മുല്ലൻപുർ: പഞ്ചാബ് കിങ്സിനെതിരായ രാജസ്ഥാന്റെ മത്സരത്തിന് ശേഷം മൈതാനത്ത് നടന്ന ചില കാഴ്ചകളാണ് ഇപ്പോൾ സോഷ്യൽ മീഡിയയിൽ ചൂടേറിയ ചർച്ചകൾക്ക് വഴിവെച്ചിരിക്കുന്നത്. പഞ്ചാബ് താരം അർഷ്ദീപ് സിങ്ങിന്റെ കാമുകിയും നടിയുമായ സമ്രീൻ കൗർ 15കാരൻ വൈഭവിനെ ഓടിയെത്തി അഭിനന്ദിച്ചതും തുടർന്നുണ്ടായ സംഭവങ്ങളുമാണ് ആരാധകർക്കിടയിൽ ചിരി പടർത്തുന്നത്. പഞ്ചാബിനെതിരെ 16 പന്തിൽ 43 റൺസുമായി വെടിക്കെട്ട് പ്രകടനം നടത്തിയ വൈഭവിനെ അഭിനന്ദിക്കാൻ നിരവധി പ്രമുഖർ എത്തിയിരുന്നു.
എന്നാൽ അർഷ്ദീപിന്റെ കാമുകി സമ്രീൻ കൗർ വൈഭവിനോട് ഏറെ നേരം സംസാരിക്കുകയും താരത്തിന് ഒരു 'പ്ലേസ്റ്റേഷൻ' സമ്മാനമായി നൽകുകയും ചെയ്തു. തന്റെ കാമുകി മറ്റൊരു ടീമിലെ താരത്തിന് ഇത്രയേറെ പ്രാധാന്യം നൽകുന്നത് കണ്ട് അരികിൽ നിന്ന അർഷ്ദീപിന്റെ മുഖഭാവം ഇപ്പോൾ ട്രോളന്മാരും ഏറ്റെടുത്തു കഴിഞ്ഞു. അതൃപ്തിയോ അതോ കൗതുകമോ എന്ന് തിരിച്ചറിയാൻ കഴിയാത്ത അർഷ്ദീപിന്റെ ആ എക്സ്പ്രഷനാണ് വീഡിയോയിലെ ഹൈലൈറ്റ്.
ഈ സീസണിൽ വെറും 167 പന്തിൽ നിന്ന് 400 റൺസ് തികച്ച വൈഭവ് സൂര്യവംശി, ഐപിഎൽ ചരിത്രത്തിൽ തന്നെ ഏറ്റവും കുറഞ്ഞ പന്തിൽ ഈ നേട്ടം സ്വന്തമാക്കുന്ന താരമായി മാറി. രാജസ്ഥാൻ റോയൽസിനായി റൺവേട്ടയിൽ രണ്ടാം സ്ഥാനത്താണ് ഈ പതിനഞ്ചുകാരൻ. പഞ്ചാബിനെ ഈ സീസണിൽ ആദ്യമായി തോൽപ്പിച്ച ടീം എന്ന ഖ്യാതി രാജസ്ഥാൻ നേടിയപ്പോഴും വൈഭവിന്റെ പോരാട്ടം നിർണ്ണായകമായിരുന്നു.
അർഷ്ദീപ് സിങ്ങും സമ്രീൻ കൗറും പ്രണയത്തിലാണെന്ന അഭ്യൂഹങ്ങൾ നേരത്തെ തന്നെ ശക്തമായിരുന്നു. വിമാനത്താവളങ്ങളിലും സ്റ്റേഡിയങ്ങളിലും ഇരുവരെയും ഒന്നിച്ചു കാണാറുണ്ടെങ്കിലും ഔദ്യോഗികമായ സ്ഥിരീകരണം ഇതുവരെ ഉണ്ടായിട്ടില്ല. എന്നാൽ വൈഭവിനെ അഭിനന്ദിക്കാനെത്തിയ സമ്രീന്റെ പ്രവർത്തിയും അതിനോടുള്ള അർഷ്ദീപിന്റെ പ്രതികരണവും ഈ പ്രണയകഥയ്ക്ക് കൂടുതൽ നിറം പകർന്നിരിക്കുകയാണ്.
അതേസമയം, ഇന്നലെ നടന്ന മത്സരത്തിൽ രാജസ്ഥാനെതിരെ തകർപ്പൻ ജയവുമായി സെമി സാധ്യതകൾ സജീവമാക്കിയിരിക്കുകയാണ് ഡൽഹി. കെ എൽ രാഹുലിന്റെയും പതും നിസ്സങ്കയുടെയും തകർപ്പൻ ബാറ്റിംഗ് മികവിൽ രാജസ്ഥാൻ ഉയർത്തിയ കൂറ്റൻ ലക്ഷ്യം മറികടന്ന് ഡൽഹി ക്യാപിറ്റൽസ് സീസണിലെ തകർപ്പൻ ജയം സ്വന്തമാക്കി. ഏഴ് വിക്കറ്റിനാണ് ഡൽഹി ജയ്പൂരിൽ വിജയിച്ചുകയറിയത്.
സീസണിലെ മോശം ഫോമിനും ഡഗ് ഔട്ടിലെ വിവാദങ്ങൾക്കും മറുപടിയുമായി 50 പന്തിൽ 90 റൺസടിച്ച റിയാൻ പരാഗാണ് രാജസ്ഥാനെ 225 എന്ന മികച്ച സ്കോറിലെത്തിച്ചത്. 32 പന്തിൽ അർദ്ധ സെഞ്ച്വറി തികച്ച താരം ജാമിസണെയും സ്റ്റാർക്കിനെയും കണക്കിന് പ്രഹരിച്ചു. എന്നാൽ ഫീൽഡിംഗിനിടെ ഹാംസ്ട്രിംഗ് പരിക്ക് അലട്ടിയ പരാഗ് രണ്ടാം ഇന്നിംഗ്സിൽ ഭൂരിഭാഗം സമയവും പുറത്തിരുന്നു. പരാഗിന് പകരം യശസ്വി ജയ്സ്വാളാണ് ടീമിനെ നയിച്ചത്.
226 റൺസ് വിജയലക്ഷ്യം പിന്തുടർന്ന ഡൽഹിക്ക് വേണ്ടി രാഹുലും (75) നിസ്സങ്കയും (62) ചേർന്ന് വെടിക്കെട്ട് തുടക്കമാണ് നൽകിയത്. വെറും 9.3 ഓവറിൽ ഇരുവരും ചേർന്ന് 102 റൺസ് ഓപ്പണിംഗ് കൂട്ടുകെട്ടുണ്ടാക്കി. 27 പന്തിൽ രാഹുൽ അർദ്ധ സെഞ്ച്വറി തികച്ചപ്പോൾ നിസ്സങ്ക 23 പന്തിലാണ് 50 കടന്നത്. രാഹുൽ മൈതാനത്തിന്റെ എല്ലാ കോണിലേക്കും ഷോട്ടുകൾ പായിച്ചപ്പോൾ, നിസ്സങ്ക പുൾ ഷോട്ടുകളിലൂടെ മൂന്ന് സിക്സറുകൾ നേടി കാണികളെ ആവേശത്തിലാക്കി.
രാഹുലും നിതീഷ് റാണയും (33) പുറത്തായതോടെ അവസാന 26 പന്തിൽ 49 റൺസ് വേണമെന്ന നിലയിലായി ഡൽഹി. എന്നാൽ അശുതോഷ് ശർമ്മയും ട്രിസ്റ്റൻ സ്റ്റബ്സും ചേർന്ന് പതറാതെ കളിച്ച് ഡൽഹിയെ വിജയതീരത്ത് എത്തിച്ചു. ഐപിഎൽ ചരിത്രത്തിലെ ഡൽഹിയുടെ ഏറ്റവും വലിയ റൺ ചേസാണിത്. ഈ വിജയത്തോടെ 8 പോയിന്റുമായി ഡൽഹി ക്യാപിറ്റൽസ് ആറാം സ്ഥാനത്തേക്ക് ഉയർന്നു. തോറ്റെങ്കിലും 12 പോയിന്റുള്ള രാജസ്ഥാൻ റോയൽസ് പട്ടികയിൽ നാലാം സ്ഥാനത്ത് തുടരുന്നു.
രാജസ്ഥാൻ റോയൽസ്: 225/6 (20 ഓവർ) - റിയാൻ പരാഗ് 90, ഫെരേര 47, സ്റ്റാർക്ക് 3/40.
ഡൽഹി ക്യാപിറ്റൽസ്: 226/3 (19.4 ഓവർ) - കെ എൽ രാഹുൽ 75, പതും നിസ്സങ്ക 62.