ആറ്റിങ്ങല്: ആറ്റിങ്ങലില് പത്താം ക്ലാസ് വിദ്യാര്ത്ഥിനിയെ വിവാഹ വാഗ്ദാനം നല്കി പീഡിപ്പിച്ച കേസില് വിവാഹിതനായ യുവാവിന് 20 വര്ഷം കഠിനതടവ്. കിളിമാനൂര് മുളയ്ക്കലത്തുകാവ് സ്വദേശിയായ ശ്രീഹരിയെയാണ് ആറ്റിങ്ങല് അതിവേഗ കോടതി 20 വര്ഷം കഠിനതടവിന് ശിക്ഷിച്ചത്. തടവ് ശിക്ഷയ്ക്ക് പുറമെ നാല് ലക്ഷം രൂപ പിഴയും പ്രതി അടയ്ക്കണം. പിഴയടച്ചില്ലെങ്കില് 16 മാസം കൂടി അധിക തടവ് അനുഭവിക്കേണ്ടി വരും. പട്ടികജാതി വിഭാഗത്തില്പ്പെട്ട അതിജീവിതയെ ചതിയില്പ്പെടുത്തി പീഡിപ്പിച്ചതിനാണ് ഈ കര്ശന നടപടി.
2019-ലായിരുന്നു കേസിനാസ്പദമായ സംഭവം നടന്നത്. വിവാഹിതനായ പ്രതി ശ്രീഹരി, സ്കൂള് വിദ്യാര്ത്ഥിനിയെ വിവാഹം കഴിക്കാമെന്ന് വിശ്വസിപ്പിച്ച് നിരന്തരം ലൈംഗികമായി ചൂഷണം ചെയ്യുകയായിരുന്നു. പിന്നീട് കുട്ടി ഗര്ഭിണിയായതോടെയാണ് വീട്ടുകാര് പീഡനവിവരം പുറത്തറിയുന്നത്. തുടര്ന്ന് കിളിമാനൂര് പോലീസ് കേസെടുത്ത് അന്വേഷണം ആരംഭിച്ചു. ശാസ്ത്രീയ തെളിവുകള് ഉള്പ്പെടെ ശേഖരിച്ചുകൊണ്ടുള്ള സമഗ്രമായ അന്വേഷണമാണ് ഈ കേസില് നടന്നത്.
ആറ്റിങ്ങല് ഡിവൈഎസ്പി ടി. ജയകുമാറിന്റെ നേതൃത്വത്തിലുള്ള പോലീസ് സംഘമാണ് പ്രതിയെ അറസ്റ്റ് ചെയ്തത്. പ്രായപൂര്ത്തിയാകാത്ത കുട്ടിയെ ലൈംഗികമായി ഉപദ്രവിച്ചതിനും പട്ടികജാതി-പട്ടികവര്ഗ പീഡന നിരോധന നിയമപ്രകാരവുമാണ് ശിക്ഷ വിധിച്ചിരിക്കുന്നത്. പ്രോസിക്യൂഷന് വേണ്ടി സ്പെഷ്യല് പബ്ലിക് പ്രോസിക്യൂട്ടര് അഡ്വ. യു. സലിംഷ, അഡ്വ. നീലിമ ആര്. കൃഷ്ണന് എന്നിവര് ഹാജരായി.