കൊൽക്കത്ത: ബംഗാളിലെ ഫൽത്ത നിയമസഭാ മണ്ഡലത്തിൽ തെരഞ്ഞെടുപ്പ് കമ്മീഷൻ റീപോളിങ് പ്രഖ്യാപിച്ചതിന് പിന്നാലെ ബിജെപിക്കും കേന്ദ്ര സർക്കാരിനും എതിരെ ആഞ്ഞടിച്ച് തൃണമൂൽ കോൺഗ്രസ് ജനറൽ സെക്രട്ടറി അഭിഷേക് ബാനർജി. മെയ് 21-നാണ് മണ്ഡലത്തിൽ വീണ്ടും വോട്ടെടുപ്പ് നടക്കുക. വ്യാപകമായ ക്രമക്കേടുകൾ കണ്ടെത്തിയതിനെത്തുടർന്നാണ് മണ്ഡലത്തിലെ മുഴുവൻ ബൂത്തുകളിലും റീപോളിങ് നടത്താൻ കമ്മീഷൻ തീരുമാനിച്ചത്.
"ബംഗാൾ വിരുദ്ധരായ ഗുജറാത്തി ഗ്യാങ്ങിന് പത്ത് ജന്മമെടുത്താലും തന്റെ ഡയമണ്ട് ഹാർബർ മോഡലിൽ പോറലേൽപ്പിക്കാൻ കഴിയില്ല" എന്ന് അഭിഷേക് ബാനർജി എക്സിൽ (ട്വിറ്റർ) കുറിച്ചു. സർവസന്നാഹങ്ങളുമായി വന്ന് ഫൽത്തയിൽ മത്സരിക്കാൻ വെല്ലുവിളിച്ച അദ്ദേഹം, ഡൽഹിയിലുള്ള ഏത് ഗോഡ്ഫാദർമാരെ വേണമെങ്കിലും അയച്ചുകൊള്ളാനും കേന്ദ്ര സർക്കാരിനോട് പറഞ്ഞു.
രണ്ടാം ഘട്ട തെരഞ്ഞെടുപ്പ് നടന്ന ഏപ്രിൽ 29-നാണ് ഫൽത്തയിൽ ആദ്യം വോട്ടെടുപ്പ് നടന്നത്. എന്നാൽ, 22 ശതമാനം ബൂത്തുകളിലും ബിജെപി സ്ഥാനാർത്ഥിയുടെ ചിഹ്നത്തിന് മുകളിൽ കറുത്ത ടേപ്പും മഷിയും ഉപയോഗിച്ച് മറച്ച നിലയിൽ കണ്ടെത്തിയിരുന്നു. ഇത് ജനവിധിയെ അട്ടിമറിക്കാനുള്ള ശ്രമമാണെന്ന് കമ്മീഷൻ വിലയിരുത്തി. കൂടാതെ, മറ്റ് പല ബൂത്തുകളിലെയും വീഡിയോ ദൃശ്യങ്ങളിൽ വ്യക്തതയില്ലാത്തതും അട്ടിമറി സാധ്യത വർദ്ധിപ്പിച്ചു. ഈ സാഹചര്യത്തിലാണ് മണ്ഡലത്തിലുടനീളം റീപോളിങ് നടത്താൻ തീരുമാനമായത്.
ഫൽത്തയിലെ വോട്ടെണ്ണൽ മെയ് 24-ലേക്ക് മാറ്റിയിട്ടുണ്ട്. ബംഗാൾ നിയമസഭാ തെരഞ്ഞെടുപ്പ് ഫലം മെയ് 4-ന് പുറത്തുവരാനിരിക്കെ, ഫൽത്തയിലെ ഈ അപ്രതീക്ഷിത റീപോളിങ് രാഷ്ട്രീയ കേന്ദ്രങ്ങളിൽ വലിയ ചർച്ചയായിരിക്കുകയാണ്. ഭരണകക്ഷിയായ തൃണമൂലും ബിജെപിയും തമ്മിലുള്ള പോരാട്ടം ഈ മണ്ഡലത്തിൽ കൂടുതൽ വ്യക്തിപരമായ തലത്തിലേക്ക് നീങ്ങുന്ന കാഴ്ചയാണിപ്പോൾ. വോട്ടെണ്ണൽ പൂർത്തിയാകാൻ ദിവസങ്ങൾ ബാക്കിനിൽക്കെ അഭിഷേക് ബാനർജിയുടെ ഈ കടന്നാക്രമണം രാഷ്ട്രീയ താപനില വീണ്ടും വർദ്ധിപ്പിച്ചിരിക്കുകയാണ്.