Posted On date_range 20 April 2026 7:45 AM IST Updated On date_range 20 April 2026 7:45 AM IST ദൈവം ദലിതര്ക്കും ആദിവാസികള്ക്കുമൊപ്പം അവസാനത്തെ പാട്ട് പാടുന്നു കൊല്ലപ്പെട്ട കുട്ടികള് ചോര വീണ മണ്ണ് ശിരസ്സിലേറ്റി ആ പാട്ടിന്റെ താളത്തില് നൃത്തംവെക്കുന്നു ആ പാട്ടിന്റെ ഭാഷ എനിക്ക് മനസ്സിലായില്ല– പല ഭാഷകള് ചേര്ന്ന് മഴവില്ല് പോലെ ചക്രവാളത്തില്നിന്ന് ചക്രവാളത്തിലേക്ക് വളയുന്ന ഒന്ന്. അതില് ആദ്യത്തെ ഭാഷയുണ്ടായിരുന്നു, അവസാനത്തെ ഭാഷയും. ആ കുട്ടികളുടെ നൃത്തത്തില് ആദ്യത്തെ മനുഷ്യരുടെ നൃത്തമുണ്ടായിരുന്നു മനുഷ്യര്ക്കും മുമ്പുള്ള മണ്ണിന്റെയും ജലത്തിന്റെയും വായുവിന്റെയും മേഘങ്ങളുടെയും നൃത്തവും മനുഷ്യരെ അതിജീവിക്കാന്... ദൈവം ദലിതര്ക്കും ആദിവാസികള്ക്കുമൊപ്പം അവസാനത്തെ പാട്ട് പാടുന്നു കൊല്ലപ്പെട്ട കുട്ടികള് ചോര വീണ മണ്ണ് ശിരസ്സിലേറ്റി ആ പാട്ടിന്റെ താളത്തില് നൃത്തംവെക്കുന്നു ആ പാട്ടിന്റെ ഭാഷ എനിക്ക് മനസ്സിലായില്ല– പല ഭാഷകള് ചേര്ന്ന് മഴവില്ല് പോലെ ചക്രവാളത്തില്നിന്ന് ചക്രവാളത്തിലേക്ക് വളയുന്ന ഒന്ന്. അതില് ആദ്യത്തെ ഭാഷയുണ്ടായിരുന്നു, അവസാനത്തെ ഭാഷയും. ആ കുട്ടികളുടെ നൃത്തത്തില് ആദ്യത്തെ മനുഷ്യരുടെ നൃത്തമുണ്ടായിരുന്നു മനുഷ്യര്ക്കും മുമ്പുള്ള മണ്ണിന്റെയും ജലത്തിന്റെയും വായുവിന്റെയും മേഘങ്ങളുടെയും നൃത്തവും മനുഷ്യരെ അതിജീവിക്കാന് പോകുന്ന ആട്ടിന്കുട്ടികളുടെയും മീനുകളുടെയും ശലഭങ്ങളുടെയും ഇലകളുടെയും നൃത്തം ഇതാ ഞാനും ഇപ്പോള് ആ പാട്ടു മൂളുകയാണ് അതിന്റെ സുവർണദലങ്ങളാര്ന്ന പല്ലവി തളിരുകള്പോലുള്ള അനുപല്ലവികള് അതിന്റെ സൗരയൂഥം കറങ്ങുന്ന താളം. ഞാനും അതിനൊപ്പം ചുവടുവെക്കുകയാണ് ചന്ദ്രനും നക്ഷത്രങ്ങള്ക്കും പുല്ലിനും ഒപ്പം.