കൊച്ചി: 'കൊറോണ പേപ്പേഴ്സി'നും 'വേല'യ്ക്കും ശേഷം ഷെയ്ൻ പോലീസ് വേഷമിടുന്ന 'ദൃഢം' മെയ് 8-ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും. നവാഗതനായ മാർട്ടിൻ ജോസഫ് സംവിധാനം ചെയ്യുന്ന ചിത്രത്തിൽ എസ്.ഐ വിജയ് രാധാകൃഷ്ണൻ എന്ന കേന്ദ്ര കഥാപാത്രമായാണ് ഷെയ്ൻ എത്തുന്നത്. സാധാരണ കണ്ടുവരാറുള്ള പവർഫുൾ പോലീസ് ഹീറോ പരിവേഷമല്ല ഈ ചിത്രത്തിൽ ഷെയ്നുള്ളത്.
കുഴിനിലം എന്ന നാട്ടിൻപുറത്തെ പോലീസ് സ്റ്റേഷനിൽ ഏറെ ആഗ്രഹിച്ച ജോലിയിൽ വലിയ ആത്മവിശ്വാസത്തോടെ ചാർജെടുക്കുന്ന വിജയ് രാധാകൃഷ്ണന്റെ ജീവിതമാണ് സിനിമ. ജോലിയിൽ പുതുമുഖമായ നായകൻ സ്റ്റേഷനിൽ നേരിടേണ്ടി വരുന്ന അപ്രതീക്ഷിത സാഹചര്യങ്ങളും, അയാൾക്ക് പറ്റുന്ന ചില തെറ്റുകളും അതിലൂടെ കാര്യങ്ങൾ പഠിച്ചെടുക്കുന്നതുമാണ് ചിത്രത്തിന്റെ ഇതിവൃത്തം.
മാനസിക സമ്മർദ്ദങ്ങളും ഉത്തരവാദിത്തങ്ങളും ഒരു സാധാരണക്കാരനെ എങ്ങനെ രൂപപ്പെടുത്തുന്നു എന്ന് റിയലിസ്റ്റിക്കായി ചിത്രം അവതരിപ്പിക്കുന്നു. ജീത്തു ജോസഫിന്റെ 'ദൃശ്യം' സ്റ്റൈലിൽ പുറത്തിറങ്ങിയ സിനിമയുടെ പ്രൊമോഷൻ വീഡിയോ സോഷ്യൽ മീഡിയയിൽ ഇതിനകം തരംഗമായിക്കഴിഞ്ഞു. ട്രെയിലർ നൽകുന്ന സൂചനകൾ പ്രകാരം പ്രേക്ഷകർക്ക് തങ്ങളുമായി ബന്ധപ്പെടുത്താൻ കഴിയുന്ന ഒട്ടേറെ വൈകാരിക നിമിഷങ്ങൾ സിനിമയിലുണ്ട്.
ഷോബി തിലകൻ, കോട്ടയം രമേഷ്, ദിനേഷ് പ്രഭാകർ, കൃഷ്ണപ്രഭ തുടങ്ങി വലിയൊരു താരനിര തന്നെ ഷെയ്നൊപ്പം ഈ ചിത്രത്തിൽ അണിനിരക്കുന്നുണ്ട്. ജോമോൻ ജോൺ, ലിന്റോ ദേവസ്യ എന്നിവർ ചേർന്നാണ് കഥയും തിരക്കഥയും ഒരുക്കിയിരിക്കുന്നത്. ഇ ഫോർ എക്സ്പെരിമെന്റ്സും ജീത്തു ജോസഫിന്റെ ബെഡ് ടൈം സ്റ്റോറീസും ചേർന്നാണ് ചിത്രം അവതരിപ്പിക്കുന്നത്. മുകേഷ് ആർ. മെഹ്ത, സി.വി. സാരഥി എന്നിവരാണ് നിർമ്മാതാക്കൾ. പി.എം. ഉണ്ണികൃഷ്ണൻ ഛായാഗ്രഹണവും ശ്രീരാഗ് സജി സംഗീത സംവിധാനവും നിർവ്വഹിക്കുന്നു.