വടക്കഞ്ചേരി: ഭര്ത്താവിനെയും പിഞ്ചുമക്കളെയും ഉപേക്ഷിച്ച് യുവാവിനൊപ്പം ഒളിച്ചോടിയ യുവതിയെയും കാമുകനെയും കന്യാകുമാരിയില് നിന്ന് പോലീസ് പിടികൂടി. കോരഞ്ചിറ സ്വദേശി ജിന്റോ കുര്യാക്കോസിനെ (29) വടക്കഞ്ചേരി പോലീസ് അറസ്റ്റ് ചെയ്തു. വീട്ടില് നിന്ന് സ്വര്ണ്ണവും പണവും കവര്ന്നതുമായി ബന്ധപ്പെട്ട് മോഷണത്തെ കേസും രജിസ്റ്റര് ചെയ്തിട്ടുണ്ട്.
കഴിഞ്ഞ ഏപ്രില് 24-നാണ് കേസിനാസ്പദമായ സംഭവം നടന്നത്. ക്ഷേത്രത്തില് പോകുന്നു എന്ന് പറഞ്ഞ് വീട്ടില് നിന്നിറങ്ങിയ യുവതി തിരികെ എത്താതിരുന്നതിനെത്തുടര്ന്ന് ബന്ധുക്കള് പോലീസില് പരാതി നല്കുകയായിരുന്നു. സൈബര് സെല്ലിന്റെ സഹായത്തോടെ നടത്തിയ അന്വേഷണത്തില് ഇവര് ആദ്യം ഇടുക്കിയിലേക്കും പിന്നീട് കന്യാകുമാരിയിലേക്കും കടന്നതായി പോലീസ് കണ്ടെത്തി. പ്രതിയുടെ സുഹൃത്തുക്കളെ കേന്ദ്രീകരിച്ച് നടത്തിയ നീക്കത്തിനൊടുവിലാണ് കന്യാകുമാരിയിലെ ഒളിസങ്കേതത്തില് നിന്ന് പോലീസ് സംഘം ഇവരെ കസ്റ്റഡിയിലെടുത്തത്.
പ്രണയം നടിച്ച് യുവാവ് യുവതിയെ വീട്ടില് നിന്നും ഇറങ്ങാന് പ്രേരിപ്പിക്കുകയായിരുന്നുവെന്ന് പോലീസ് പറഞ്ഞു. യുവതിക്ക് വിവാഹ സമ്മാനമായി ലഭിച്ച 30 പവനിലധികം സ്വര്ണം പലപ്പോഴായി യുവാവ് കൈക്കലാക്കിയിരുന്നതായി പരാതിയുണ്ട്. കൂടാതെ, ബാങ്കില് നിക്ഷേപിക്കാനായി ഭര്ത്താവ് നല്കിയ രണ്ടര ലക്ഷം രൂപയും വീട്ടിലുണ്ടായിരുന്ന ഏഴര പവന് സ്വര്ണ്ണവുമായാണ് യുവതി ഒളിച്ചോടിയത്. സ്വര്ണ്ണം മോഷ്ടിച്ചതുമായി ബന്ധപ്പെട്ട് ജിന്റോയ്ക്കെതിരെ മോഷണക്കുറ്റവും ചുമത്തിയിട്ടുണ്ട്.
ആലത്തൂര് ഡിവൈഎസ്പി കെ.ജെ. ജോണ്സന്റെ മേല്നോട്ടത്തില് വടക്കഞ്ചേരി സിഐ എം.പി. എബി, എസ്ഐ പി.സി. സനീഷ് എന്നിവരുടെ നേതൃത്വത്തിലുള്ള സംഘമാണ് അന്വേഷണത്തിന് നേതൃത്വം നല്കിയത്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.