മലപ്പുറം: സോഷ്യല് മീഡിയയില് സജീവമായ പെണ്കുട്ടികളുടെ ചിത്രങ്ങള് അശ്ലീലമായി മോര്ഫ് ചെയ്ത് പ്രചരിപ്പിക്കുകയും വിവിധ ടെലഗ്രാം ഗ്രൂപ്പുകളിലൂടെ വില്പ്പന നടത്തുകയും ചെയ്ത യുവാവ് പിടിയില്. വള്ളിക്കുന്ന് അരിയല്ലൂര് സ്വദേശിയായ നിതിന് മോഹന്ദാസിനെയാണ് രാമനാട്ടുകര സ്വദേശിനിയുടെ പരാതിയില് പരപ്പനങ്ങാടി പോലീസ് അറസ്റ്റ് ചെയ്തത്. ഇന്സ്റ്റാഗ്രാം ഉള്പ്പെടെയുള്ള പ്ലാറ്റ്ഫോമുകളില് സജീവമായ പെണ്കുട്ടികളുടെ ചിത്രങ്ങള് കൈക്കലാക്കി അവ മോര്ഫ് ചെയ്ത് ടെലഗ്രാം ഗ്രൂപ്പുകളിലൂടെ വിറ്റെന്ന പരാതിയിലാണ് അറസ്റ്റ്.
പ്രതിയുടെ പക്കല് നിന്ന് പിടിച്ചെടുത്ത ഡിജിറ്റല് ഉപകരണങ്ങള് പരിശോധിച്ചപ്പോഴാണ് കുറ്റകൃത്യത്തിന്റെ വ്യാപ്തി പോലീസിന് ബോധ്യപ്പെട്ടത്. കഴിഞ്ഞ മൂന്ന് വര്ഷമായി ടെലഗ്രാം ഗ്രൂപ്പുകള് കേന്ദ്രീകരിച്ചാണ് ഇയാള് ഈ നിയമവിരുദ്ധ പ്രവര്ത്തനങ്ങള് നടത്തിയിരുന്നത്. പ്രധാനമായും മൂന്ന് ഗ്രൂപ്പുകളാണ് ഇയാള് ഇതിനായി രൂപീകരിച്ചിരുന്നത്. ചിത്രങ്ങള് വില്ക്കുന്നതിന് പുറമെ മറ്റുള്ളവരില് നിന്ന് ചിത്രങ്ങള് ശേഖരിക്കുന്ന 'എക്സ്ചേഞ്ചിങ്' രീതിയും ഇയാള് പിന്തുടര്ന്നിരുന്നു. പിടിക്കപ്പെടാതിരിക്കാന് പതിനൊന്നോളം വ്യാജ നമ്പറുകള് ഉപയോഗിച്ചാണ് ഇയാള് സോഷ്യല് മീഡിയ അക്കൗണ്ടുകളും ടെലഗ്രാം ഗ്രൂപ്പുകളും പ്രവര്ത്തിപ്പിച്ചിരുന്നത്.
ഇന്സ്റ്റാഗ്രാം പ്രൊഫൈലുകളില് നിന്ന് പെണ്കുട്ടികളുടെ ഫോട്ടോകള് ഡൗണ്ലോഡ് ചെയ്ത് അത്യാധുനിക സാങ്കേതികവിദ്യ ഉപയോഗിച്ച് മോര്ഫ് ചെയ്ത് അശ്ലീല ഉള്ളടക്കങ്ങള് ചേര്ക്കുകയായിരുന്നു ഇയാളുടെ രീതി. പരാതിക്കാരിയായ യുവതിയെ നേരത്തെ പരിചയമുള്ള വ്യക്തി കൂടിയാണ് നിതിന്. പരിചയമുള്ളവരുടെ ചിത്രങ്ങള് പോലും ഇത്തരത്തില് ദുരുപയോഗം ചെയ്തു എന്നത് സംഭവത്തിന്റെ ഗൗരവം വര്ദ്ധിപ്പിക്കുന്നു. നിരവധി പെണ്കുട്ടികളുടെ ചിത്രങ്ങള് ഇത്തരത്തില് ഗ്രൂപ്പുകളില് പ്രചരിക്കുന്നുണ്ടെന്ന് പരാതിക്കാരി പോലീസിനെ അറിയിച്ചിട്ടുണ്ട്. ചിത്രങ്ങള് പ്രചരിപ്പിക്കുക മാത്രമല്ല, പെണ്കുട്ടികള്ക്ക് നിരന്തരമായി അശ്ലീല സന്ദേശങ്ങളും ദൃശ്യങ്ങളും അയച്ച് അവരെ മാനസികമായി പീഡിപ്പിക്കുന്ന രീതിയും ഇയാള്ക്കുണ്ടായിരുന്നു.
പ്രതിയുടെ ഇമെയില് വിലാസങ്ങളുമായി ബന്ധിപ്പിച്ചിട്ടുള്ള ഫോണ് നമ്പറുകള് കേന്ദ്രീകരിച്ച് നടത്തിയ അന്വേഷണമാണ് ഇയാളെ കുടുക്കാന് പോലീസിനെ സഹായിച്ചത്. നിതിനെതിരെ കൂടുതല് പെണ്കുട്ടികള് പരാതിയുമായി രംഗത്തെത്തിയിട്ടുണ്ട്. ഇയാള്ക്ക് പിന്നില് മറ്റ് കണ്ണികളുണ്ടോ എന്നും മോര്ഫ് ചെയ്ത ചിത്രങ്ങള് ഏതെങ്കിലും വിദേശ സൈറ്റുകള്ക്ക് കൈമാറിയിട്ടുണ്ടോ എന്നും പോലീസ് വിശദമായി അന്വേഷിച്ചു വരികയാണ്.