മുംബൈ: സോഷ്യൽ മീഡിയയിൽ വൈറലാകാൻ വേണ്ടി പൊതുജനങ്ങളുടെയും സ്വന്തം ജീവന്റെയും സുരക്ഷ അവഗണിക്കുന്നവർക്ക് ഒരു മുന്നറിയിപ്പായി മുംബൈയിൽ നിന്നൊരു വാർത്ത. തന്റെ 33-ാം പിറന്നാൾ ആഘോഷിക്കുന്നതിന്റെ ഭാഗമായി റോഡിൽ പെട്രോളൊഴിച്ച് തീയിട്ട് റീൽസ് ചിത്രീകരിച്ച 33-കാരനെ പോലീസ് അറസ്റ്റ് ചെയ്തു. ജോഗേശ്വരി സ്വദേശിയായ ഒരു കാർ ഡീലറാണ് ഈ അപകടകരമായ പ്രവൃത്തിയുടെ പേരിൽ പിടിയിലായത്.
മുംബൈ ഗോരേഗാവ് വെസ്റ്റിലെ സൺടെക് സിറ്റി ഫോർത്ത് അവന്യൂവിന് മുന്നിലെ എം.എം.ആർ.ഡി.എ റോഡിലായിരുന്നു സംഭവം. റോഡിൽ പെട്രോളുപയോഗിച്ച് '33' എന്ന അക്കത്തിന്റെ ആകൃതിയിൽ വരച്ച ശേഷം ഇയാൾ അതിലേക്ക് തീപ്പെട്ടിക്കൊള്ളി ഇട്ട് തീകൊളുത്തുകയായിരുന്നു. റോഡിലെ നാല് ഭാഗങ്ങളിലും തീ പടരുകയും ടാർ റോഡിന് നാശനഷ്ടങ്ങൾ സംഭവിക്കുകയും ചെയ്തു. തൊട്ടടുത്ത് തന്നെ നിരവധി വാഹനങ്ങൾ പാർക്ക് ചെയ്തിരുന്നു എന്നതും അപകടത്തിന്റെ വ്യാപ്തി വർദ്ധിപ്പിച്ചു. തലനാരിഴയ്ക്കാണ് വലിയൊരു ദുരന്തം ഒഴിവായത്.
തീകൊളുത്തിയ ശേഷം കാറിൽ കയറി ഇയാൾ കൂളായി പോകുന്ന ദൃശ്യങ്ങൾ സോഷ്യൽ മീഡിയയിൽ പ്രചരിച്ചതോടെ വലിയ രീതിയിലുള്ള പ്രതിഷേധമാണ് ഉയർന്നത്. റീലുകൾക്ക് വേണ്ടി ഇത്രയും തരംതാഴ്ന്ന പ്രവർത്തികൾ ചെയ്യുന്നവർക്കെതിരെ കർശന നടപടി വേണമെന്ന് സോഷ്യൽ മീഡിയയിൽ മുറവിളി ഉയർന്നു.
വീഡിയോ വൈറലായതിന് പിന്നാലെ മുംബൈ പോലീസ് ഇയാളെ തിരിച്ചറിയുകയും അറസ്റ്റ് രേഖപ്പെടുത്തുകയും ചെയ്തു. പൊതുസമാധാനത്തിന് ഭംഗം വരുത്തുക, അപകടകരമായ രീതിയിൽ സ്ഫോടകവസ്തുക്കളോ തീയോ കൈകാര്യം ചെയ്യുക തുടങ്ങിയ വകുപ്പുകൾ പ്രകാരമാണ് ഇയാൾക്കെതിരെ നടപടി സ്വീകരിച്ചിരിക്കുന്നത്. ടൈംസ് ഓഫ് ഇന്ത്യയാണ് വാർത്ത റിപ്പോർട്ട് ചെയ്തിരിക്കുന്നത്.
റീലുകൾക്ക് വേണ്ടി സ്വന്തം ജീവനും മറ്റുള്ളവരുടെ സ്വത്തും അപകടത്തിലാക്കുന്ന പ്രവണത വർദ്ധിച്ചുവരുന്ന സാഹചര്യത്തിൽ ഈ അറസ്റ്റ് വലിയൊരു സന്ദേശമാണ് നൽകുന്നത്. ഇയാൾക്കെതിരെ മാതൃകാപരമായ ശിക്ഷ നൽകണമെന്നാണ് ഭൂരിഭാഗം ആളുകളുടെയും ആവശ്യം.