ദുബൈ സഫാരി പാർക്കിൽ പുതിയ അതിഥി; വെള്ള കാണ്ടാമൃഗത്തിന് കുഞ്ഞ്​ ജനിച്ചു

ദുബൈ: എമിറേറ്റിലെ പ്രധാന വിനോദ ആകർഷണങ്ങളിൽ ഒന്നായ ദുബൈ സഫാരി പാർക്കിൽ കൗതുകമായി വെള്ള കാണ്ടാമൃഗത്തിന്‍റെ കുഞ്ഞ്. കഴിഞ്ഞ ദിവസമാണ്​ ഒലീവ്​ എന്ന്​ പേരുള്ള വെള്ള കാണ്ടാമൃഗം ഒരു​ ആൺകുഞ്ഞിന്​ ജന്മം നൽകിയത്​​. മേഖലയിൽ തുടരുന്ന സംഘർഷ സാഹചര്യത്തിൽ മനസിന്​ സമാധാനം നൽകുന്ന​ നിമിഷം സമ്മാനിച്ച ആൺകുഞ്ഞിന്​ അറബിയിൽ ‘സമാധാനം’ എന്ന്​ അർഥം വരുന്ന സലാം എന്നാണ്​ പേരിട്ടിരിക്കുന്നത്​. 73.5 കിലോയാണ്​ കുഞ്ഞിന്‍റെ തൂക്കം. സ്വന്തമായി നിൽക്കാനും നടക്കാനും കുഞ്ഞിന്​ ശേഷിയുണ്ടെന്നും പാർക്കിലെ ജന്തുശാസ്ത്ര സംഘത്തിന്‍റെ പരിചരണത്തിലാണെന്നും അധികൃതർ അറിയിച്ചു. പാർക്കിന്‍റെ പ്രജനന പ്രോഗ്രാമിലൂടെ ജനിക്കുന്ന രണ്ടാമത്തെ വെളുത്ത കാണ്ടാമൃഗമാണ്​ സലാം. കഴിഞ്ഞ വർഷം ജനിച്ച കുഞ്ഞിന്​ ഒനിക്സ്​ എന്നാണ്​ പേരിട്ടിരുന്നത്​. അമ്മയും കുഞ്ഞും സുഖമായിരിക്കുന്നതായി ദുബൈ സഫാരി പാർക്ക്​ അധികൃതർ അറിയിച്ചു. വംശനാശ ഭീഷണി നേരിടുന്ന ജീവി വർഗത്തിൽപ്പെട്ട​ വെള്ള കാണ്ടാമൃഗം സന്ദർശകർക്ക്​ അപൂർവ കാഴ്ച സമ്മാനിക്കുന്നതാണ്​. വംശനാശ ഭീഷണി നേരിടുന്ന അപൂർവ ജീവി വർഗങ്ങളുടെ പ്രധാന സംരക്ഷണ കേന്ദ്രമായ ദുബൈ സഫാരി പാർക്കിനെ സംബന്ധിച്ച്​ വെളുത്ത കാണ്ടാമൃഗത്തിന്‍റെ ജനനം പുതിയ നാഴികക്കല്ലാണെന്നും അധികൃതർ വ്യക്​തമാക്കി. നിലവിൽ 15,700 വെള്ള കാണ്ടാമൃഗങ്ങൾ മാത്രമാണ്​ ലോകത്തുള്ളതെന്നാണ്​ അന്താരാഷ്ട്ര പ്രകൃതി സംരക്ഷണ യൂനിയന്‍റെ കണക്ക്​. ദുബൈയുടെ നഗര ഹൃദയത്തിൽ ഏതാണ്ട്​ 119 ഹെക്ടറിലായി വ്യാപിച്ചു കിടക്കുന്ന പാർക്ക്​ 300 ജീവി വർഗങ്ങളിലായി 3000 മൃഗങ്ങളുടെ ആവാസ കേന്ദ്രമാണ്​.