കോഴിക്കോട്: കടുത്ത വേനലില് കുടിവെള്ള ലഭ്യത കുറഞ്ഞതോടെ പഞ്ചായത്ത് അധികൃതരെ ബന്ധപ്പെട്ട നാട്ടുകാര്ക്ക് എത്തിച്ചു നല്കിയത് ചെളിവെള്ളമെന്ന് വ്യാപക പരാതി. കോഴിക്കോട് ഓമശ്ശേരി പഞ്ചായത്തിലാണ് പരാതി ഉയര്ന്നിരിക്കുന്നത്. പഞ്ചായത്തിലെ നിരവധി പ്രദേശങ്ങളില് കുടിവെള്ള ക്ഷാമം അതി രൂക്ഷമാണ്. ഇതിനിടെ മൂന്നാം വാര്ഡില് ഉള്പ്പെട്ട അന്ധനാര് കാവ് ഭാഗത്ത് താമസിക്കുന്നവര്ക്കാണ് ചെളിവെള്ളം വിതരണം ചെയ്തതായി പരാതി ഉയര്ന്നിരിക്കുന്നത്.
കഴിഞ്ഞ ദിവസമാണ് പഞ്ചായത്തിന്റെ നേതൃത്വത്തില് കുടിവെള്ളം എത്തിച്ചത്. ബക്കറ്റുകളിലും കന്നാസുകളിലുമായി വെള്ളം ശേഖരിച്ച നാട്ടുകാര് കലക്കുനിറഞ്ഞ ചെളിവെള്ളം കണ്ട് ഞെട്ടുകയായിരുന്നു. ഇതോടെ അധികൃതര്ക്കെതിരേ വ്യാപകമായ പരാതിയും പ്രതിഷേധവും ഉയര്ന്നു. ഇത്രയും ഗുരുതരമായ സാഹചര്യം നിലനില്ക്കുമ്പോള് പഞ്ചായത്തിന്റെ നേതൃത്വത്തില് ജനങ്ങള്ക്ക് ഉപയോഗിക്കാനായി ചെളിവെള്ളം നല്കിയതിലെ അനാസ്ഥക്കെതിരെയാണ് ജനങ്ങളുടെ പ്രതിഷേധം ഉണ്ടായത്.