തിരുവനന്തപുരം: വാല്പ്പാറ ചുരത്തിലുണ്ടായ ദാരുണമായ വാഹനാപകടത്തില് ജീവന് നഷ്ടപ്പെട്ടവരുടെ കുടുംബങ്ങള്ക്ക് കൈത്താങ്ങുമായി കേരള സര്ക്കാര്. അപകടത്തില് മരിച്ചവരില് ഇന്ഷുറന്സ് പരിരക്ഷ ഇല്ലാത്ത അഞ്ച് പേരുടെ കുടുംബങ്ങള്ക്ക് 10 ലക്ഷം രൂപ വീതം ധനസഹായം നല്കാന് മന്ത്രിസഭാ യോഗം തീരുമാനിച്ചു. മുഖ്യമന്ത്രിയുടെ ദുരിതാശ്വാസ നിധിയില് നിന്നാണ് ഈ തുക അനുവദിക്കുക.
മലപ്പുറം പാങ്ങ് ഗവണ്മെന്റ് എല്പി സ്കൂളിലെ അധ്യാപകരും ജീവനക്കാരും സഞ്ചരിച്ച വാന് അപകടത്തില്പ്പെട്ടതിനെത്തുടര്ന്ന് 10 പേര്ക്കാണ് ജീവന് നഷ്ടമായത്. ഇതില് സര്ക്കാര് ജീവനക്കാരായ അധ്യാപകര്ക്ക് ഗ്രൂപ്പ് ഇന്ഷുറന്സ് ഉള്പ്പെടെയുള്ള മറ്റ് ആനുകൂല്യങ്ങള്ക്ക് അര്ഹതയുണ്ട്. എന്നാല്, യാതൊരുവിധ ഇന്ഷുറന്സ് പരിരക്ഷയോ സാമ്പത്തിക സുരക്ഷയോ ഇല്ലാത്ത കുടുംബങ്ങളെ സഹായിക്കാനാണ് സര്ക്കാര് പ്രത്യേക ധനസഹായം പ്രഖ്യാപിച്ചത്. അപകടത്തില് മരിച്ച സ്കൂള് പാചകക്കാരി, ഡ്രൈവര് എന്നിവരടക്കമുള്ള അഞ്ച് പേരുടെ ആശ്രിതര്ക്കാണ് ഈ തുക ലഭിക്കുക.
കഴിഞ്ഞ ഏപ്രില് 17-നാണ് കേരളത്തെ നടുക്കിയ വാല്പ്പാറ ദുരന്തം ഉണ്ടായത്. വാല്പ്പാറ-പൊള്ളാച്ചി ചുരം പാതയിലെ 13-ാം ഹെയര്പിന് വളവില് വെച്ച് നിയന്ത്രണം വിട്ട വിനോദസഞ്ചാര വാന് 300 അടി താഴ്ചയിലേക്ക് മറിയുകയായിരുന്നു. എട്ട് പേര് സംഭവസ്ഥലത്തും പിന്നീട് രണ്ട് പേര് ചികിത്സയിലിരിക്കെയുമാണ് മരിച്ചത്. സ്കൂള് അവധിക്കാലത്ത് അധ്യാപകരും കുടുംബാംഗങ്ങളും ചേര്ന്ന് നടത്തിയ സ്വകാര്യ വിനോദയാത്രയ്ക്കിടെയായിരുന്നു ഈ ദാരുണ സംഭവം.
ദുരന്തം നടന്ന് രണ്ടാഴ്ച പിന്നിട്ടിട്ടും ഇരകള്ക്ക് ധനസഹായം പ്രഖ്യാപിക്കാത്തതില് പ്രതിപക്ഷ നേതാവ് വി.ഡി സതീശന് ഉള്പ്പെടെയുള്ളവര് സര്ക്കാരിനെതിരെ രംഗത്തെത്തിയിരുന്നു. അപകടത്തില് മരിച്ച അബ്ദുല് മജീദ് ഉള്പ്പെടെയുള്ളവരുടെ കുടുംബങ്ങള് നേരിടുന്ന കടുത്ത സാമ്പത്തിക പ്രതിസന്ധി ചൂണ്ടിക്കാട്ടിയായിരുന്നു പ്രതിഷേധം. ഇതിന് പിന്നാലെയാണ് മന്ത്രിസഭ അടിയന്തരമായി ധനസഹായം പ്രഖ്യാപിച്ചത്. പരിക്കേറ്റ് ചികിത്സയില് കഴിയുന്നവര്ക്കുള്ള ചികിത്സാ ചെലവുകള് സര്ക്കാര് വഹിക്കുമെന്നും നേരത്തെ അറിയിച്ചിരുന്നു.
മരിച്ചവരുടെ കുടുംബങ്ങളുടെ പുനരധിവാസം ഉറപ്പാക്കാന് ജില്ലാ ഭരണകൂടത്തിന് സര്ക്കാര് നിര്ദ്ദേശം നല്കിയിട്ടുണ്ട്. ധനസഹായം വേഗത്തില് ലഭ്യമാക്കുന്നതിനായുള്ള നടപടികള് മലപ്പുറം ജില്ലാ കളക്ടറുടെ നേതൃത്വത്തില് പൂര്ത്തിയാക്കും.