തൃശൂര്: ആചാരപ്പെരുമ ഒട്ടും ചോരാതെ തൃശൂര് പൂരത്തിന്റെ വിസ്മയക്കാഴ്ചയായ കുടമാറ്റം കണ്നിറയെ കണ്ട് പൂരപ്രേമികള്. മുണ്ടത്തിക്കോട് വെടിക്കെട്ട് പുരയിലുണ്ടായ ദുരന്തത്തിന്റെ പശ്ചാത്തലത്തില് പൂരപ്രേമികളുടെ ഹൃദയമിടിപ്പായ വെടിക്കെട്ട് ഇക്കുറി ഒഴിവാക്കിയെങ്കിലും, തേക്കിന്കാട് മൈതാനത്തെ ജനസാഗരത്തെ സാക്ഷിനിര്ത്തി നടന്ന കുടമാറ്റം വര്ണ്ണാഭമായ ചടങ്ങായി മാറി. സുരക്ഷാ ക്രമീകരണങ്ങളുടെയും ദുരന്തത്തിന്റെ വേദനയുടെയും പശ്ചാത്തലത്തില് ഒന്നര മണിക്കൂറോളം നീണ്ടുനില്ക്കാറുള്ള കുടമാറ്റം ഇത്തവണ വെറും 15 മിനിറ്റിലാക്കി ചുരുക്കിയിരുന്നു. എങ്കിലും, ചുരുങ്ങിയ സമയത്തിനുള്ളില് വിസ്മയകരമായ വര്ണ്ണക്കുടകള് മാറിമാറി ഉയര്ത്തി തിരുവമ്പാടി-പാറമേക്കാവ് ദേവസ്വങ്ങള് തങ്ങളുടെ വിസ്മയക്കാഴ്ചകള് പൂരപ്രേമികള്ക്ക് മുന്നില് കാഴ്ചവച്ചു.
വൈകുന്നേരം അഞ്ചുമണിയോടെ ഇലഞ്ഞിത്തറ മേളം കലാശിച്ചതിന് പിന്നാലെയാണ് കുടമാറ്റത്തിനുള്ള ഒരുക്കങ്ങള് ആരംഭിച്ചത്. പാറമേക്കാവ് വിഭാഗം ആദ്യം തെക്കോട്ടിറങ്ങി ശക്തന് പ്രതിമയെ വലംവെച്ച് നിലയുറപ്പിച്ചു. തൊട്ടുപിന്നാലെ തിരുവമ്പാടി വിഭാഗവും തെക്കോട്ടിറങ്ങി പാറമേക്കാവിന് അഭിമുഖമായി അണിനിരന്നു. കൃത്യം ആറുമണിയോടെ പൂരപ്രേമികളുടെ ഹര്ഷാരവങ്ങള്ക്കിടയില് വര്ണ്ണക്കുടകള് വാനിലുയര്ന്നു. സമയം കുറവായതിനാല് തന്നെ അതീവ വേഗത്തിലാണ് ഇരുവിഭാഗവും പുതിയ കുടകള് ഉയര്ത്തി മത്സരിച്ചത്. പരമ്പരാഗതമായ വര്ണ്ണക്കുടകള്ക്കൊപ്പം ആകര്ഷകമായ സ്പെഷ്യല് കുടകളും 20 മിനിറ്റോളം നീണ്ടുനിന്ന വിസ്മയത്തില് മിന്നിമറഞ്ഞു.
കുടമാറ്റം അവസാനിച്ചതോടെ പൂരനഗരി ഇനി രാത്രി പൂരത്തിനായുള്ള കാത്തിരിപ്പിലാണ്. വെടിക്കെട്ട് പുര അപകടത്തിന്റെ പശ്ചാത്തലത്തില് ഇത്തവണ വെടിക്കെട്ട് ഒഴിവാക്കി ആചാരപരമായ കതിന മുഴക്കല് മാത്രമാണ് ഉണ്ടാവുക. പുലര്ച്ചെ വെടിക്കെട്ട് നടക്കേണ്ട സമയത്ത് ഇരുവിഭാഗവും ഓരോ കതിന വീതം മുഴക്കി ആചാരം പൂര്ത്തിയാക്കും. പൂരത്തിന്റെ പകിട്ടിലും ആഘോഷങ്ങളിലും നിയന്ത്രണങ്ങള് ഉണ്ടായിരുന്നിട്ടും, വാദ്യവിസ്മയങ്ങളിലും ഗജപ്രൗഡിയിലും അലിഞ്ഞുചേര്ന്ന പതിനായിരക്കണക്കിന് ആളുകളാണ് തൃശൂര് നഗരത്തില് തടിച്ചുകൂടിയിരിക്കുന്നത്.
രാവിലെ കണിമംഗലം ശാസ്താവ് പൂരനഗരിയിലേക്ക് എഴുന്നള്ളിയതോടെയാണ് പൂരം ഔദ്യോഗികമായി കൊട്ടിക്കയറിയത്. പത്മശ്രീ പെരുവനം കുട്ടന്മാരാരും കിഴക്കൂട്ട് അനിയന് മാരാരും ഉള്പ്പെടെയുള്ള പ്രഗത്ഭരായ കലാകാരന്മാരുടെ മേളവിസ്മയങ്ങള് ഇത്തവണയും പൂരത്തിന് മാറ്റ് കൂട്ടി. കിഴക്കൂട്ട് അനിയന് മാരാര് നാലാം തവണയാണ് ഇലഞ്ഞിത്തറ മേളത്തിന് പ്രമാണിയായത്. വെടിക്കെട്ട് ദുരന്തത്തിന്റെ വേദനയുള്ളിലൊതുക്കി ഓരോ പൂരപ്രേമിയും തൃശൂര് പൂരത്തെ തങ്ങളുടെ ഹൃദയത്തോട് ചേര്ത്തുപിടിക്കുന്ന കാഴ്ചയാണ് തേക്കിന്കാട് മൈതാനത്ത് കാണുന്നത്. പകലത്തെ എഴുന്നള്ളത്തുകള് ആവര്ത്തിക്കുന്ന രാത്രി പൂരത്തിന് ശേഷം നാളെ ഉച്ചയോടെ ഉപചാരം ചൊല്ലി പിരിയുന്നതോടെ ഈ വര്ഷത്തെ തൃശൂര് പൂരത്തിന് സമാപനമാകും.
ആരവത്തിലും പകിട്ടിലും അല്പം കുറവെങ്കിലും പൂരം ചടങ്ങുകള്ക്ക് ഒരു മാറ്റവും ഇല്ലാതെ ഇത്തവണയും തൃശ്ശൂര് പൂരം പൂരപ്രേമികളുടെ മനം കവര്ന്നു. കണിമംഗലം ശാസ്താവ് പൂരനഗരിയിലേക്ക് പുറപ്പെട്ടതോടെയാണ് തൃശൂര് പൂരദിനത്തിലേക്ക് ഉണര്ന്നത്.വലിയാലുക്കല് കുട്ടിശങ്കരനാണ് കോലമേറ്റിയത്. ജിതിന് കല്ലാറ്റ് ആയിരുന്നു മേളപ്രമാണി. പിന്നാലെ പനമുക്കംപിള്ളി ശാസ്താവും വടക്കുംനാഥനിലെത്തി. തൊട്ടുപിന്നാലെ ഘടകപൂരങ്ങളുമെത്തി. പെരുമ്പളം ശരത് ആയിരുന്നു മേളപ്രമാണി. പൂര പ്രേമികള് കാത്തിരുന്ന ചെമ്പുക്കാവിന്റെ വരവായിരുന്നു പിന്നീട്. തെച്ചിക്കോട്ടുകാവ് രാമചന്ദ്രന് ആയിരുന്നു തിടമ്പേറ്റിയത്. പാറമേക്കാവ് അഭിഷേക് ആയിരുന്നു മേള പ്രമാണി. കിഴക്കേ നട വഴി വടക്കുംനാഥന് അകത്തു കയറി കയറി തെക്കേ നടവഴി പുറത്തേക്ക് ഇറങ്ങുമ്പോഴേക്കും രാമന് ആരാധകരുടെ ആവേശം ഉച്ചസ്ഥായിയിലായി. ഒന്പത് ആനകളുടെ അകമ്പടിയോടെയാണ് കാരമുക്ക് ഭഗവതി വടക്കുന്നാഥനിലെത്തിയത്. പത്മശ്രീ പെരുവനം കുട്ടന്മാരായിരുന്നു മേള പ്രമാണി. ശങ്കരം കുളങ്ങര ഉദയന് തിടമ്പേറ്റി. ഒന്പത് ആനകളുടെ അകമ്പടിയോടെ ലാലൂര് ഭഗവതി നടുവിലാലില് നിന്ന് ശ്രീമൂല സ്ഥാനത്തേക്ക് കയറി. പാറമേക്കാവ് അര്ജുന് ആയിരുന്നു മേളപ്രമാണി.
പിന്നാലെ പൂരത്തില് ഘടകപൂരങ്ങളില് ഏറ്റവും കൂടുതല് ആനകളെ അണിനിരത്തുന്ന ചൂരക്കോട്ടുകാവ് ഭഗവതിയുടെ വരവായിരുന്നു. പടുവില് രഘുനാഥന്മാരാരുടെ മേളം കലാശിച്ചതിന് പിന്നാലെ പതിമൂന്നാനകളുടെ അകമ്പടിയില് അയ്യന്തോള് ഭഗവതി എത്തി. ചെറുശ്ശേരി കുട്ടന്മാരായിരുന്നു മേള പ്രമാണി. ഒടുവില് പതിനൊന്ന് ആനകളുടെ അകമ്പടിയോടെ നെയ്തലക്കാവ് ഭഗവതിയുടെ ഊഴമായി. ഇതിനിടെ പതിനൊന്നരയോടെ ആരംഭിച്ച തിരുവമ്പാടിയുടെ മഠത്തില് വരവ് പഞ്ചവാദ്യത്തില് പൂരനഗരി അലിഞ്ഞു. ഉച്ചയ്ക്ക് രണ്ടിനാണ് 250 കലാകാരന്മാര് അണി നിരക്കുന്ന ഇലഞ്ഞിത്തറ മേളം ആരംഭിച്ചത്. വൈകിട്ട് നാലരയ്ക്കാണ് ഇലഞ്ഞിത്തറ മേളം കൊട്ടിയവസാനിപ്പിച്ചത്. ഇത് നാലാം തവണയാണ് കിഴക്കൂട്ട് അനിയന് മാരാര് ഇലഞ്ഞിത്തറ മേളത്തിന് പ്രാമാണ്യം വഹിക്കുന്നത്.