പാലക്കാട്: വേനല്മഴ കനത്തതോടെ സംസ്ഥാനത്ത് പ്രഖ്യാപിച്ചിരുന്ന വൈദ്യുതി നിയന്ത്രണങ്ങള് പിന്വലിച്ചു. ഇനി പവര്ക്കെട്ടിന് സാധ്യതയില്ലെന്നും ലോഡ് ഷെഡിങ് പൂര്ണ്ണമായി കുറഞ്ഞതായും വൈദ്യുതി മന്ത്രി കെ. കൃഷ്ണന്കുട്ടി അറിയിച്ചു. ചിലയിടങ്ങളില് അനുഭവപ്പെട്ട ഓവര്ലോഡ് മൂലമുള്ള സ്വാഭാവിക നിയന്ത്രണങ്ങള് മാത്രമാണ് നിലവിലുള്ളതെന്നും കഴിഞ്ഞദിവസം സംസ്ഥാനത്ത് എവിടെയും നിയന്ത്രണം ഉണ്ടായിരുന്നില്ലെന്നും മന്ത്രി പാലക്കാട് വ്യക്തമാക്കി.
സംസ്ഥാനത്ത് വേനല്മഴ ലഭിച്ചു തുടങ്ങിയതോടെ വൈദ്യുതി ഉപഭോഗം കുത്തനെ കുറഞ്ഞതാണ് കെഎസ്ഇബിക്ക് വലിയ ആശ്വാസമായത്. വൈകിട്ട് 6 മണി മുതല് രാത്രി 12 മണി വരെയുള്ള 'പീക്ക് അവറില്' ഏര്പ്പെടുത്തിയിരുന്ന അര മണിക്കൂര് നിയന്ത്രണം ഇനി തുടരേണ്ടതില്ലെന്നാണ് തീരുമാനം. പ്രകൃതി ചതിച്ചതുകൊണ്ടാണ് ലോഡ് ഷെഡിങ് വേണ്ടിവന്നതെന്നായിരുന്നു മന്ത്രിയുടെ മുന് നിലപാട്. പത്തുവര്ഷത്തെ വൈദ്യുതി സ്വയംപര്യാപ്തതാ അവകാശവാദങ്ങള്ക്കിടെ നിയന്ത്രണം വന്നത് വലിയ വിമര്ശനങ്ങള്ക്കും വഴിവെച്ചിരുന്നു.
വിതരണ ശൃംഖലയുടെ ആഘാതം കുറയ്ക്കാന് നിയന്ത്രണം അത്യാവശ്യമാണെന്നായിരുന്നു കെഎസ്ഇബി ഉന്നതതല യോഗം നേരത്തെ വിലയിരുത്തിയിരുന്നത്. എന്നാല് കൂടംകുളം നിലയത്തില് നിന്ന് 200 മെഗാവാട്ട് വൈദ്യുതി അധികമായി ലഭിച്ചു തുടങ്ങിയത് പ്രതിസന്ധി മറികടക്കാന് സഹായകമായി. നിലവില് സംസ്ഥാനത്ത് വൈദ്യുതിയുടെ കുറവില്ലെന്നും വരും ദിവസങ്ങളിലും ഇതേ സ്ഥിതി തുടരുമെന്നുമാണ് പ്രതീക്ഷിക്കുന്നത്.
അതേസമയം, ഡാം മാനേജ്മെന്റില് ഉണ്ടായ വീഴ്ചയാണ് സംസ്ഥാനത്തെ പെട്ടെന്നുള്ള വൈദ്യുതി പ്രതിസന്ധിയിലേക്ക് നയിച്ചതെന്ന ആക്ഷേപവും ശക്തമാണ്. കഴിഞ്ഞ മൂന്ന് വര്ഷമായി ഡാമുകളില് ഉയര്ന്ന തോതില് വെള്ളം എത്തിയിട്ടും അത് ഫലപ്രദമായി സംഭരിക്കാനോ ഉപയോഗിക്കാനോ കെഎസ്ഇബിക്ക് സാധിച്ചില്ലെന്നാണ് വിവരം. വേനല്മഴ ലഭിച്ചില്ലായിരുന്നെങ്കില് സംസ്ഥാനം വലിയ ഇരുട്ടിലേക്ക് നീങ്ങുമായിരുന്നുവെന്ന് വിദഗ്ധര് ചൂണ്ടിക്കാട്ടുന്നു. നിലവില് മഴയുടെ വരവോടെ കൃഷിയാവശ്യങ്ങള്ക്കും മറ്റുമുള്ള പമ്പിങ് കുറഞ്ഞതും കെഎസ്ഇബിക്ക് ഗുണകരമായി.