തിരുവനന്തപുരം: വട്ടിയൂര്ക്കാവ് വെള്ളൈക്കടവ് ക്ഷേത്രോത്സവത്തോടനുബന്ധിച്ചുണ്ടായ സംഘര്ഷത്തില് ഒന്നാം പ്രതിയായ ബിജെപി കൗണ്സിലര് ആര്. സുഗതന് ഒളിവില്. മുതിര്ന്ന ബിജെപി നേതാവും വാഴോട്ടുകോണം വാര്ഡ് കൗണ്സിലറുമായ സുഗതന്റെ മുന്കൂര് ജാമ്യാപേക്ഷ കോടതി തള്ളിയതോടെയാണ് പോലീസ് ഇയാള്ക്കായി തിരച്ചില് ശക്തമാക്കിയത്. കേസിലെ നാലാം പ്രതിയും ബിജെപി പ്രവര്ത്തകനുമായ സന്തോഷിനെ പോലീസ് നേരത്തെ അറസ്റ്റ് ചെയ്തിരുന്നു.
കഴിഞ്ഞ മാസമാണ് വെള്ളൈക്കടവ് ക്ഷേത്ര പരിസരത്ത് സംഘര്ഷമുണ്ടായത്. ഉത്സവത്തോടനുബന്ധിച്ച് നടന്ന ഗാനമേളയുമായി ബന്ധപ്പെട്ട തര്ക്കമാണ് വലിയ അടിപിടിയില് കലാശിച്ചത്. ഗാനമേള തടസ്സപ്പെടുത്തിയവരെ തടയുക മാത്രമാണ് ചെയ്തതെന്നാണ് സുഗതന് അവകാശപ്പെടുന്നത്. എന്നാല്, സിപിഎം പ്രവര്ത്തകരെ ആസൂത്രിതമായി മര്ദ്ദിക്കുകയായിരുന്നുവെന്ന് എല്ഡിഎഫ് പരാതി നല്കി. സംഭവത്തില് വട്ടിയൂര്ക്കാവ് പോലീസ് കേസെടുത്തതോടെ സുഗതന് ഉള്പ്പെടെയുള്ള പ്രതികള് ഒളിവില് പോവുകയായിരുന്നു.
കൗണ്സിലര് ആര്. സുഗതന് മുന്പും സമാനമായ വിവാദങ്ങളില് ഉള്പ്പെട്ടിട്ടുണ്ട്. വാഴോട്ടുകോണം വാര്ഡിലെ മഹിളാ മന്ദിരം ഉദ്ഘാടന വേളയില് വട്ടിയൂര്ക്കാവ് എംഎല്എ വി.കെ. പ്രശാന്തിനെ തടഞ്ഞതിനും ഭീഷണിപ്പെടുത്തിയതിനും സുഗതനെതിരെ കേസ് നിലവിലുണ്ട്. എംഎല്എയുടെ കാര് തടയുകയും മൈക്ക് ഓപ്പറേറ്റര്മാരെ ഭീഷണിപ്പെടുത്തുകയും ചെയ്തുവെന്നായിരുന്നു അന്നത്തെ പരാതി. തുടര്ച്ചയായ കേസുകളില് ഉള്പ്പെട്ടതോടെ സുഗതനെ കണ്ടെത്താന് സൈബര് സെല്ലിന്റെ സഹായത്തോടെ അന്വേഷണം വ്യാപിപ്പിച്ചിരിക്കുകയാണ് പോലീസ്.
തിരഞ്ഞെടുപ്പ് ചൂടിനിടയില് ബിജെപി കൗണ്സിലര്ക്കെതിരെയുള്ള പോലീസ് നടപടി രാഷ്ട്രീയ വിവാദങ്ങള്ക്കും വഴിവെച്ചിട്ടുണ്ട്. കൗണ്സിലറെ രാഷ്ട്രീയമായി വേട്ടയാടുകയാണെന്ന് ബിജെപി ആരോപിക്കുമ്പോള്, ഗുണ്ടായിസം നടത്തുന്നവര്ക്കെതിരെ കര്ശന നടപടി വേണമെന്നാണ് സിപിഎം നിലപാട്. പ്രതികള് ഒളിവില് കഴിയാന് സാധ്യതയുള്ള ഇടങ്ങളില് പോലീസ് റെയ്ഡ് നടത്തിവരികയാണ്. ഉടന് തന്നെ പ്രതികളെ പിടികൂടുമെന്ന് വട്ടിയൂര്ക്കാവ് പോലീസ് അറിയിച്ചു.