മുംബൈ: ഐപിഎല്ലിലെ 'എല് ക്ലാസിക്കോ' പോരാട്ടത്തില് ചെന്നൈ സൂപ്പര് കിംഗ്സിനോടേറ്റ ദയനീയ പരാജയത്തിന് പിന്നാലെ മുംബൈ ഇന്ത്യന്സ് ക്യാപ്റ്റന് ഹാര്ദിക് പാണ്ഡ്യക്കെതിരെ വിമര്ശനം കടുക്കുന്നു. മുംബൈ ഡ്രസ്സിംഗ് റൂമില് ഹാര്ദിക്കിന് സഹതാരങ്ങളുടെ പിന്തുണ നഷ്ടപ്പെട്ടതായും ടീമിനുള്ളിലെ അന്തരീക്ഷം അങ്ങേയറ്റം മോശമാണെന്നും മുന് ഇന്ത്യന് താരം മനോജ് തിവാരി തുറന്നടിച്ചു. ശനിയാഴ്ച നടന്ന മത്സരത്തില് ചെന്നൈ എട്ട് വിക്കറ്റിന് മുംബൈയെ തകര്ത്തുവിട്ടതിന് പിന്നാലെയാണ് രൂക്ഷമായ വിമര്ശനങ്ങളുമായി തിവാരി രംഗത്തെത്തിയത്.
ടീമിലെ ഓരോ കളിക്കാരന്റെയും വിശ്വാസവും ആത്മവിശ്വാസവും നേടിയെടുക്കുന്നതില് ഹാര്ദിക് പരാജയപ്പെട്ടുവെന്നാണ് തിവാരിയുടെ പ്രധാന ആരോപണം. മൈതാനത്തെ താരങ്ങളുടെ ശരീരഭാഷ ശ്രദ്ധിച്ചാല് അവര് ക്യാപ്റ്റനൊപ്പം നില്ക്കുന്നതായി കാണുന്നില്ലെന്ന് അദ്ദേഹം നിരീക്ഷിച്ചു. മുംബൈ ഇന്ത്യന്സിന്റെ ഈ സീസണ് ഏതാണ്ട് അവസാനിച്ച മട്ടാണെന്നും ടീമിന്റെ പ്രകടനത്തില് അടിസ്ഥാനപരമായ എന്തോ വലിയ പിഴവ് സംഭവിച്ചിട്ടുണ്ടെന്നും അദ്ദേഹം കൂട്ടിച്ചേര്ത്തു. ഐപിഎല് ചരിത്രത്തിലെ ഏറ്റവും വിജയകരമായ ടീമുകളിലൊന്നായ മുംബൈയുടെ നിലവിലെ അവസ്ഥ ദയനീയമാണെന്നാണ് വിലയിരുത്തപ്പെടുന്നത്.
ക്യാപ്റ്റനെന്ന നിലയില് ഹാര്ദിക്കിനെതിരെ വിമര്ശനം ഉയരുമ്പോഴും ടീമിലെ മറ്റ് പ്രമുഖ താരങ്ങളും പരാജയമാണെന്ന് തിവാരി ചൂണ്ടിക്കാട്ടുന്നു. സൂര്യകുമാര് യാദവ്, തിലക് വര്മ്മ തുടങ്ങിയ നിര്ണ്ണായക താരങ്ങള് സ്ഥിരതയാര്ന്ന പ്രകടനം പുറത്തെടുക്കുന്നില്ല. പ്രധാന താരങ്ങള് ഉത്തരവാദിത്തം ഏറ്റെടുത്ത് കളിക്കാത്ത പക്ഷം ടീമിന് പോസിറ്റീവ് ഫലങ്ങള് പ്രതീക്ഷിക്കാനാവില്ലെന്ന് അദ്ദേഹം പറഞ്ഞു. സീനിയര് താരങ്ങള് ഉള്പ്പെടെയുള്ളവര് ക്യാപ്റ്റനെ സഹായിക്കുന്നില്ല എന്ന സൂചനയാണ് തിവാരിയുടെ വാക്കുകളിലുള്ളത്.
മുംബൈ-ചെന്നൈ പോരാട്ടങ്ങള്ക്ക് നല്കിവരുന്ന 'എല് ക്ലാസിക്കോ' എന്ന വിശേഷണം തന്നെ മാറ്റേണ്ട കാലമായെന്നും മനോജ് തിവാരി അഭിപ്രായപ്പെട്ടു. അവസാന ഏഴ് മത്സരങ്ങള് പരിശോധിച്ചാല് അതില് ആറിലും ചെന്നൈയാണ് ആധികാരിക വിജയം നേടിയത്. പോരാട്ടം ഇത്രത്തോളം ഏകപക്ഷീയമായി മാറിയ സാഹചര്യത്തില് ഈ വിശേഷണത്തിന് പ്രസക്തിയില്ലെന്ന് അദ്ദേഹം പരിഹസിച്ചു. ചെന്നൈയുടെ ആധിപത്യത്തിന് മുന്നില് മുംബൈ നിഷ്പ്രഭമാകുന്ന കാഴ്ചയാണ് അടുത്ത കാലത്തായി കണ്ടുവരുന്നത്.
നിലവില് പോയിന്റ് പട്ടികയില് ഒന്പതാം സ്ഥാനത്തേക്ക് പിന്തള്ളപ്പെട്ട മുംബൈയ്ക്ക് പ്ലേ ഓഫ് പ്രതീക്ഷകള് നിലനിര്ത്താന് ഇനിയുള്ള മത്സരങ്ങള് അതിനിര്ണ്ണായകമാണ്. തിങ്കളാഴ്ച ലക്നൗ സൂപ്പര് ജയന്റ്സിനെതിരെയാണ് മുംബൈയുടെ അടുത്ത പോരാട്ടം. ആഭ്യന്തര തര്ക്കങ്ങളും ക്യാപ്റ്റന്സിയെ ചൊല്ലിയുള്ള വിവാദങ്ങളും ടീമിനെ തളര്ത്തുന്നതിനിടെ, ഈ നിര്ണ്ണായക മത്സരത്തില് ടീമിനെ എങ്ങനെ ഒരുമിപ്പിക്കും എന്ന വലിയ വെല്ലുവിളിയാണ് ഹാര്ദിക് പാണ്ഡ്യയ്ക്ക് മുന്നിലുള്ളത്.