ടെക്സസ്: പിക്കിൾബോൾ താരങ്ങൾ സഞ്ചരിച്ചിരുന്ന ചെറുവിമാനം വനമേഖലയിൽ തകർന്നു വീണ് വിമാനത്തിലുണ്ടായിരുന്ന അഞ്ചുപേരും കൊല്ലപ്പെട്ടു. ടെക്സസിലെ വിംബർലിക്ക് സമീപം വ്യാഴാഴ്ച രാത്രി 11 മണിയോടെയാണ് ആർക്കും വിശ്വസിക്കാനാകാത്ത ഈ ദുരന്തമുണ്ടായത്. മരിച്ചവരിൽ പൈലറ്റും നാല് യാത്രക്കാരും ഉൾപ്പെടുന്നു. അമരില്ലോയിൽ നിന്ന് പിക്കിൾബോൾ ടൂർണമെന്റിൽ പങ്കെടുക്കാൻ ന്യൂ ബ്രൗൺഫെൽസിലേക്ക് പുറപ്പെട്ട സെസ്ന 421C വിമാനമാണ് തകർന്നത്.
മരിച്ചവർ അമരില്ലോ പിക്കിൾബോൾ ക്ലബ്ബിലെ അംഗങ്ങളാണെന്ന് ക്ലബ് അധികൃതർ സ്ഥിരീകരിച്ചു. "അവർ മികച്ച കളിക്കാരായിരുന്നു, മെഡലുകൾ വാരിക്കൂട്ടാനാണ് അവർ പുറപ്പെട്ടത്" എന്ന് ക്ലബ് പ്രസിഡന്റ് ഡാൻ ഡയർ ഓർമ്മിച്ചു. വിമാനം തകരുന്നതിന് തൊട്ടുമുമ്പ് എൻജിനിൽ നിന്ന് വലിയ ശബ്ദം കേട്ടതായി നാട്ടുകാർ വെളിപ്പെടുത്തി. "വീട് വിറയ്ക്കുന്ന ശബ്ദം കേട്ടാണ് ഞാൻ ഞെട്ടിയുണർന്നത്, എന്റെ വീടിന്റെ പിൻഭാഗം കത്തുകയാണെന്നാണ് ഞാൻ കരുതിയത്" - സമീപവാസി സ്റ്റേസി റോർ പറഞ്ഞു.
വിമാനം അസാധാരണമായ രീതിയിൽ നീങ്ങുകയും റഡാറിൽ നിന്ന് അപ്രത്യക്ഷമാവുകയും ചെയ്തതായി എയർ ട്രാഫിക് കൺട്രോൾ വിഭാഗവും വ്യക്തമാക്കിയിട്ടുണ്ട്. ദുരന്തത്തിൽപ്പെട്ട വിമാനത്തിനൊപ്പം അമരില്ലോയിൽ നിന്ന് മറ്റൊരു വിമാനം കൂടി ടൂർണമെന്റിനായി പുറപ്പെട്ടിരുന്നു. ഈ വിമാനം ന്യൂ ബ്രൗൺഫെൽസ് വിമാനത്താവളത്തിൽ സുരക്ഷിതമായി ഇറങ്ങി. തന്റെ സുഹൃത്തുക്കളെക്കുറിച്ച് വിവരമൊന്നുമില്ലെന്ന് രണ്ടാമത്തെ വിമാനത്തിലെ പൈലറ്റ് ആശങ്കയോടെ കൺട്രോൾ റൂമിനെ അറിയിക്കുന്ന ഓഡിയോ പുറത്തുവന്നിട്ടുണ്ട്.
വനപ്രദേശത്ത് പൂർണ്ണമായും തകർന്ന നിലയിലാണ് വിമാനം കണ്ടെത്തിയത്. അപകടത്തിന് തൊട്ടുമുമ്പ് ആ മേഖലയിൽ മോശം കാലാവസ്ഥയായിരുന്നുവെന്നും സൂചനയുണ്ട്. ഫെഡറൽ അധികൃതർ സംഭവത്തിൽ വിശദമായ അന്വേഷണം ആരംഭിച്ചിരിക്കുകയാണ്. പിക്കിൾബോൾ ലോകത്തിന് വലിയൊരു നഷ്ടമാണ് ഈ അപകടം വരുത്തിവെച്ചിരിക്കുന്നത്. തകരാറിലായ വിമാനത്തിലെ എമർജൻസി ലോക്കേറ്റർ ഉപകരണം അപകടസൂചന പുറപ്പെടുവിച്ചതായി ആ മേഖലയിലുണ്ടായിരുന്ന ഒരു പൈലറ്റ് സ്ഥിരീകരിച്ചിട്ടുണ്ട്.
തുടർന്ന് കൺട്രോളർ 911-ൽ വിളിച്ച് വിവരമറിയിച്ചു. അപകടത്തിന് തൊട്ടുമുമ്പ് ന്യൂ ബ്രൗൺഫെൽസ് മേഖലയിൽ ആകാശം മേഘാവൃതമായിരുന്നുവെന്നും രണ്ട് മണിക്കൂറിന് ശേഷം അവിടെ ഇടിമിന്നലോടു കൂടിയ മഴയുണ്ടായതായും നാഷണൽ വെതർ സർവീസ് അറിയിച്ചു. ഏകദേശം 3,000 ജനസംഖ്യയുള്ള വിംബർലിയും 1,16,000 ജനസംഖ്യയുള്ള ന്യൂ ബ്രൗൺഫെൽസും ടെക്സസ് ഹിൽ കൺട്രിയിലെ പ്രധാന വിനോദസഞ്ചാര കേന്ദ്രങ്ങളാണ്.