കോഴിക്കോട്: കോഴിക്കോട് മാങ്കാവില് കെഎസ്ആര്ടിസി ബസിനുള്ളില് വെച്ച് യുവാവിന് ദാരുണാന്ത്യം. കോട്ടയത്ത് നിന്ന് കോഴിക്കോട്ടേക്ക് പോവുകയായിരുന്ന ബസില് യാത്ര ചെയ്തിരുന്ന കണ്ണൂര് സ്വദേശി സുനിലാണ് മരിച്ചത്. ഇന്ന് പുലര്ച്ചെ ഒരു മണിയോടെയായിരുന്നു നാടിനെ നടുക്കിയ ഈ അപകടം നടന്നത്. ഇന്ന് പുലര്ച്ചെ അരയിടത്ത് പാലത്തിന് സമീപത്താണ് അപകടമുണ്ടായത്.
ബസിന്റെ ഏറ്റവും പിന്നിലെ സൈഡ് സീറ്റിലിരുന്ന സുനില് യാത്രയ്ക്കിടെ ഉറങ്ങിപ്പോയതായിരുന്നു എന്നാണ് ലഭിക്കുന്ന വിവരം. ഉറക്കത്തിനിടെ അറിയാതെ തല പുറത്തേക്ക് വന്ന സമയത്ത് വാഹനമിടിച്ചാണ് മരണം സംഭവിച്ചതെന്ന് പ്രാഥമിക നിഗമനം. വലിയ ശബ്ദം കേട്ട് ഞെട്ടിയുണര്ന്ന മറ്റ് യാത്രക്കാര് നോക്കുമ്പോഴാണ് രക്തത്തില് കുളിച്ചു കിടക്കുന്ന സുനിലിനെ കണ്ടത്. ഉടന് തന്നെ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. ലോറിയാണ് ബസില് ഇടിച്ചതെന്നാണ് സൂചന. ഇടിച്ച വാഹനം കണ്ടെത്താനായുള്ള ശ്രമം തുടരുകയാണ്. പൊലീസ് അന്വേഷണം ആരംഭിച്ചു.
അപകടസമയത്ത് സുനിലിനൊപ്പം ബന്ധുക്കളും ബസിലുണ്ടായിരുന്നു. രാത്രികാലങ്ങളില് ദീര്ഘദൂര ബസുകളില് ജനാലയ്ക്കല് തല വെച്ച് ഉറങ്ങുന്നതിന്റെ അപകടസാധ്യതയിലേക്കാണ് ഈ സംഭവം വിരല്ചൂണ്ടുന്നത്. സംഭവത്തില് പോലീസ് കേസെടുത്ത് വിശദമായ അന്വേഷണം ആരംഭിച്ചിട്ടുണ്ട്. മൃതദേഹം പോസ്റ്റ്മോര്ട്ടം നടപടികള്ക്കായി മെഡിക്കല് കോളേജ് ആശുപത്രിയിലേക്ക് മാറ്റി.