ലേ: ലഡാക്കിനെ സജീവ ധർമ്മത്തിന്റെ ഭൂമിയെന്ന് വിശേഷിപ്പിച്ച് കേന്ദ്ര ആഭ്യന്തര മന്ത്രി അമിത് ഷാ. 75 വർഷത്തെ ഇടവേളയ്ക്ക് ശേഷം ബുദ്ധഭഗവാന്റെ പവിത്രമായ തിരുശേഷിപ്പുകൾ ഹിമാലയൻ മേഖലയിലേക്ക് തിരിച്ചെത്തിയത് ചരിത്രപരമായ പുനഃസമാഗമമാണെന്നും അദ്ദേഹം പറഞ്ഞു. ലേയിലെ ജിവെത്സലിൽ നടന്ന തഥാഗത ബുദ്ധ പ്രദർശനവും ബുദ്ധപൂർണിമ ആഘോഷങ്ങളും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
2,500 വർഷങ്ങൾക്ക് മുമ്പ് ബുദ്ധൻ നൽകിയ സമാധാനത്തിന്റെയും കരുണയുടെയും മാനവികതയുടെയും സന്ദേശം നൂറ്റാണ്ടുകൾക്ക് മുമ്പത്തെക്കാൾ ഇന്ന് ഏറെ പ്രധാനമാണെന്ന് അമിത് ഷാ ഓർമ്മിപ്പിച്ചു. ബുദ്ധമതം പ്രതിസന്ധികളെ നേരിട്ടപ്പോഴെല്ലാം ലഡാക്കും ഇവിടുത്തെ ജനങ്ങളും ബുദ്ധന്റെ പഠിപ്പിക്കലുകളെ സംരക്ഷിക്കാൻ നിലകൊണ്ടിട്ടുണ്ടെന്നും അദ്ദേഹം കൂട്ടിച്ചേർത്തു. ലഡാക്ക് ബുദ്ധസംസ്കാരത്തിന്റെയും കരുണയുടെയും ജീവനുള്ള ലബോറട്ടറിയാണെന്ന ദലൈലാമയുടെ വാക്കുകളും അദ്ദേഹം പ്രസംഗത്തിൽ അനുസ്മരിച്ചു.
തിരുശേഷിപ്പുകളുടെ വരവ് ലഡാക്കിലെ ജനങ്ങൾക്ക് വലിയ ഭാഗ്യമാണെന്നും ഇതിൽ നിന്ന് ആത്മീയ ഊർജ്ജം ഉൾക്കൊള്ളാൻ എല്ലാവർക്കും സാധിക്കുമെന്നും അദ്ദേഹം പ്രത്യാശ പ്രകടിപ്പിച്ചു. പവിത്രമായ ഈ ശേഷിപ്പുകൾ ദർശിക്കാൻ ലഡാക്കിലെ ജനങ്ങൾക്ക് തടസ്സമില്ലാത്ത സൗകര്യങ്ങൾ ഒരുക്കണമെന്ന് അദ്ദേഹം ഭരണകൂടത്തോട് അഭ്യർത്ഥിച്ചു. "അറിവ് ഉൾക്കൊള്ളുകയും അത് സ്വന്തം ജീവിതത്തിന്റെ ഭാഗമാക്കുകയും ചെയ്യാതെ മോക്ഷം സാധ്യമല്ല. ആത്മീയ പരിശീലനമില്ലാത്ത അറിവ് അപൂർണ്ണമാണ്, അറിവില്ലാത്ത ആത്മീയ പരിശീലനം അന്ധവുമാണ്," എന്ന് അമിത് ഷാ പറഞ്ഞു.
ധാർമ്മിക അച്ചടക്കമാണ് ജ്ഞാനമുള്ള ജീവിതത്തിന്റെ അടിസ്ഥാനമെന്നും അദ്ദേഹം വ്യക്തമാക്കി. ഇന്ത്യയിൽ ഉത്ഭവിച്ച ബുദ്ധമത പഠിപ്പിക്കലുകൾ ചൈനയിലേക്കും മറ്റ് രാജ്യങ്ങളിലേക്കും വ്യാപിച്ചത് ലഡാക്കിലൂടെയും പരിസര പാതകളിലൂടെയുമാണെന്നും, സഹവർത്തിത്വത്തിന്റെ സന്ദേശം ലഡാക്കിനെപ്പോലെ വൈവിധ്യമുള്ള പ്രദേശങ്ങളിൽ എന്നും പ്രസക്തമാണെന്നും അദ്ദേഹം കൂട്ടിച്ചേർത്തു.