കണ്ണൂര്: കണ്ണൂര് അഞ്ചരക്കണ്ടി ദന്തല് കോളേജ് വിദ്യാര്ത്ഥി നിതിന് രാജിന്റെ മരണവുമായി ബന്ധപ്പെട്ട് നീതി തേടി സംസ്ഥാനത്ത് ചൊവ്വാഴ്ച പുലര്ച്ചെ 6 മണി മുതല് വൈകിട്ട് 6 മണി വരെ ഹര്ത്താലിന് ആഹ്വാനം. ജസ്റ്റിസ് ഫോര് നിതിന് രാജ് ആക്ഷന് കൗണ്സിലിന്റെ നേതൃത്വത്തില് നടക്കുന്ന ഈ ഹര്ത്താലിന് അറുപതോളം വരുന്ന വിവിധ സാമൂഹിക-പൗര സംഘടനകള് പിന്തുണ പ്രഖ്യാപിച്ചിട്ടുണ്ട്. നിതിന് രാജിന്റെ മരണം കേവലമൊരു ആത്മഹത്യയല്ലെന്നും ക്യാമ്പസിനുള്ളിലെ ജാതീയ അധിക്ഷേപവും പീഡനങ്ങളും മൂലമുണ്ടായതാണെന്നും ആക്ഷന് കൗണ്സില് ആരോപിക്കുന്നു.
കോളേജിലെ അധ്യാപകനായ ഡോ. എം.കെ. റാം ഉള്പ്പെടെയുള്ള പ്രതികളെ ഉടന് അറസ്റ്റ് ചെയ്യുക എന്നതാണ് ഹര്ത്താല് അനുകൂലികളുടെ പ്രധാന ആവശ്യം. ഇതിനുപുറമെ, ഉന്നത വിദ്യാഭ്യാസ മേഖലയിലെ ജാതീയ വിവേചനങ്ങള് തടയുന്നതിനായി 'രോഹിത് വെമുല നിയമം' നടപ്പിലാക്കുക, നിതിന് രാജിന്റെ കുടുംബത്തിന് 10 കോടി രൂപ നഷ്ടപരിഹാരം നല്കുക, കോളേജിന്റെ അഫിലിയേഷന് റദ്ദാക്കുക, ഹൈക്കോടതിയുടെ മേല്നോട്ടത്തില് സ്വതന്ത്രമായ അന്വേഷണം നടത്തുക തുടങ്ങിയ ആവശ്യങ്ങളും അവര് ഉന്നയിക്കുന്നു.
ഹര്ത്താല് ദിനത്തില് സ്വകാര്യ വാഹനങ്ങള് തടയുമെന്നും കടകമ്പോളങ്ങള് അടച്ച് വ്യാപാരികള് സഹകരിക്കണമെന്നും ആക്ഷന് കൗണ്സില് ജില്ലാ കണ്വീനര് സുനില് കൊയിലേരിയന് അറിയിച്ചു. അതേസമയം, പാല്, പത്രം, ആശുപത്രി തുടങ്ങിയ അവശ്യ സേവനങ്ങളെ ഹര്ത്താലില് നിന്ന് ഒഴിവാക്കിയിട്ടുണ്ട്. നിലവിലെ പോലീസ് അന്വേഷണത്തില് തൃപ്തരല്ലെന്നും കേസ് പ്രത്യേക ഏജന്സിക്ക് കൈമാറണമെന്നും ആവശ്യപ്പെട്ടാണ് കേരള പിന്നാക്ക സമുദായ മുന്നണി (കെപിഎസ്എം) അടക്കമുള്ള സംഘടനകള് തെരുവിലിറങ്ങുന്നത്.
കേസിലെ ഒന്നാം പ്രതിയായ ഡോ. എം.കെ. റാമിന് തലശ്ശേരി അഡീഷണല് ജില്ലാ സെഷന്സ് കോടതി നേരത്തെ മുന്കൂര് ജാമ്യം നിഷേധിച്ചിരുന്നു. എന്നാല് രണ്ടാം പ്രതി സംഗീത നമ്പ്യാര്ക്ക് കോടതി ജാമ്യം അനുവദിച്ചു. ആത്മഹത്യാ പ്രേരണാ കുറ്റത്തിന് പുറമെ പട്ടികജാതി-പട്ടികവര്ഗ അതിക്രമ നിരോധന നിയമപ്രകാരമുള്ള ജാമ്യമില്ലാ വകുപ്പുകളാണ് പ്രതികള്ക്കെതിരെ ചുമത്തിയിട്ടുള്ളത്.