പശ്ചിമേഷ്യയിൽ സമാധാന നീക്കങ്ങൾ സജീവം; ഇസ്‌ലാമാബാദിലെ ചർച്ചയിൽ പ​ങ്കെടുത്ത്​ സൗദി അറേബ്യയും

റിയാദ്​: ഇറാനെതിരെയുള്ള അമേരിക്ക-ഇസ്രായേൽ സൈനിക നടപടികൾ അവസാനിപ്പിക്കാനും മേഖലയിലെ സംഘർഷം ലഘൂകരിക്കാനുമുള്ള നിർണായക നയതന്ത്ര ചർച്ചകൾക്ക് പാകിസ്​താൻ ആതിഥേയത്വം വഹിക്കുന്നതായി റിപ്പോർട്ട്​. തുർക്കിയ, ഈജിപ്ത്, സൗദി അറേബ്യ എന്നീ രാജ്യങ്ങളിലെ വിദേശകാര്യ മന്ത്രിമാർ പാകിസ്​താൻ വിദേശകാര്യ മന്ത്രി ഇഷാഖ് ദാറുമായി ഇസ്‌ലാമാബാദിൽ കൂടിക്കാഴ്ച നടത്തിയതായി അൽ ജസീറ ചാനൽ റിപ്പോർട്ട്​ ചെയ്​തു. യുദ്ധം ആരംഭിച്ച് ഒരു മാസം പിന്നിടുമ്പോൾ, ഗൾഫ് മേഖലയിലെ സമാധാനാന്തരീക്ഷം തിരികെ കൊണ്ടുവരാനുള്ള സംയുക്ത ശ്രമങ്ങളുടെ ഭാഗമായാണ് ഈ ഉന്നതതല യോഗം ചേരുന്നത്. മേഖലയിലെ സംഘർഷം ലഘൂകരിക്കുന്നതിനൊപ്പം, സമുദ്ര വ്യാപാരത്തെ ബാധിച്ച ഹോർമുസ് കടലിടുക്കിലെ പ്രതിസന്ധി പരിഹരിക്കുന്നതിനും യോഗം മുൻഗണന നൽകുന്നു. ഈ ഉച്ചകോടിക്ക് മുന്നോടിയായി പാകിസ്​താൻ പ്രധാനമന്ത്രി ഷെഹ്ബാസ് ഷെരീഫ് ഇറാൻ പ്രസിഡൻറ്​ മസൂദ് പെസെഷ്കിയനുമായി ഒരു മണിക്കൂർ നീണ്ട ടെലിഫോൺ സംഭാഷണം നടത്തിയിരുന്നു. ഇറാനിലെ സിവിലിയൻ കേന്ദ്രങ്ങൾക്ക് നേരെ ഇസ്രായേൽ നടത്തുന്ന ആക്രമണങ്ങളെ പാകിസ്​താൻ ശക്തമായി അപലപിക്കുകയും ഇറാൻ ജനതയോട് ഐക്യദാർഢ്യം പ്രകടിപ്പിക്കുകയും ചെയ്തു. അമേരിക്കയുമായും മറ്റ് ഗൾഫ് രാജ്യങ്ങളുമായും പാകിസ്​താൻ നടത്തുന്ന നയതന്ത്ര നീക്കങ്ങളെക്കുറിച്ച് പ്രധാനമന്ത്രി ഇറാൻ പ്രസിഡൻറിനെ ബോധിപ്പിച്ചു. സമാധാനം പുനഃസ്ഥാപിക്കുന്നതിനായി പാകിസ്​താൻ നടത്തുന്ന മധ്യസ്ഥ ശ്രമങ്ങളെ ഇറാൻ സ്വാഗതം ചെയ്തിട്ടുണ്ട്. ഇതി​െൻറ ഭാഗമായി, ഹോർമുസ് കടലിടുക്കിലൂടെ കൂടുതൽ പാകിസ്​താൻ കപ്പലുകൾക്ക് കടന്നുപോകാൻ ഇറാൻ അനുമതി നൽകിയതായും റിപ്പോർട്ടുകളുണ്ട്. മേഖലയിലെ സമാധാനത്തിന് ചർച്ചകളും നയതന്ത്രവുമാണ് ഏക പോംവഴിയെന്ന് പാകിസ്​താൻ വിദേശകാര്യ മന്ത്രാലയം വ്യക്തമാക്കി.