കണ്ണൂര്: നിയമസഭാ തെരഞ്ഞെടുപ്പില് യുഡിഎഫ് മികച്ച വിജയം നേടുമെന്ന് കെപിസിസി അധ്യക്ഷന് സണ്ണി ജോസഫ്. വോട്ടെണ്ണലിന് മുന്നോടിയായി കണ്ണൂരില് മാധ്യമങ്ങളോട് സംസാരിക്കുകയായിരുന്നു അദ്ദേഹം. ഇത്തവണ മികച്ച പോളിംഗ് നടന്നത് യുഡിഎഫിന് അനുകൂലമാകുമെന്നും നല്ലൊരു വിജയം പാര്ട്ടി പ്രതീക്ഷിക്കുന്നുണ്ടെന്നും അദ്ദേഹം പറഞ്ഞു.
'എത്ര സീറ്റുകള് ലഭിക്കുമെന്ന് ഞാന് ഇപ്പോള് പറയുന്നില്ല. പക്ഷെ സര്ക്കാര് രൂപീകരിക്കാനുള്ള ഭൂരിപക്ഷം യുഡിഎഫിന് ലഭിക്കുമെന്ന് ഉറപ്പാണ്. പേരാവൂരില് ശക്തമായ മത്സരമാണ് ഇത്തവണ നടന്നത്. അവിടെ പതിനായിരം വോട്ടിന്റെ ഭൂരിപക്ഷം ലഭിക്കുമെന്ന് തെരഞ്ഞെടുപ്പ് സമയത്ത് പറഞ്ഞിരുന്നു. പ്രചാരണ സമയത്ത് ആത്മവിശ്വാസം കുറയ്ക്കുന്ന രീതിയില് സംസാരിക്കാന് കഴിയില്ലല്ലോ,' സണ്ണി ജോസഫ് വ്യക്തമാക്കി.
ഭാവിയിലെ സ്ഥാനമാനങ്ങളെക്കുറിച്ചുള്ള ചോദ്യത്തിന്, തനിക്ക് മുഖ്യമന്ത്രിയാകാന് യാതൊരു മോഹവുമില്ലെന്ന് അദ്ദേഹം കൂട്ടിച്ചേര്ത്തു. പാര്ട്ടി ഏല്പ്പിച്ച ഉത്തരവാദിത്തങ്ങള് ഭംഗിയായി നിറവേറ്റാനാണ് താന് ശ്രമിക്കുന്നതെന്നും അദ്ദേഹം പറഞ്ഞു. പേരാവൂരിലെ പോളിംഗ് കണക്കുകള് അനുകൂലമാണെന്നും മണ്ഡലത്തില് വിജയമുറപ്പാണെന്നും അദ്ദേഹം ആത്മവിശ്വാസം പ്രകടിപ്പിച്ചു.