മുംബൈ: ഐപിഎല് സീസണിലെ ആറാം തോല്വി ഏറ്റുവാങ്ങിയ മുംബൈ ഇന്ത്യന്സ് പ്ലേഓഫ് കാണാതെ പുറത്താകുമെന്ന ഭീതിയിലാണ്. എട്ടു മത്സരങ്ങളില് നിന്ന് വെറും ആറ് പോയിന്റുമായി ഒന്പതാം സ്ഥാനത്തുള്ള മുംബൈയ്ക്ക്, ഹോം ഗ്രൗണ്ടായ വാങ്കഡെയില് സണ്റൈസേഴ്സ് ഹൈദരാബാദിനോട് ഏറ്റ ആറ് വിക്കറ്റ് തോല്വി കനത്ത തിരിച്ചടിയായി. 244 റണ്സെന്ന കൂറ്റന് വിജയലക്ഷ്യം ഉയര്ത്തിയിട്ടും എട്ട് പന്തുകള് ബാക്കിനില്ക്കെ ഹൈദരാബാദ് ലക്ഷ്യം കണ്ടത് മുംബൈയുടെ ബൗളിംഗ് നിരയുടെയും നായകന് ഹാര്ദിക് പാണ്ഡ്യയുടെ തന്ത്രങ്ങളുടെയും പരാജയമായാണ് വിലയിരുത്തപ്പെടുന്നത്. വാങ്കഡെയില് മുംബൈ വഴങ്ങുന്ന തുടര്ച്ചയായ നാലാം തോല്വിയാണിത്.
മത്സരത്തില് ആരാധകരെയും ക്രിക്കറ്റ് നിരീക്ഷകരെയും ഒരുപോലെ അമ്പരപ്പിച്ചത് ഇംപാക്ട് സബ്സ്റ്റിറ്റിയൂട്ടായി വന്ന ഷാര്ദൂല് ഠാക്കൂറിനെ ഒരു ഓവര് പോലും പന്തെറിയിപ്പിക്കാത്ത ഹാര്ദിക് പാണ്ഡ്യയുടെ തീരുമാനമാണ്. പവര്പ്ലേയില് തന്നെ മുംബൈ ബൗളര്മാര് 92 റണ്സ് വഴങ്ങി വിയര്ക്കുമ്പോഴാണ് ഏഴാം ഓവറില് വിക്കറ്റ് കീപ്പര് ബാറ്റര് റോബിന് മിന്സിന് പകരം ഷാര്ദൂല് കളത്തിലിറങ്ങിയത്. ഐപിഎല്ലില് നൂറിലധികം വിക്കറ്റുകള് വീഴ്ത്തി പരിചയസമ്പത്തുള്ള, നിര്ണ്ണായക ഘട്ടങ്ങളില് കൂട്ടുകെട്ടുകള് തകര്ക്കാന് മിടുക്കനായ ഷാര്ദൂലിനെ ടീമിലുണ്ടായിട്ടും ഹാര്ദിക് ഉപയോഗിച്ചില്ല. മുന് ഇന്ത്യന് താരം ആകാശ് ചോപ്ര ഉള്പ്പെടെയുള്ളവര് ഈ വിചിത്രമായ തീരുമാനത്തെ ചോദ്യം ചെയ്ത് രംഗത്തെത്തി. ഒരു ബൗളറെ ഇംപാക്ട് സബ് ആയി കൊണ്ടുവന്നിട്ട് പന്തെറിയിക്കാത്തത് യുക്തിക്ക് നിരക്കാത്തതാണെന്ന് സോഷ്യല് മീഡിയയില് വിമര്ശനം കടുക്കുകയാണ്.
ബൗളിംഗില് ജസ്പ്രീത് ബുമ്ര തന്റെ കരിയറിലെ ഏറ്റവും മോശം പ്രകടനങ്ങളിലൊന്നിലൂടെ നാല് ഓവറില് 54 റണ്സ് വിട്ടുനല്കിയപ്പോള് ട്രെന്റ് ബോള്ട്ട് 41 റണ്സ് വഴങ്ങി. അശ്വനി കുമാര് രണ്ട് ഓവറില് 41 റണ്സ് വഴങ്ങിയതും മുംബൈയുടെ പതനം വേഗത്തിലാക്കി. വില് ജാക്സിനെക്കൊണ്ട് ഒരോവര് എറിയിച്ചിട്ട് 19 റണ്സ് വിട്ടുനല്കിയപ്പോഴും ഷാര്ദൂലിനെ പരിഗണിക്കാതിരുന്ന നായകന്റെ നിലപാട് ടീം മാനേജ്മെന്റിനെ പോലും അലോസരപ്പെടുത്തിയിട്ടുണ്ട്. ബാറ്റിംഗ് ക്രമത്തിലെ മാറ്റങ്ങളും മുംബൈയ്ക്ക് തിരിച്ചടിയായി. മികച്ച ഫോമിലുള്ള തിലക് വര്മ്മയെ മാറ്റിനിര്ത്തി നമന് ധീറിനെ വണ്ഡൗണായി ഇറക്കിയത് പാളിപ്പോയി. സീസണില് സെഞ്ച്വറി ഉള്പ്പെടെ നേടിയ തിലകിന് ഇന്നിംഗ്സിന്റെ അവസാന ഓവറുകളില് ഏതാനും പന്തുകള് മാത്രമാണ് നേരിടാന് സാധിച്ചത്.
ടീമിന്റെ അച്ചടക്കമില്ലാത്ത പ്രകടനത്തില് ഉടമ ആകാശ് അംബാനി പരസ്യമായി തന്നെ അതൃപ്തി പ്രകടിപ്പിച്ചു. ട്രാവിസ് ഹെഡിന്റെ ബാക്കില് പന്ത് തട്ടിയിട്ടും അപ്പീല് ചെയ്യാതിരുന്ന താരങ്ങളുടെ അശ്രദ്ധ സ്റ്റേഡിയത്തിലെ വലിയ സ്ക്രീനില് കണ്ടപ്പോള് ആകാശ് അംബാനി പ്രകോപിതനായി. തുടര്ന്ന് ട്രാവിസ് ഹെഡിന്റെ രണ്ട് ക്യാച്ചുകള് തിലക് വര്മ്മയും നമന് ധീറും കൈവിട്ടതോടെ അദ്ദേഹം സീറ്റില് നിന്ന് എഴുന്നേറ്റ് നിന്ന് പ്രതിഷേധം അറിയിച്ചു. ജസ്പ്രീത് ബുംറ, ട്രെന്റ് ബോള്ട്ട്, മിച്ചല് സാന്റ്നര് തുടങ്ങിയ ലോകോത്തര ബൗളര്മാര് അണിനിരന്നിട്ടും 243 റണ്സ് പ്രതിരോധിക്കാന് കഴിയാത്തത് മുംബൈ ഇന്ത്യന്സിന്റെ സീസണിലെ ദയനീയാവസ്ഥയാണ് വെളിപ്പെടുത്തുന്നത്. പിഴവുകള് ആവര്ത്തിക്കുന്ന മുംബൈയ്ക്ക് ഇനിയുള്ള മത്സരങ്ങള് നിര്ണ്ണായകമാണ്.