കോഴിക്കോട്: പേരാമ്പ്രയിൽ വിവാഹ ആഘോഷത്തിന്റെ ഭാഗമായി പൊതുറോഡിൽ ആഡംബര കാറുകളിൽ അഭ്യാസപ്രകടനം നടത്തിയ യുവാക്കൾക്കെതിരെ മോട്ടോർ വാഹന വകുപ്പ് കർശന നടപടി സ്വീകരിച്ചു. പേരാമ്പ്ര ജോയിന്റ് ആർ.ടി.ഒ എം. പ്രജീഷിന്റെ നേതൃത്വത്തിലാണ് നടപടികൾ പൂർത്തിയാക്കിയത്.
മഞ്ഞക്കുളം സ്വദേശിയായ ഷഫീഖിന്റെ വിവാഹത്തോടനുബന്ധിച്ചായിരുന്നു സുഹൃത്തുക്കളുടെ ഈ അപകടകരമായ യാത്ര. ഇൻസ്റ്റഗ്രാം റീൽസ് ചിത്രീകരണത്തിനായി രൂപമാറ്റം വരുത്തിയ ഒമ്പതോളം കറുത്ത ആഡംബര കാറുകളാണ് ഇവർ ഉപയോഗിച്ചത്. കാറിന്റെ ബോണറ്റിലും മുകളിലും കയറിയിരുന്നും, ഡോറുകൾ തുറന്നുപിടിച്ചും, നിർത്താതെ ഹോൺ മുഴക്കിയുമായിരുന്നു ഇവരുടെ അഭ്യാസപ്രകടനം. മറ്റു വാഹനങ്ങൾക്ക് വഴി നൽകാതെ ഗതാഗതം തടസ്സപ്പെടുത്തിയ ഈ യാത്രയുടെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണ് അധികൃതർ ഒടുവിൽ ഇടപെട്ടത്.