തിരുവനന്തപുരം: അഞ്ചരക്കണ്ടി ഡെന്റൽ കോളേജ് വിദ്യാർത്ഥി നിതിൻ രാജിന്റെ മരണത്തിൽ പ്രതിഷേധിച്ച് ദളിത് സംഘടനകൾ നടത്തുന്ന ഹർത്താലിനെ പിന്തുണച്ച് നടി മാല പാർവതി. നിതിൻ രാജിന്റെ മരണം ചിലരുടെ മാത്രം ദുഃഖമാണെന്ന രീതിയിലുള്ള പ്രതികരണങ്ങളാണ് പലരിലും കണ്ടതെന്നും സമരത്തിന് പോലും അയിത്തം കല്പിക്കുന്ന നിലപാടാണ് ചിലർ സ്വീകരിക്കുന്നതെന്നും അവർ കുറിച്ചു.
ഹർത്താലിനെ ഒരു സമരമാർഗ്ഗമായി ഇന്ത്യയിലെ രാഷ്ട്രീയപാർട്ടികൾ എക്കാലത്തും സ്വീകരിച്ചിട്ടുണ്ട്. എന്നാൽ "ദളിത് പാർട്ടികളല്ലേ, അവർ എന്ത് ചെയ്യാനാണ്" എന്ന നിലയിലാണ് പലരും ഇന്നത്തെ ഹർത്താലിനെ കണ്ടതെന്ന് മാല പാർവതി ചൂണ്ടിക്കാട്ടി. സാധാരണ ഹർത്താൽ പ്രഖ്യാപിച്ചാൽ ഉണ്ടാകാറുള്ള മുൻകരുതലുകൾ ഇത്തവണ ഉണ്ടാകാത്തത് എന്തുകൊണ്ടാണെന്നും അവർ ചോദിച്ചു. നിതിൻ രാജിന്റെ മരണം ഗൗരവമായ പ്രശ്നമാണെന്നും വംശീയ അധിക്ഷേപങ്ങൾ ഇക്കാലത്തും പലയിടങ്ങളിലും നടക്കുന്നുണ്ടെന്നത് ഉറക്കെ പറയേണ്ട കാര്യമാണെന്നും കുറിപ്പിൽ പറയുന്നു.
നിതിൻ രാജിന്റെ മരണത്തിന് കാരണക്കാരായവരെ ഇതുവരെ അറസ്റ്റ് ചെയ്യാത്തത് ആർക്കും പ്രശ്നമല്ലാത്തതു പോലെയാണ് പെരുമാറ്റം. വംശീയതയുടെ വിഷയം ചർച്ച ചെയ്യുമ്പോൾ കേരളം മുന്നോട്ടാണോ പോകുന്നത് എന്ന് സംശയമുണ്ട്. ഇത്തരം സാഹചര്യത്തിൽ ഈ ഹർത്താൽ അനിവാര്യമായിരുന്നു എന്നാണ് തനിക്ക് തോന്നുന്നതെന്നും മാല പാർവതി വ്യക്തമാക്കി.
സംസ്ഥാനത്തിന്റെ വിവിധ ഭാഗങ്ങളിൽ ഹർത്താൽ അനുകൂലികൾ വാഹനങ്ങൾ തടയുകയും പ്രതിഷേധ പ്രകടനങ്ങൾ നടത്തുകയും ചെയ്യുന്നുണ്ട്. ഇതിനിടെ ഹർത്താലിനെതിരെ സമൂഹമാധ്യമങ്ങളിൽ വിമർശനം ശക്തമാകുന്ന സാഹചര്യത്തിലാണ് മാല പാർവതി തന്റെ നിലപാട് വ്യക്തമാക്കിയത്.