കണ്ണൂര്: കണ്ണൂരില് വോട്ടെണ്ണല് ദിനം അടുത്തിരിക്കെ പാനൂര്, കൊളവല്ലൂര് മേഖലകളില് വീണ്ടും വന് ബോംബ് ശേഖരം കണ്ടെത്തിയത് പ്രദേശവാസികളെ ആശങ്കയിലാഴ്ത്തുന്നു. തലശേരി കൊളവല്ലൂര് മേപ്പാട്, പൊയിലൂര് എന്നിവിടങ്ങളില് നിന്നായി അഞ്ച് ഐസ്ക്രീം ബോംബുകളും ഒരു നാടന് ബോംബുമാണ് പോലീസ് കണ്ടെടുത്തത്. രഹസ്യവിവരത്തെത്തുടര്ന്ന് പോലീസ് സംഘവും ബോംബ് സ്ക്വാഡും നടത്തിയ സംയുക്ത പരിശോധനയിലാണ് സ്ഫോടകവസ്തുക്കള് പിടികൂടിയത്.
ഒരു തെങ്ങിന് തോട്ടത്തില് ബക്കറ്റിനുള്ളില് പൂഴി നിറച്ച് കുഴിച്ചിട്ട നിലയിലായിരുന്നു ബോംബുകള് സൂക്ഷിച്ചിരുന്നത്. ഐസ്ക്രീം കണ്ടെയ്നറുകളില് നിര്മ്മിച്ച അഞ്ച് ബോംബുകള്ക്ക് പുറമെ 'കെട്ടു ബോംബ്' എന്നറിയപ്പെടുന്ന മാരകമായ ഒരു നാടന് ബോംബും ഈ ശേഖരത്തില് ഉണ്ടായിരുന്നു. വോട്ടെണ്ണലുമായി ബന്ധപ്പെട്ട് അക്രമസംഭവങ്ങള് ഉണ്ടാകാനുള്ള സാധ്യത കണക്കിലെടുത്ത് പോലീസ് ജില്ലയിലുടനീളം പരിശോധന കര്ശനമാക്കിയിരിക്കുകയാണ്.
രണ്ട് ദിവസം മുന്പ് പാനൂരിലെ മേലെ പൂക്കോം പന്ന്യന്നൂര് ചിത്രവയലില് നിന്നും സമാനമായ രീതിയില് ബോംബ് ശേഖരം കണ്ടെത്തിയിരുന്നു. രണ്ട് സ്റ്റീല് ബോംബുകളും ഒരു നാടന് കെട്ടു ബോംബുമാണ് അന്ന് പോലീസ് പിടിച്ചെടുത്തത്. അതേസമയം, വടകര ചാനിയം കടവില് കണ്ടെത്തിയ സ്റ്റീല് ബോംബുകള് വ്യാജമാണെന്ന് പോലീസ് സ്ഥിരീകരിച്ചു. സ്റ്റീല് പാത്രങ്ങളില് മണ്ണ് നിറച്ച് ബോംബിന്റെ മാതൃകയില് ഉപേക്ഷിച്ചത് ജനങ്ങളില് ഭീതി പരത്താനുള്ള ശ്രമമാണെന്നാണ് പോലീസ് നിഗമനം. തുടര്ച്ചയായി ബോംബുകള് കണ്ടെത്തുന്നത് കണക്കിലെടുത്ത് പാനൂര്, തലശേരി മേഖലകളില് സുരക്ഷാ നിരീക്ഷണം ശക്തമാക്കിയിട്ടുണ്ട്.