മുള്ളൻപൂർ: ഐപിഎല്ലിലെ നാൽപ്പതാം മത്സരത്തിൽ ഇന്ന് പഞ്ചാബ് കിങ്സ് രാജസ്ഥാൻ റോയൽസിനെ നേരിടും. നിലവിൽ പോയിന്റ് പട്ടികയിൽ ആധിപത്യം പുലർത്തുന്ന പഞ്ചാബ്, ഏഴ് മത്സരങ്ങളിൽ ആറ് വിജയങ്ങളുമായി തകർപ്പൻ ഫോമിലാണ്. മറുവശത്ത്, സീസൺ തുടക്കത്തിലെ ആവേശം ചോർന്നുപോയ രാജസ്ഥാൻ റോയൽസ് എട്ടു മത്സരങ്ങളിൽ അഞ്ചു ജയങ്ങളുമായി നാലാം സ്ഥാനത്താണ്.
പ്രഭ്സിമ്രാൻ സിങ് - പ്രിയാൻഷ് ആര്യ സഖ്യത്തിന്റെ വെടിക്കെട്ട് ബാറ്റിങ്ങാണ് പഞ്ചാബിന്റെ കുതിപ്പിന് പിന്നിലെ രഹസ്യം. സീസണിൽ ഇതുവരെ 14.9 റൺ റേറ്റിൽ 323 റൺസാണ് ഈ ഓപ്പണിങ് ജോഡി അടിച്ചുകൂട്ടിയത്. ഇതുവരെ മാറ്റങ്ങളില്ലാതെ കളിക്കുന്ന ഏക ടീമും പഞ്ചാബ് തന്നെ. എന്നാൽ, ബോളിങ്ങിലെ പവർപ്ലേ വീഴ്ചകളും ഏറ്റവും കൂടുതൽ ക്യാച്ചുകൾ കൈവിട്ടതുമാണ് (30 ശതമാനം) പഞ്ചാബിനെ അലട്ടുന്ന ഘടകം.
ആദ്യ നാല് മത്സരങ്ങളും ജയിച്ചു തുടങ്ങിയ രാജസ്ഥാൻ അവസാന നാലിൽ മൂന്നിലും പരാജയപ്പെട്ടു. യശസ്വി ജയ്സ്വാളും വൈഭവ് സൂര്യവംശിയും നയിക്കുന്ന ഓപ്പണിങ് സഖ്യം താളം കണ്ടെത്തേണ്ടത് റോയൽസിന് അത്യാവശ്യമാണ്. റിയാൻ പരാഗ്, ഷിമ്രോൺ ഹെറ്റ്മെയർ എന്നിവരുടെ മങ്ങിയ ഫോമും ടീമിന് തലവേദനയാകുന്നു. എങ്കിലും സീസണിലെ ഏറ്റവും മികച്ച പവർപ്ലേ ബോളിങ് റെക്കോർഡ് (20 വിക്കറ്റുകൾ) രാജസ്ഥാന്റെ കരുത്താണ്. ജോഫ്ര ആർച്ചറും നന്ദ്രെ ബർഗറും നയിക്കുന്ന പേസ് നിരയിലാണ് നായകൻ പരാഗിന്റെ പ്രതീക്ഷ.
മുള്ളൻപൂരിലെ പിച്ച് ബാറ്റിങ്ങിന് അനുകൂലമാണ്. 200-ന് മുകളിൽ സ്കോർ പിറക്കാൻ സാധ്യതയുള്ള പിച്ചിൽ ബൗളർമാർക്ക് വേരിയേഷനുകൾ പരീക്ഷിക്കേണ്ടി വരും. ഇതുവരെ കളിച്ച മൂന്ന് ഹോം മാച്ചുകളും വിജയിച്ച പഞ്ചാബിന് മൈതാനത്തെ പരിചയസമ്പത്ത് ഗുണകരമാകും. പഞ്ചാബിനെതിരെ കളിച്ച കണക്കുകളിൽ 17–13 എന്ന വ്യക്തമായ മുൻതൂക്കം രാജസ്ഥാൻ റോയൽസിനുണ്ട്. ഈ മൈതാനത്ത് നടന്ന രണ്ട് മത്സരങ്ങളിലും പഞ്ചാബിനെ തോൽപ്പിക്കാൻ രാജസ്ഥാനായി. എന്നാൽ 2022 മുതൽ ഇരുടീമുകളും തമ്മിൽ ഇഞ്ചോടിഞ്ച് പോരാട്ടമാണ് നടക്കുന്നത്. കഴിഞ്ഞ ഏഴ് മത്സരങ്ങളിൽ നാലിലും റോയൽസ് വിജയിച്ചപ്പോൾ മൂന്ന് തവണ പഞ്ചാബ് വിജയം സ്വന്തമാക്കി.
സാധ്യതാ ഇലവൻ:
പഞ്ചാബ് കിങ്സ്: പ്രഭ്സിമ്രാൻ സിങ്, പ്രിയാൻഷ് ആര്യ, കൂപ്പർ കോണിലി, ശ്രേയസ് അയ്യർ (ക്യാപ്റ്റൻ), ശശാങ്ക് സിങ്, മാർക്കസ് സ്റ്റോയിനിസ്, മാർക്കോ ജാൻസൻ, സേവ്യർ ബാർട്ട്ലെറ്റ്, വൈശാഖ് വിജയ്കുമാർ, അർഷ്ദീപ് സിങ്, യുസ്വേന്ദ്ര ചഹൽ. (ഇംപാക്ട് പ്ലെയർ: നെഹാൽ വധേര).
രാജസ്ഥാൻ റോയൽസ്: യശസ്വി ജയ്സ്വാൾ, ധ്രുവ് ജൂറൽ, റിയാൻ പരാഗ് (ക്യാപ്റ്റൻ), ഷിമ്രോൺ ഹെറ്റ്മെയർ, ഡോണവൻ ഫെരേര, രവീന്ദ്ര ജഡേജ, ജോഫ്ര ആർച്ചർ, തുഷാർ ദേശ്പാണ്ഡെ, നന്ദ്രെ ബർഗർ, ബ്രിജേഷ് ശർമ, രവി ബിഷ്ണോയ്. (ഇംപാക്ട് പ്ലെയർ: വൈഭവ് സൂര്യവംശി).