കൊച്ചി: എറണാകുളം കരിമുകളില് നിന്ന് ചൊവ്വാഴ്ച കാണാതായ പതിമൂന്നുകാരിയെ ഇനിയും കണ്ടെത്താനായില്ല. കരിമുകള് സ്വദേശി അഫ്സലിന്റെ മകള് ഫാത്തിമത്തൂല് നിഹാലയെ ചൊവ്വാഴ്ച അര്ദ്ധരാത്രിയോടെയാണ് വീട്ടില് നിന്ന് കാണാതായത്. ദിവസങ്ങള് പിന്നിട്ടിട്ടും കുട്ടിയെക്കുറിച്ച് കൃത്യമായ വിവരങ്ങളൊന്നും ലഭിക്കാത്തത് അന്വേഷണ സംഘത്തിന് വലിയ വെല്ലുവിളിയായി മാറിയിരിക്കുകയാണ്.
രാത്രി വൈകിയും മൊബൈല് ഫോണ് ഉപയോഗിക്കുന്നതിനെച്ചൊല്ലി വീട്ടില് ഉണ്ടായ ചെറിയ തര്ക്കമാണ് കുട്ടിയെ വീടുവിടാന് പ്രേരിപ്പിച്ചതെന്നാണ് പ്രാഥമിക നിഗമനം. മൊബൈല് ഫോണ് ഉപയോഗം സംബന്ധിച്ച് വീട്ടുകാര് കുട്ടിയെ ശകാരിക്കുകയും മാതാവ് ഫോണ് വാങ്ങി വെക്കുകയും ചെയ്തിരുന്നു. ഇതില് പ്രകോപിതയായാകാം നിഹാല രാത്രിയില് ഇറങ്ങിപ്പോയതെന്ന് കരുതപ്പെടുന്നു. ജോലി കഴിഞ്ഞ് അര്ദ്ധരാത്രി 12 മണിയോടെ അച്ഛന് വീട്ടിലെത്തിയപ്പോഴാണ് വീടിന്റെ മുന്വാതിലും ഗേറ്റും തുറന്നു കിടക്കുന്നത് ശ്രദ്ധയില്പ്പെട്ടത്. തുടര്ന്ന് നടത്തിയ പരിശോധനയിലാണ് മകളെ കാണാനില്ലെന്ന ഞെട്ടിക്കുന്ന വിവരം കുടുംബം തിരിച്ചറിയുന്നത്.
അമ്പലമേട് പോലീസ് കേസെടുത്ത് അന്വേഷണം ഊര്ജിതമാക്കിയിട്ടുണ്ട്. കുട്ടിയുടെ സഞ്ചാരപഥം കണ്ടെത്താനായി പരിസരപ്രദേശങ്ങളിലെ സിസിടിവി ദൃശ്യങ്ങള് പോലീസ് ശേഖരിച്ചു വരികയാണ്. നിഹാല കരിമുകള് ജംഗ്ഷന് വരെ എത്തുന്ന ദൃശ്യങ്ങള് പോലീസിന് ലഭിച്ചിട്ടുണ്ട്. എന്നാല് അവിടെ നിന്ന് കുട്ടി എങ്ങോട്ടാണ് പോയതെന്ന കാര്യത്തില് ഇപ്പോഴും വ്യക്തതയില്ല. വസ്ത്രങ്ങള് അടങ്ങിയ ഒരു ബാഗ് കൈവശം കരുതിയാണ് നിഹാല വീടുവിട്ടിറങ്ങിയത്. കാണാതാകുമ്പോള് പച്ച ടീഷര്ട്ടും പാന്റുമാണ് വേഷം.
നാട്ടുകാരും പോലീസും സംയുക്തമായി വ്യാപകമായ തിരച്ചില് നടത്തുന്നുണ്ടെങ്കിലും ഇതുവരെ കുട്ടിയെ കണ്ടെത്താന് സാധിച്ചിട്ടില്ല. റെയില്വേ സ്റ്റേഷനുകള്, ബസ് സ്റ്റാന്ഡുകള് എന്നിവിടങ്ങളിലും അയല് ജില്ലകളിലും പോലീസ് വിവരം കൈമാറിയിട്ടുണ്ട്. നിഹാലയെക്കുറിച്ച് എന്തെങ്കിലും വിവരം ലഭിക്കുന്നവര് ഉടന് തന്നെ അടുത്തുള്ള പോലീസ് സ്റ്റേഷനിലോ കണ്ട്രോള് റൂമിലോ അറിയിക്കണമെന്ന് അധികൃതര് അഭ്യര്ത്ഥിച്ചു. ഒരു പിഞ്ചുബാലിക അര്ദ്ധരാത്രിയില് നഗരത്തിന്റെ തിരക്കുകളിലേക്ക് തനിയെ പോയത് വലിയ സുരക്ഷാ ആശങ്കകള്ക്കും വഴിമാറുകയാണ്.