ലേ: ലഡാക്ക് കേന്ദ്രഭരണ പ്രദേശത്തിന്റെ ഭരണനിര്വ്വഹണ രംഗത്ത് വിപ്ലവകരമായ മാറ്റങ്ങള് ലക്ഷ്യമിട്ട് അഞ്ച് പുതിയ ജില്ലകള് കൂടി പ്രഖ്യാപിച്ചു. ലഡാക്ക് ലെഫ്റ്റനന്റ് ഗവര്ണര് വിനയ് കുമാര് സക്സേനയാണ് ഈ ചരിത്രപരമായ തീരുമാനം ഔദ്യോഗികമായി അറിയിച്ചത്. ഇതോടെ ലഡാക്കിലെ ആകെ ജില്ലകളുടെ എണ്ണം രണ്ടില് നിന്ന് ഏഴായി ഉയര്ന്നു. നിലവിലുണ്ടായിരുന്ന ലേ, കാര്ഗില് എന്നീ ജില്ലകള്ക്ക് പുറമെ നുബ്ര (Nubra), ഷാം (Sham), ചാങ്താങ് (Changthang), സാന്സ്കര് (Zanskar), ദ്രാസ് (Drass) എന്നിവയാണ് പുതുതായി രൂപീകരിച്ച ജില്ലകള്.
ലഡാക്കിലെ ജനങ്ങള് ദീര്ഘകാലമായി ഉന്നയിച്ചിരുന്ന ആവശ്യത്തിനാണ് ഇപ്പോള് പരിഹാരമായിരിക്കുന്നത്. 2024 ഓഗസ്റ്റില് കേന്ദ്ര ആഭ്യന്തര മന്ത്രാലയം നല്കിയ പ്രാഥമിക അംഗീകാരത്തിന് പിന്നാലെയാണ് ഇപ്പോള് അന്തിമ വിജ്ഞാപനം പുറത്തിറങ്ങിയത്. പ്രധാനമന്ത്രി നരേന്ദ്ര മോദിയുടെയും ആഭ്യന്തര മന്ത്രി അമിത് ഷായുടെയും ദീര്ഘവീക്ഷണമാണ് ലഡാക്കിന്റെ വികസനക്കുതിപ്പിന് ആക്കം കൂട്ടുന്ന ഈ തീരുമാനത്തിന് പിന്നിലെന്ന് ലെഫ്റ്റനന്റ് ഗവര്ണര് വ്യക്തമാക്കി.
ഭരണപരമായ വികേന്ദ്രീകരണമാണ് പുതിയ ജില്ലകളുടെ രൂപീകരണത്തിലൂടെ ലക്ഷ്യമിടുന്നത്. ലഡാക്കിന്റെ ഭൂമിശാസ്ത്രപരമായ പ്രത്യേകതകള് പരിഗണിക്കുമ്പോള്, വിദൂര പ്രദേശങ്ങളില് താമസിക്കുന്നവര്ക്ക് സര്ക്കാര് സേവനങ്ങള് എത്തിക്കുന്നതിലെ കാലതാമസം ഒഴിവാക്കാന് ഈ നീക്കം സഹായിക്കും. പുതിയ ജില്ലാ ആസ്ഥാനങ്ങള് നിലവില് വരുന്നതോടെ ഭരണനിര്വ്വഹണം കൂടുതല് കാര്യക്ഷമമാവുകയും പ്രാദേശിക തലത്തില് പുതിയ തൊഴിലവസരങ്ങള് സൃഷ്ടിക്കപ്പെടുകയും ചെയ്യും. കൂടാതെ, അടിസ്ഥാന സൗകര്യ വികസനത്തിനും പ്രാദേശിക ഭരണകൂടങ്ങളെ ശക്തിപ്പെടുത്തുന്നതിനും പുതിയ ജില്ലകള് വഴിയൊരുക്കും.
86,904 ചതുരശ്ര കിലോമീറ്റര് വിസ്തീര്ണ്ണമുള്ള ലഡാക്ക് ഇന്ത്യയിലെ ഏറ്റവും വലിയ കേന്ദ്രഭരണ പ്രദേശമാണെങ്കിലും ജനസംഖ്യയില് ഏറെ പിന്നിലാണ്. 2019 ഓഗസ്റ്റ് 5-ന് ആര്ട്ടിക്കിള് 370 റദ്ദാക്കിയതിനെത്തുടര്ന്നാണ് ജമ്മു കശ്മീരില് നിന്ന് വേര്പെടുത്തി ലഡാക്കിനെ പ്രത്യേക കേന്ദ്രഭരണ പ്രദേശമാക്കിയത്. കേന്ദ്ര ആഭ്യന്തര മന്ത്രാലയത്തിന്റെ നേരിട്ടുള്ള നിയന്ത്രണത്തിലുള്ള ഈ പ്രദേശത്തിന്റെ ശോഭനമായ ഭാവിയിലേക്കുള്ള നിര്ണ്ണായക ചുവടുവെപ്പാണ് ഈ പുതിയ ജില്ലാ രൂപീകരണമെന്ന് ലെഫ്റ്റനന്റ് ഗവര്ണര് കൂട്ടിച്ചേര്ത്തു. ലഡാക്കിലെ ഓരോ പൗരനും ഈ തീരുമാനത്തിന്റെ ഗുണഫലങ്ങള് ലഭ്യമാകുമെന്ന് അദ്ദേഹം ഉറപ്പുനല്കി.