കൊല്ലം: കൊല്ലം ജല അതോറിറ്റി ഓഫീസിലെ സഹപ്രവര്ത്തകയെ ആക്രമിച്ചെന്ന പരാതിയില് സര്ക്കാര് ഉദ്യോഗസ്ഥന് അറസ്റ്റില്. ജല അതോറിറ്റിയിലെ ക്ലര്ക്കായ വര്ക്കല ഇടവ സ്വദേശി നിഷാദ് (40) ആണ് ഈ കേസില് കൊല്ലം ഈസ്റ്റ് പോലീസിന്റെ പിടിയിലായത്. വിവാഹിതയായ സഹപ്രവര്ത്തകയോട് നിഷാദ് ദീര്ഘകാലമായി മോശമായ രീതിയില് പെരുമാറിയിരുന്നു എന്നാണ് പുറത്തുവരുന്ന വിവരങ്ങള്. തന്നോട് കൂടുതല് അടുപ്പം പുലര്ത്തണമെന്നും സൗഹൃദം സ്ഥാപിക്കണമെന്നും ആവശ്യപ്പെട്ട് ഇയാള് യുവതിയെ നിരന്തരം ശല്യം ചെയ്തിരുന്നു. ജോലിസ്ഥലത്തെ മാന്യതയ്ക്ക് നിരക്കാത്ത വിധത്തിലുള്ള സമ്മര്ദ്ദങ്ങളാണ് നിഷാദ് യുവതിയുടെ മേല് ചെലുത്തിയിരുന്നത്. എന്നാല് ഇയാളുടെ ആവശ്യങ്ങളെ യുവതി ശക്തമായി എതിര്ക്കുകയും മാന്യമായ അകലം പാലിക്കാന് ശ്രമിക്കുകയും ചെയ്തു.
തന്റെ ആഗ്രഹങ്ങള്ക്ക് യുവതി വഴങ്ങുന്നില്ലെന്ന് കണ്ടതോടെ പ്രതിയുടെ ശല്യം ക്രമാതീതമായി വര്ദ്ധിച്ചു. ഇതിന്റെ തുടര്ച്ചയായാണ് കഴിഞ്ഞ ദിവസം ഓഫീസില് വെച്ച് യുവതിക്ക് നേരെ ആക്രമണമുണ്ടായത്. മാനസികമായ പീഡനത്തില് നിന്നും ശാരീരികമായ അതിക്രമത്തിലേക്ക് കാര്യങ്ങള് നീങ്ങിയതോടെയാണ് നീതി തേടി പോലീസിനെ സമീപിക്കാന് യുവതി തീരുമാനിച്ചത്. കൊല്ലം എ.സി.പിക്ക് നല്കിയ പരാതിയുടെ അടിസ്ഥാനത്തില് പ്രാഥമിക അന്വേഷണം നടത്തിയ പോലീസ്, മൊഴിയില് കഴമ്പുണ്ടെന്ന് കണ്ടെത്തിയതിനെത്തുടര്ന്ന് പ്രതിയെ ഉടന് തന്നെ കസ്റ്റഡിയിലെടുക്കുകയായിരുന്നു. സ്ത്രീകളുടെ അന്തസ്സിന് ഭംഗം വരുത്തുക, ജോലിസ്ഥലത്തെ പീഡനം, ശാരീരികമായ ഉപദ്രവം തുടങ്ങിയ വകുപ്പുകള് പ്രകാരമാണ് ഈസ്റ്റ് പോലീസ് പ്രതിക്കെതിരെ കേസ് രജിസ്റ്റര് ചെയ്തിരിക്കുന്നത്. പ്രതിയെ അറസ്റ്റ് ചെയ്ത വിവരം വകുപ്പ് മേധാവികളെ അറിയിച്ചിട്ടുണ്ട്.