ചെന്നൈ: തമിഴ്നാട് രാഷ്ട്രീയത്തിൽ പുതിയൊരു സൂര്യോദയം കുറിച്ചുകൊണ്ട് ദളപതി വിജയ്യുടെ തമിഴക വെട്രി കഴകം (TVK) ചരിത്രപരമായ വിജയത്തിലേക്ക് കുതിക്കുമ്പോൾ, അഭിനന്ദനങ്ങളുമായി സൂപ്പർതാരം ചിയാൻ വിക്രം രംഗത്തെത്തി. "അഭിനന്ദനങ്ങൾ നൻപാ, നീ ഇന്ന് ചരിത്രം സൃഷ്ടിച്ചു" എന്ന വിക്രമിന്റെ വാക്കുകൾ സോഷ്യൽ മീഡിയയിൽ നിമിഷനേരം കൊണ്ട് വൈറലായി.
ദശാബ്ദങ്ങളായി തമിഴ് മണ്ണിൽ ആധിപത്യം ഉറപ്പിച്ച ഡി.എം.കെ, എ.ഐ.എ.ഡി.എം.കെ എന്നീ വമ്പൻമാരെ വിറപ്പിച്ചുകൊണ്ടാണ് വിജയ്യുടെ മുന്നേറ്റം. തിരുച്ചിറപ്പള്ളി ഈസ്റ്റ്, പെരമ്പൂർ എന്നീ മണ്ഡലങ്ങളിൽ നിന്ന് ജനവിധി തേടിയ വിജയ് തുടക്കം മുതൽ തന്നെ വ്യക്തമായ ലീഡ് നിലനിർത്തിക്കൊണ്ട് ജനപ്രിയനായ രാഷ്ട്രീയ ബദലായി മാറിയിരിക്കുകയാണ്. പനയൂരിലെ വിജയ്യുടെ വസതിക്ക് മുന്നിൽ പുഷ്പവൃഷ്ടി നടത്തിയും പടക്കം പൊട്ടിച്ചും ആഘോഷിക്കുന്ന ആരാധകരുടെ ആവേശം അതിരുകടന്നതോടെ കനത്ത പോലീസ് സുരക്ഷയാണ് ഏർപ്പെടുത്തിയിരിക്കുന്നത്.
വിജയിന്റെ ഈ ഉജ്ജ്വല മുന്നേറ്റത്തിനിടയിൽ അദ്ദേഹത്തിന്റെ വ്യക്തിഗത ജ്യോത്സ്യൻ രാധൻ പണ്ഡിറ്റ് പൂച്ചെണ്ടുകളുമായി വസതിയിൽ എത്തിയത് മറ്റൊരു കൗതുകകരമായ കാഴ്ചയായി. വോട്ടെണ്ണലിന്റെ ആദ്യ മണിക്കൂറുകളിൽ തന്നെ വിജയം ഉറപ്പിച്ചതോടെയാണ് രാധൻ പണ്ഡിറ്റ് നേരിട്ടെത്തി ആശംസകൾ അറിയിച്ചത്.
ഈ സന്ദർശനത്തിന്റെ വീഡിയോകൾ പുറത്തുവന്നതോടെ, ദളപതിയുടെ രാഷ്ട്രീയ വിജയം നേരത്തെ തന്നെ പ്രവചിക്കപ്പെട്ടതാണെന്ന ആവേശത്തിലാണ് ആരാധകർ. രാഷ്ട്രീയ നിരീക്ഷകർ പോലും അമ്പരന്ന ഈ തരംഗം തമിഴ് രാഷ്ട്രീയത്തിലെ ദ്വികക്ഷി ഭരണത്തിന് അന്ത്യം കുറിക്കുമെന്ന സൂചനയാണ് നൽകുന്നത്. കേവലം ഒരു താരം എന്നതിലുപരി മാറ്റം ആഗ്രഹിക്കുന്ന തമിഴ് ജനതയുടെ ശബ്ദമായി വിജയ് മാറിയതിന്റെ പ്രതിഫലനമാണ് ഇപ്പോൾ കാണുന്ന വമ്പൻ ലീഡ്. വൈകുന്നേരത്തോടെ ഔദ്യോഗിക ഫലങ്ങൾ പുറത്തുവരുമ്പോൾ തമിഴ്നാട് ഒരു പുതിയ ഭരണാധികാരിയെ സ്വീകരിക്കാൻ തയ്യാറെടുക്കുകയാണ്.