കായംകുളം: പാമ്പ് കടിയേറ്റ് ചികിത്സയിലായിരുന്ന വീട്ടമ്മ മരിച്ച സംഭവത്തില് കായംകുളം താലൂക്ക് ആശുപത്രിക്കെതിരെ ഗുരുതര ആരോപണവുമായി ബന്ധുക്കള്. കൃത്യസമയത്ത് ചികിത്സ നല്കുന്നതില് ആശുപത്രി അധികൃതര്ക്ക് വീഴ്ച പറ്റിയതാണ് സെലീനയുടെ (42) മരണത്തിന് കാരണമായതെന്ന് പിതാവ് സമീര് ആരോപിച്ചു. സംഭവത്തില് മുഖ്യമന്ത്രിക്കും ആരോഗ്യ മന്ത്രിക്കും പരാതി നല്കാനാണ് കുടുംബത്തിന്റെ തീരുമാനം.
കഴിഞ്ഞ വ്യാഴാഴ്ച വൈകുന്നേരമാണ് സെലീനയ്ക്ക് പാമ്പ് കടിയേറ്റത്. ഉടന് തന്നെ താലൂക്ക് ആശുപത്രിയില് എത്തിച്ചെങ്കിലും ആന്റി വെനം നല്കാന് അധികൃതര് തയ്യാറായില്ലെന്ന് ബന്ധുക്കള് പറയുന്നു. എന്നാല്, സെലീനയുടെ ശരീരത്തില് പാമ്പ് കടിയേറ്റതിന്റെ ലക്ഷണങ്ങള് കണ്ടിരുന്നില്ലെന്നും ചികിത്സയില് യാതൊരുവിധ വീഴ്ചയും സംഭവിച്ചിട്ടില്ലെന്നുമാണ് ആശുപത്രി അധികൃതരുടെ വിശദീകരണം. ഈ വാദങ്ങള് പൂര്ണ്ണമായും തള്ളിക്കളയുന്ന കുടുംബം, ആശുപത്രിയില് നിന്നും തങ്ങള്ക്ക് കടുത്ത അവഗണനയാണ് നേരിടേണ്ടി വന്നതെന്ന് വ്യക്തമാക്കി.
സംസ്ഥാനത്തിന്റെ വിവിധ ഭാഗങ്ങളില് പാമ്പ് കടിയേല്ക്കുന്ന സംഭവങ്ങള് വര്ധിക്കുന്നത് ആശങ്ക പരത്തുന്നുണ്ട്. രാമന്കുളങ്ങരയില് പരിസരം വൃത്തിയാക്കുന്നതിനിടെ സുദേവന് എന്നയാള്ക്ക് പാമ്പ് കടിയേറ്റു. ഇദ്ദേഹത്തെ കൊല്ലം ജില്ലാ ആശുപത്രിയില് പ്രവേശിപ്പിച്ചു. സുദേവന്റെ ആരോഗ്യനില തൃപ്തികരമാണെന്ന് ഡോക്ടര്മാര് അറിയിച്ചു.