ബേപ്പൂർ: 2026 നിയമസഭാ തിരഞ്ഞെടുപ്പിൽ 7,487 വോട്ടുകളുടെ ഭൂരിപക്ഷത്തിന് മണ്ഡലം നിലനിർത്തി ബേപ്പൂർ എൽഡിഎഫ് സ്ഥാനാർത്ഥി പി.എ. മുഹമ്മദ് റിയാസ്. മുഖ്യമന്ത്രി പിണറായി വിജയനും സർക്കാരിനുമെതിരെ രൂക്ഷമായ ആരോപണങ്ങൾ ഉന്നയിച്ച് യുഡിഎഫ് സ്വതന്ത്രനായി മത്സരിച്ച പി.വി. അൻവറിനെയാണ് റിയാസ് പരാജയപ്പെടുത്തിയത്. കഴിഞ്ഞ 35 വർഷമായി ഇടതുപക്ഷത്തെ മാത്രം തുണയ്ക്കുന്ന ബേപ്പൂരിൽ ഇക്കുറി പോരാട്ടം വ്യക്തിപരമായ തലത്തിലേക്ക് കൂടി മാറിയിരുന്നു.
എംഎൽഎ സ്ഥാനം രാജിവെച്ച് എൽഡിഎഫ് വിട്ട പി.വി. അൻവർ, 'പിണറായിസം', 'മരുമോനിസം' തുടങ്ങിയ പ്രയോഗങ്ങളിലൂടെ സർക്കാരിനെയും റിയാസിനെയും ലക്ഷ്യമിട്ടാണ് പ്രചാരണം നടത്തിയത്. യുഡിഎഫിന്റെയും മുസ്ലിം ലീഗിന്റെയും പൂർണ്ണ പിന്തുണയോടെ അൻവർ നടത്തിയ മുന്നേറ്റം ഇടതുകേന്ദ്രങ്ങളിൽ ആശങ്കയുണ്ടാക്കിയിരുന്നു. 2021-ൽ റിയാസ് നേടിയ 28,747 വോട്ടിന്റെ വമ്പൻ ഭൂരിപക്ഷം ഇത്തവണ 7,487 ആയി കുറയ്ക്കാൻ അൻവറിന് സാധിച്ചു എന്നത് പോരാട്ടത്തിന്റെ വീര്യം വ്യക്തമാക്കുന്നു.
മണ്ഡലത്തിൽ നടപ്പിലാക്കിയ 1800 കോടി രൂപയുടെ വികസന പ്രവർത്തനങ്ങൾ ഉയർത്തിക്കാട്ടിയാണ് റിയാസ് വോട്ടർമാരെ സമീപിച്ചത്. തദ്ദേശ തിരഞ്ഞെടുപ്പിൽ യുഡിഎഫ് ആധിപത്യം പുലർത്തിയ ഫറോക്ക്, രാമനാട്ടുകര നഗരസഭകളിലും ചെറുവണ്ണൂർ-നല്ലളം മേഖലയിലും അൻവർ വലിയ വെല്ലുവിളി ഉയർത്തിയെങ്കിലും, ബേപ്പൂരിലെയും കടലുണ്ടിയിലെയും ഉറച്ച ഇടത് വോട്ടുകൾ റിയാസിന്റെ തുണയ്ക്കെത്തി.
തദ്ദേശ തിരഞ്ഞെടുപ്പിൽ ഇടത് മുന്നണിയുടെ മേൽക്കൈ വെറും 1340 വോട്ടിലേക്ക് ചുരുങ്ങിയ സാഹചര്യത്തിൽ, മുഹമ്മദ് റിയാസ് നേടിയ ഈ വിജയം സിപിഎമ്മിനെ സംബന്ധിച്ചിടത്തോളം വലിയ ആശ്വാസമാണ്. വിദ്യാർത്ഥി-യുവജന പ്രസ്ഥാനങ്ങളിലൂടെ വളർന്ന റിയാസ്, ഭരണവിരുദ്ധ വികാരത്തെയും വ്യക്തിപരമായ ആക്രമണങ്ങളെയും വികസന രാഷ്ട്രീയത്തിലൂടെ മറികടന്നാണ് വീണ്ടും നിയമസഭയിലേക്ക് എത്തുന്നത്.