കണ്ണൂര്: താമസിക്കുന്ന സ്ഥലങ്ങളില് സന്നദ്ധ സംഘടനകള്ക്ക് വന്തോതില് സംഭാവന നല്കും, നാട്ടുകാര്ക്കിടയില് വലിയ മതിപ്പുണ്ടാക്കും, ഒടുവില് ആരും സംശയിക്കാത്ത ഒരു 'നന്മമരമായി' നാട്ടില് മാന്യനായി വിലസുക - ഇതായിരുന്നു കണ്ണൂര് ആലക്കോട് കൊല്ലപറമ്പില് വീട്ടില് കെ.യു. മുഹമ്മദിന്റെ (46) രീതി. റിയല് എസ്റ്റേറ്റ് ഏജന്റാണെന്ന് നാട്ടുകാരെ പറഞ്ഞു വിശ്വസിപ്പിച്ചിരുന്ന ഇയാള്, മോഷണത്തിലൂടെ സമ്പാദിച്ച കോടികള് കൊണ്ടാണ് അതിസമ്പന്നനായതും ജീവകാരുണ്യ പ്രവര്ത്തനങ്ങളില് സജീവമായതും. ആലക്കോട്ട് കൊച്ചുകുട്ടാപറമ്പില് രണ്ടുകോടിയോളം രൂപ ചെലവഴിച്ച് നിര്മ്മിച്ച ആഡംബര വീട്ടിലായിരുന്നു ഇയാളുടെ താമസം. ഈ വീടിനുള്ളിലെ രഹസ്യ അറകളിലായിരുന്നു മോഷ്ടിച്ച സ്വര്ണ്ണാഭരണങ്ങള് സൂക്ഷിച്ചിരുന്നത്.
കല്പ്പറ്റ ഗ്രാമത്തുവയലിലെ വീട്ടില്നിന്ന് ഒന്പത് പവന് സ്വര്ണാഭരണങ്ങള് കവര്ന്ന കേസിലാണ് മാന്യനായി നടന്ന ഈ 'കോടീശ്വരന് കള്ളനെ' വയനാട് പോലീസ് ഇപ്പോള് പിടികൂടിയത്. കൂട്ടുപ്രതി കട്ടിത്താനത്ത് വീട്ടില് കെ.ടി. ജോസിനൊപ്പമാണ് മുഹമ്മദ് പിടിയിലായത്. 18-ാം വയസ്സില് മോഷണം തുടങ്ങിയ മുഹമ്മദ്, സംസ്ഥാനത്തിനകത്തും പുറത്തുമായി 150-ഓളം കേസുകളില് പ്രതിയാണ്. മോഷണത്തിലൂടെ കോടികളുടെ ആസ്തിയുണ്ടാക്കിയ ഇയാള്ക്ക് തളിപ്പറമ്പിലും പരിസരത്തും ഭൂമിയും ആഡംബര കാറുകളും സ്വന്തമായുണ്ട്. കാസര്കോട് ബെളാലില് നേരത്തെ ഒരു പെട്രോള് പമ്പും ഇയാള് നടത്തിയിരുന്നു.
മുഹമ്മദിനെ പിടികൂടാന് കെ.എസ്.ഇ.ബി. ജീവനക്കാരുടെ വേഷത്തിലാണ് വയനാട് പോലീസ് ആലക്കോട്ടെത്തിയത്. മഴക്കാല പൂര്വ പരിശോധനയുടെ ഭാഗമായി ലൈനുകള് പരിശോധിക്കാനെന്ന വ്യാജേന മഫ്തിയിലെത്തിയ പോലീസ് സംഘം ഒരാഴ്ചയോളം മുഹമ്മദിന്റെ നീക്കങ്ങള് നിരീക്ഷിച്ചു. പോലീസിന് പോലും അമ്പരപ്പുണ്ടാക്കുന്ന രീതിയിലായിരുന്നു ഇയാളുടെ ജീവിതശൈലി. ആഡംബര വാഹനങ്ങളില് മാത്രം സഞ്ചരിക്കുന്ന മുഹമ്മദിനെക്കുറിച്ച് നാട്ടുകാര്ക്ക് ലവലേശം സംശയമുണ്ടായിരുന്നില്ല.
പൂട്ടിയിട്ട വീടുകളെക്കുറിച്ചുള്ള വിവരങ്ങള് കൂട്ടാളിയായ ജോസ് മുഹമ്മദിന് കൈമാറുന്നതാണ് ഇവരുടെ രീതി. ശരീരം പൂര്ണ്ണമായും മറച്ച്, ക്യാമറകളില് കുടുങ്ങാത്ത വിധം വേഷം മാറിയാണ് മുഹമ്മദ് മോഷണം നടത്തുന്നത്. 2017-ല് കോഴിക്കോട് നടന്ന കവര്ച്ചാ കേസില് പിടിക്കപ്പെട്ടപ്പോഴാണ് ആഡംബര വീടിനുള്ളിലെ രഹസ്യ അറകളെക്കുറിച്ച് പോലീസിന് വിവരം ലഭിക്കുന്നത്. ഓരോ തവണ ജയിലില്നിന്ന് പുറത്തിറങ്ങിയാലും വീണ്ടും വന് മോഷണങ്ങളിലേക്ക് തിരിയുന്നതാണ് ഇയാളുടെ സ്വഭാവമെന്ന് പോലീസ് പറയുന്നു.
മുന്പ് 2008-ല് 32 കേസുകളിലായി 500 പവനോളം സ്വര്ണ്ണം മോഷ്ടിച്ചതിന് ഇരിക്കൂര് പോലീസ് ഇയാളെ അറസ്റ്റ് ചെയ്തിരുന്നു. അക്കാലത്ത് തളിപ്പറമ്പ് മാവിച്ചേരിയില് ലക്ഷങ്ങള് മുടക്കി വീടുപണിയുകയും ഫര്ണിച്ചര് കട നടത്തുകയും ചെയ്തിരുന്ന മുഹമ്മദിനെ കണ്ട് പോലീസ് അന്നും അമ്പരന്നിരുന്നു. വീടിന്റെ പിറകുവശത്തെ വാതില് തകര്ത്ത് അകത്തുകയറി സ്വര്ണ്ണവും പണവും മാത്രം ലക്ഷ്യം വെക്കുന്നതാണ് ഇയാളുടെ ശൈലി.
വയനാട് ജില്ലാ പോലീസ് മേധാവി അരുണ് കെ. പവിത്രന്റെ നേതൃത്വത്തിലുള്ള സംഘമാണ് ഇത്തവണ ഇയാളുടെ 'മാന്യന്' മുഖംമൂടി അഴിച്ചുമാറ്റിയത്. സംസ്ഥാനത്തിനകത്തും പുറത്തുമായി 150-ഓളം മോഷണകേസുകളിലുള്പ്പെട്ട കണ്ണൂര് ആലക്കോട് കൊല്ലപറമ്പില് വീട്ടില് കെ.യു. മുഹമ്മദിനെയാണ് (46) പോലീസ് പിടികൂടിയത്. ഒപ്പം കൂട്ടാളി പുല്പള്ളി, പാടിച്ചിറ കട്ടിത്താനത്ത് വീട്ടില് കെ.ടി. ജോസും (കമ്പളക്കാട് ജോസ്-72) അറസ്റ്റിലായി. ഏപ്രില് 23-ന് രാത്രിയും 24-ന് പുലര്ച്ചയ്ക്കുമിടെയാണ് കല്പറ്റ ഗ്രാമത്തുവയലിലെ വീട്ടില്നിന്ന് ഇവര് ആഭരണങ്ങള് കവര്ന്നത്. മുഹമ്മദിനെ ആലക്കോട് പൂവഞ്ചാലില്നിന്നും ജോസിനെ മാനന്തവാടി ബോയ്സ് ടൗണില്നിന്നുമാണ് പിന്തുടര്ന്ന് പിടികൂടിയത്.
അടച്ചിട്ട വീടുകളെക്കുറിച്ചുള്ള വിവരങ്ങള് ജോസ് മുഹമ്മദിന് കൈമാറും. ഇവിടെ ആളില്ലെന്ന് ഉറപ്പാക്കിയശേഷം പൂട്ട് പൊളിച്ച് അകത്തുകയറി മോഷണം നടത്തും. കണ്ണ് ഒഴികെയുള്ള ശരീരഭാഗങ്ങള് പൂര്ണമായും മറച്ച്, ഇടയ്ക്കിടെ വേഷംമാറി, ക്യാമറകളില് കുടുങ്ങാതെ ശ്രദ്ധിച്ചായിരുന്നു മോഷണം.