ചെന്നൈ: എങ്ങനെയാണ് ഓരോ കഥാപാത്രത്തെയും ഇത്ര തന്മയത്വത്തോടെ അവതരിപ്പിക്കാൻ സാധിക്കുന്നതെന്ന ചോദ്യത്തിന് സുരാജ് വെഞ്ഞാറമൂട് നൽകിയ മറുപടി കേട്ട് അമ്പരന്നിരിക്കുകയാണ് തമിഴ് സിനിമാ ലോകം. തന്റെ പുതിയ തമിഴ് ചിത്രം 'യൂത്തിന്റെ' വിജയാഘോഷ വേദിയിലായിരുന്നു താരത്തിന്റെ ഈ വേറിട്ട പ്രതികരണം.
"നിങ്ങൾ ഞങ്ങളെ ചിരിപ്പിക്കുന്നു, കരയിപ്പിക്കുന്നു. ഏത് വേഷം നൽകിയാലും ആ കഥാപാത്രമായി മാറുന്നു. ഇതെങ്ങനെ സാധ്യമാകുന്നു?" എന്ന അവതാരകന്റെ ചോദ്യത്തിന് ചിരിച്ചുകൊണ്ടായിരുന്നു സുരാജിന്റെ മറുപടി. "എനിക്ക് മൂന്ന് മക്കളാണുള്ളത്. മൂന്ന് പേരും സ്കൂളിൽ പഠിക്കുന്നു. മാസാമാസം അവരുടെ സ്കൂൾ ഫീസ് അടയ്ക്കേണ്ടതിനെക്കുറിച്ച് ആലോചിക്കുമ്പോൾ ഇതല്ല, ഇതിലപ്പുറം ഏത് ജോലിയും ഞാൻ ചെയ്യും," എന്നായിരുന്നു സുരാജ് പറഞ്ഞത്.
താരത്തിന്റെ ഈ തമാശ കലർന്ന മറുപടി വേദിയിൽ വലിയ ചിരിക്കും കയ്യടിക്കും കാരണമായി. ഏത് വേഷവും തനിക്ക് വെല്ലുവിളിയാണെന്നും സംവിധായകൻ പറഞ്ഞുതരുന്ന കാര്യങ്ങൾ അതേ മീറ്ററിൽ തിരിച്ചുനൽകാൻ ശ്രമിക്കുക മാത്രമാണ് താൻ ചെയ്യുന്നതെന്നും സുരാജ് കൂട്ടിച്ചേർത്തു. മലയാളത്തിന് പിന്നാലെ തമിഴിലും കൈനിറയെ അവസരങ്ങളാണ് ഇപ്പോൾ സുരാജിനെ തേടിയെത്തുന്നത്.
'യൂത്തിന്റെ' വലിയ വിജയത്തിന് പിന്നാലെ കോളിവുഡിലെ വമ്പൻ പ്രോജക്റ്റുകളുടെ ഭാഗമാകാൻ ഒരുങ്ങുകയാണ് താരം. ധനുഷിനൊപ്പമുള്ള 'കര', രജനീകാന്ത് ചിത്രം 'ജയിലർ 2', 'ടെസ്ല' തുടങ്ങി നിരവധി ശ്രദ്ധേയമായ ചിത്രങ്ങളാണ് സുരാജിന്റേതായി അണിയറയിൽ ഒരുങ്ങുന്നത്. അതിർത്തികൾ കടന്ന് തന്റെ അഭിനയ പ്രതിഭ തെളിയിക്കുന്ന സുരാജ് വെഞ്ഞാറമൂട് വരും വർഷങ്ങളിൽ തമിഴ് സിനിമയിലെ തന്നെ അവിഭാജ്യ ഘടകമായി മാറുമെന്നുറപ്പാണ്.