിക്ക്ബോക്സിംഗ് ചരിത്രത്തിലെ തന്നെ ഏറ്റവും മികച്ച പോരാട്ടങ്ങളിലൊന്നായി രേഖപ്പെടുത്തപ്പെട്ടു.

മത്സരത്തിന്റെ തുടക്കത്തിൽ അതീവ ജാഗ്രതയോടെ നീങ്ങിയ ടകെരു, റോഡ്ടാങ്ങിന്റെ മാരകമായ പ്രഹരങ്ങളെ സമർത്ഥമായി പ്രതിരോധിച്ചു. രണ്ടാം റൗണ്ടിൽ അപ്രതീക്ഷിതമായ ആക്രമണത്തിലൂടെ റോഡ്ടാങ്ങിനെ രണ്ടുതവണ നിലംപരിശാക്കി ടകെരു ഗാലറിയെ ആവേശത്തിലാഴ്ത്തി. എന്നാൽ 'അയൺ മാൻ' എന്ന് വിശേഷിപ്പിക്കപ്പെടുന്ന റോഡ്ടാങ് പതറാതെ തിരിച്ചുവരികയും മൂന്നും നാലും റൗണ്ടുകളിൽ ടകെരുവിനെ കടുത്ത പ്രതിരോധത്തിലാക്കുകയും ചെയ്തു.

വിജയപരാജയങ്ങൾ മാറിമറിഞ്ഞേക്കാമെന്ന ഘട്ടത്തിൽ, അഞ്ചാം റൗണ്ടിൽ തന്റെ സർവ്വ കരുത്തുമെടുത്ത് ടകെരു നടത്തിയ പ്രത്യാക്രമണം റോഡ്ടാങ്ങിന്റെ പ്രതിരോധം തകർത്തു. റൗണ്ട് അഞ്ചിലെ 2 മിനിറ്റ് 22 സെക്കൻഡിൽ ടകെരുവിന്റെ കരുത്തുറ്റ പഞ്ചുകൾക്ക് മുന്നിൽ റോഡ്ടാങ് വീണതോടെ റഫറി മത്സരം അവസാനിപ്പിച്ച് ടകെരുവിനെ വിജയിയായി പ്രഖ്യാപിച്ചു.

ഈ ഐതിഹാസിക വിജയത്തോടെ 46 ജയങ്ങളും 5 തോൽവികളും എന്ന ഉജ്ജ്വലമായ റെക്കോർഡുമായി ടകെരു സെഗാവ പ്രൊഫഷണൽ കിക്ക്ബോക്സിംഗിൽ നിന്ന് വിരമിക്കൽ പ്രഖ്യാപിച്ചു. ലോക കിരീടം ചൂടി കരിയർ അവസാനിപ്പിക്കുക എന്ന ഏതൊരു കായികതാരത്തിന്റെയും സ്വപ്നം സഫലമാക്കിയ ടകെരുവിന്, മത്സരത്തിലെ മികച്ച പ്രകടനത്തിന് 15 മില്യൺ ജാപ്പനീസ് യെൻ (ഏകദേശം 83 ലക്ഷം രൂപ) ബോണസായും ലഭിച്ചു.

ലോകത്തിലെ ഏറ്റവും മികച്ച പോരാളികളിലൊരാളായ റോഡ്ടാങ്ങിനെ പരാജയപ്പെടുത്തി കിരീടവുമായി വിരമിക്കാൻ കഴിഞ്ഞതിൽ അതിയായ സന്തോഷമുണ്ടെന്ന് അദ്ദേഹം വികാരാധീനനായി പറഞ്ഞു. ജാപ്പനീസ് ആയോധനകലയുടെ കരുത്തും തനിമയും ആഗോളതലത്തിൽ ഒരിക്കൽ കൂടി തെളിയിച്ചാണ് ഈ ഇതിഹാസ താരം തന്റെ ഗ്ലൗസുകൾ അഴിച്ചുവെച്ച് പടിയിറങ്ങിയത്.