ന്യൂഡല്ഹി: രാജ്യത്തിന്റെ നീതിന്യായ വ്യവസ്ഥയെ ഞെട്ടിച്ച് ഡല്ഹി ഹൈക്കോടതിയുടെ ഓണ്ലൈന് വാദത്തിനിടെ (വീഡിയോ കോണ്ഫറന്സിങ്) സ്ക്രീനില് അശ്ലീല ദൃശ്യങ്ങള്. കോടതിയുടെ വെര്ച്വല് നടപടികള്ക്കിടെയാണ് സൈബര് ആക്രമണം. ചീഫ് ജസ്റ്റിസിന്റെ നേതൃത്വത്തിലുള്ള ബെഞ്ച് വീഡിയോ കോണ്ഫറന്സിങ്ങിലൂടെ വാദം കേള്ക്കുന്നതിനിടെയാണ് അജ്ഞാതരായ സൈബര് ആക്രമണകാരികള് സ്ക്രീനില് അശ്ലീല ദൃശ്യങ്ങള് പ്രദര്ശിപ്പിച്ചത്.
നടപടികള് പുരോഗമിക്കുന്നതിനിടെ ശ്രീധര് സര്നോബത്, ഷിത്ജീത് സിങ് എന്നീ പേരുകളിലുള്ള അക്കൗണ്ടുകളില് നിന്നാണ് കടന്നുകയറ്റം ഉണ്ടായത്. 'നിങ്ങള് ഹാക്ക് ചെയ്യപ്പെട്ടിരിക്കുന്നു' എന്ന ഭീഷണി സന്ദേശം സ്ക്രീനില് തെളിഞ്ഞതിന് പിന്നാലെയാണ് അശ്ലീല ദൃശ്യങ്ങള് ആവര്ത്തിച്ച് പ്രദര്ശിപ്പിക്കപ്പെട്ടത്. ഇതിനൊപ്പം തന്നെ ഒരു ഓട്ടോമേറ്റഡ് ശബ്ദസന്ദേശവും കേള്ക്കാമായിരുന്നു. ആദ്യതവണ തടസ്സമുണ്ടായപ്പോള് സിസ്റ്റം റീസ്റ്റാര്ട്ട് ചെയ്ത് നടപടികള് തുടരാന് കോടതി ശ്രമിച്ചെങ്കിലും, വീണ്ടും സമാനമായ രീതിയില് ആക്രമണം ആവര്ത്തിച്ചതോടെ ചീഫ് ജസ്റ്റിസിന് കോടതി നടപടികള് നിര്ത്തിവെക്കേണ്ടി വന്നു.
ഹൈക്കോടതിയുടെ വീഡിയോ കോണ്ഫറന്സിങ് ഇന്റര്ഫേസിനെ ലക്ഷ്യമിട്ട് നടന്ന ആസൂത്രിതമായ ഒരു സൈബര് ആക്രമണമാണിതെന്നാണ് പ്രാഥമിക നിഗമനം. കോടതിയുടെ വെര്ച്വല് മുറിയിലേക്ക് അപരിചിതര്ക്ക് എങ്ങനെ പ്രവേശനം ലഭിച്ചു എന്നതും അവര്ക്ക് സ്ക്രീന് പങ്കുവെക്കാന് സാധിച്ചു എന്നതും സുരക്ഷാ വീഴ്ചയുടെ വ്യാപ്തി വ്യക്തമാക്കുന്നു. അതീവ സുരക്ഷാ പ്രാധാന്യമുള്ള കോടതി രേഖകളും വാദങ്ങളും കൈകാര്യം ചെയ്യുന്ന ഡിജിറ്റല് സംവിധാനങ്ങള് ഇത്തരത്തില് ഹാക്ക് ചെയ്യപ്പെടുന്നത് വലിയ നിയമപ്രശ്നങ്ങള്ക്കും ഇടയാക്കും.
സംഭവത്തെത്തുടര്ന്ന് വെര്ച്വല് കോടതി സംവിധാനം താല്ക്കാലികമായി നിര്ത്തിവെച്ച അധികൃതര്, സൈബര് വിദഗ്ധരുടെ സഹായത്തോടെ അന്വേഷണം ആരംഭിച്ചിട്ടുണ്ട്. അക്കൗണ്ടുകളുടെ ഉറവിടം കണ്ടെത്താനും ഇത്തരം കടന്നുകയറ്റങ്ങള് ഭാവിയില് ഒഴിവാക്കാനുമുള്ള നടപടികളാണ് ഇപ്പോള് പുരോഗമിക്കുന്നത്. നീതിന്യായ നിര്വ്വഹണം ഡിജിറ്റല് പ്ലാറ്റ്ഫോമുകളിലേക്ക് കൂടുതല് മാറിക്കൊണ്ടിരിക്കുന്ന സാഹചര്യത്തില്, കോടതികളുടെ സൈബര് സുരക്ഷാ സംവിധാനങ്ങള് അടിയന്തരമായി പരിഷ്കരിക്കണമെന്ന ആവശ്യത്തിന് ഈ സംഭവം കരുത്തുപകരുന്നു.