ബംഗളൂരു: സഹപാഠികളുടെ ലഹരി ഉപയോഗം ചോദ്യം ചെയ്ത മലയാളി നഴ്സിംഗ് വിദ്യാര്ത്ഥി ആദിത്യന്റെ മരണത്തില് കോളേജ് മാനേജ്മെന്റിനെതിരെ ഗുരുതര ആരോപണങ്ങളുമായി കുടുംബം. ആദിത്യന്റേത് ആത്മഹത്യയാണെന്ന് വരുത്തിത്തീര്ക്കാന് മാനേജ്മെന്റ് കിണഞ്ഞു ശ്രമിക്കുകയാണെന്ന് പിതാവ് പ്രദീപ് ആരോപിക്കുന്നു. ഉന്നത രാഷ്ട്രീയ ബന്ധങ്ങളുള്ള കോളേജ് അധികൃതര് പോലീസിനെ സ്വാധീനിച്ച് കേസ് അട്ടിമറിക്കാന് നീക്കം നടത്തുന്നതായാണ് ഉയരുന്ന ആക്ഷേപം.
ഹോസ്റ്റലിലെ സഹപാഠികള് ലഹരി മരുന്നുകള് ഉപയോഗിക്കുന്നത് സംബന്ധിച്ച് ആദിത്യന് പലതവണ കോളേജ് അധികൃതര്ക്ക് പരാതി നല്കിയിരുന്നു. എന്നാല് ഇതില് നടപടിയെടുക്കുന്നതിന് പകരം ആദിത്യനെ മാനസികമായി പീഡിപ്പിക്കാനാണ് അധ്യാപകര് ശ്രമിച്ചതെന്ന് കുടുംബം പറയുന്നു. പരാതി നല്കിയതിന്റെ പേരില് ആദിത്യനെ ഒറ്റപ്പെടുത്തുകയും ആക്ഷേപിക്കുകയും ചെയ്തു. ഇത്തരത്തില് കടുത്ത മാനസിക സമ്മര്ദ്ദത്തിലായിരുന്ന വിദ്യാര്ത്ഥിയെ മറ്റൊരു മുറിയിലേക്ക് മാറ്റാന് പോലും കോളേജ് അധികൃതര് തയ്യാറായില്ല എന്നത് ദുരൂഹത വര്ദ്ധിപ്പിക്കുന്നു.
മരണവിവരമറിഞ്ഞ് ബംഗളൂരുവിലെത്തിയ ബന്ധുക്കളോട് ആദിത്യന് ആത്മഹത്യ ചെയ്തതാണെന്ന് മാനേജ്മെന്റ് ആവര്ത്തിച്ച് പറഞ്ഞത് സംശയങ്ങള്ക്ക് ഇടനല്കുന്നു. കര്ണാടക ഉപമുഖ്യമന്ത്രി ഡി.കെ. ശിവകുമാറിന്റെ ബന്ധുവിന്റേതാണ് കോളേജ് എന്നതിനാല് പോലീസ് മെല്ലെപ്പോക്ക് നടത്തുകയാണെന്നും ആക്ഷേപമുണ്ട്. ആദ്യഘട്ടത്തില് പരാതി സ്വീകരിക്കാന് പോലും ഹെബ്ബഗോഡി പോലീസ് തയ്യാറായില്ല. ഒടുവില് ഒരു അഭിഭാഷകന് ഇടപെട്ടതിന് ശേഷമാണ് കേസ് എടുക്കാന് പോലീസ് തയ്യാറായത്.
പ്രണയപരാജയവും ഒറ്റപ്പെടലുമാണ് മരണകാരണമെന്നാണ് മാനേജ്മെന്റ് ഉയര്ത്തുന്ന വാദം. എന്നാല് ഇത് വിശ്വസിക്കാന് കുടുംബം തയ്യാറല്ല. ഇതിനിടെ കോളേജിലെ ദുരനുഭവങ്ങളെക്കുറിച്ച് ആദിത്യന് സംസാരിക്കുന്ന ശബ്ദസന്ദേശം പുറത്തുവന്നത് മാനേജ്മെന്റിനെ കൂടുതല് പ്രതിരോധത്തിലാക്കിയിരിക്കുകയാണ്.
ലഹരി മാഫിയയും കോളേജ് അധികൃതരും തമ്മിലുള്ള അവിശുദ്ധ ബന്ധമാണോ ആദിത്യന്റെ ജീവനെടുത്തത് എന്ന ചോദ്യമാണ് ഇപ്പോള് ഉയരുന്നത്. സംഭവത്തില് സമഗ്രമായ അന്വേഷണം വേണമെന്ന ആവശ്യത്തില് ഉറച്ചുനില്ക്കുകയാണ് ബന്ധുക്കള്.