ന്യൂഡല്ഹി: ആം ആദ്മി പാര്ട്ടി വിട്ട് ബിജെപിയില് ചേര്ന്ന രാഘവ് ഛദ്ദയും മുന് പാര്ട്ടിയും തമ്മിലുള്ള രാഷ്ട്രീയ പോര് അങ്ങേയറ്റം വ്യക്തിപരമായ കടന്നാക്രമണങ്ങളിലേക്ക് നീങ്ങുന്നു. ഇന്ത്യയിലെ ഏറ്റവും പ്രായം കുറഞ്ഞ രാജ്യസഭാംഗങ്ങളില് ഒരാളായ ഛദ്ദയുടെ കൂടുമാറ്റം എഎപിയെ സംബന്ധിച്ചിടത്തോളം വലിയ രാഷ്ട്രീയ ആഘാതമാണ് സൃഷ്ടിച്ചിരിക്കുന്നത്. ഇതിന്റെ പ്രതിഫലനമെന്നോണം, രാഘവ് ഛദ്ദയുടെ വ്യക്തിജീവിതത്തെയും വിവാഹത്തെയും വരെ വലിച്ചിഴച്ചുകൊണ്ടുള്ള പരിഹാസങ്ങളാണ് എഎപി നേതൃത്വത്തില് നിന്ന് ഇപ്പോള് ഉയരുന്നത്.
രാഘവ് ഛദ്ദയ്ക്ക് ബോളിവുഡ് താരം പരിനീതി ചോപ്രയെ വിവാഹം കഴിക്കാന് സാധിച്ചത് അദ്ദേഹം എഎപി എംപി ആയതുകൊണ്ട് മാത്രമാണെന്ന പാര്ട്ടി വക്താവ് വികാസ് സിങ്ങിന്റെ പ്രസ്താവന വലിയ വിവാദത്തിന് തിരികൊളുത്തിയിരിക്കുകയാണ്. ഛദ്ദ വെറുമൊരു സാധാരണക്കാരന് മാത്രമായിരുന്നുവെന്നും പാര്ട്ടിയാണ് അദ്ദേഹത്തെ രാജ്യസഭയിലെത്തിച്ച് ഉന്നത പദവി നല്കിയതെന്നും സിങ് ആരോപിച്ചു. രാജ്യസഭാ എംപി എന്ന പദവിയുള്ളത് കൊണ്ടാണ് പരിനീതിയെപ്പോലൊരു താരം അദ്ദേഹത്തെ വിവാഹം കഴിക്കാന് തയ്യാറായതെന്ന വികാസ് സിങ്ങിന്റെ പരിഹാസം രാഷ്ട്രീയ മര്യാദകളുടെ ലംഘനമാണെന്ന വിമര്ശനം ഇതിനകം ഉയര്ന്നു കഴിഞ്ഞു. പാര്ട്ടിയെ വളര്ത്താന് കഷ്ടപ്പെട്ടവരെ അവഗണിച്ച് പദവികള് ദുരുപയോഗം ചെയ്ത് സ്വന്തം ഇമേജ് വര്ദ്ധിപ്പിക്കാനാണ് ഛദ്ദ ശ്രമിച്ചതെന്നാണ് എഎപിയുടെ പക്ഷം.
എന്നാല് ഈ ആരോപണങ്ങളെ ശക്തമായ ഭാഷയില് ഛദ്ദ പ്രതിരോധിക്കുന്നുണ്ട്. ചാര്ട്ടേഡ് അക്കൗണ്ടന്റ് എന്ന തന്റെ സുരക്ഷിതമായ കരിയര് ഉപേക്ഷിച്ചാണ് പാര്ട്ടിയുടെ സ്ഥാപക അംഗമായി മാറിയതെന്ന് അദ്ദേഹം പുതിയ വീഡിയോ സന്ദേശത്തില് വ്യക്തമാക്കി. കഴിഞ്ഞ 15 വര്ഷമായി പ്രസ്ഥാനത്തിനായി ചോരയും നീരുമൊഴുക്കി പ്രവര്ത്തിച്ചുവെന്നും എന്നാല് പാര്ട്ടിക്കുള്ളിലെ അന്തരീക്ഷം ഇപ്പോള് വിഷലിപ്തമായി മാറിയെന്നും അദ്ദേഹം കുറ്റപ്പെടുത്തി. രാജക്ഷേമത്തിന് പകരം സ്വന്തം നേട്ടത്തിനായി മാത്രം പ്രവര്ത്തിക്കുന്ന അഴിമതിക്കാരുടെ കയ്യിലാണ് ഇപ്പോള് പാര്ട്ടിയെന്നും ഛദ്ദ തുറന്നടിച്ചു.
2023 സെപ്റ്റംബറില് ഉദയ്പൂരില് വെച്ച് നടന്ന രാഘവ്-പരിനീതി വിവാഹം ദേശീയ ശ്രദ്ധയാകര്ഷിച്ചിരുന്നു. അന്ന് അരവിന്ദ് കെജ്രിവാള് ഉള്പ്പെടെയുള്ള എഎപിയിലെ പ്രമുഖര് വിവാഹത്തില് പങ്കെടുത്തിരുന്നു. എന്നാല് ഇപ്പോള് രാഷ്ട്രീയ നിലപാടുകള് മാറിയതോടെ, തന്റെ വിശ്വസ്തനായിരുന്ന ഛദ്ദയെ 'രാജദ്രോഹി' എന്ന് വിളിച്ചാണ് എഎപി നേരിടുന്നത്. പാര്ട്ടി നല്കിയ ആനുകൂല്യങ്ങളും പദവികളും അക്കമിട്ടു നിരത്തി ഛദ്ദയെ തളയ്ക്കാനാണ് എഎപി ശ്രമിക്കുന്നത്. പരസ്പരമുള്ള ഈ ചെളിവാരിയെറിയല് ദേശീയ രാഷ്ട്രീയത്തില് എഎപിയുടെയും രാഘവ് ഛദ്ദയുടെയും പ്രതിച്ഛായയെ എങ്ങനെ ബാധിക്കുമെന്നത് വരും ദിവസങ്ങളില് വ്യക്തമാകും.