വടകര: വടകരയിൽ വീണ്ടും ആർഎംപിഐ-യുഡിഎഫ് തരംഗം ആഞ്ഞടിക്കുമ്പോൾ, വിപ്ലവ മണ്ണിൽ പരാജയത്തിന്റെ കയ്പുനീർ കുടിച്ച് ഇടതുമുന്നണി. കേരളം ഉറ്റുനോക്കിയ അതിശക്തമായ പോരാട്ടത്തിനൊടുവിൽ കെ.കെ. രമ 14,862 വോട്ടുകളുടെ ഉജ്ജ്വല ഭൂരിപക്ഷത്തോടെ വടകര മണ്ഡലം നിലനിർത്തി.
എതിരാളികളെ ബഹുദൂരം പിന്നിലാക്കിയ രമ 70,117 വോട്ടുകൾ വാരിക്കൂട്ടിയപ്പോൾ, ഇടതുകോട്ട തിരിച്ചുപിടിക്കാനിറങ്ങിയ എൽഡിഎഫ് സ്ഥാനാർത്ഥി എം.കെ. ഭാസ്കരന് 55,255 വോട്ടുകൾ കൊണ്ട് തൃപ്തിപ്പെടേണ്ടി വന്നു. ബിജെപി സ്ഥാനാർത്ഥി അഡ്വ. കെ. ദിലീപ് 14,295 വോട്ടുകൾ നേടി മണ്ഡലത്തിൽ സാന്നിധ്യമറിയിച്ചു. കമ്മ്യൂണിസ്റ്റ്-സോഷ്യലിസ്റ്റ് പ്രസ്ഥാനങ്ങൾക്ക് വലിയ സ്വാധീനമുള്ള വടകരയിൽ, അക്രമ രാഷ്ട്രീയത്തിനെതിരെയുള്ള ജനവിധിയായാണ് രാഷ്ട്രീയ നിരീക്ഷകർ ഈ വിജയത്തെ വിലയിരുത്തുന്നത്.
ടി.പി. ചന്ദ്രശേഖരന്റെ വധത്തിന് ശേഷം വടകരയിലെ രാഷ്ട്രീയ ചിത്രം അടിമുടി മാറിയിരുന്നു. 2021-ൽ ആദ്യമായി നിയമസഭയിലേക്ക് മത്സരിച്ച കെ.കെ. രമ 7,491 വോട്ടുകൾക്കായിരുന്നു വിജയിച്ചതെങ്കിൽ, ഇത്തവണ ആ ഭൂരിപക്ഷം ഇരട്ടിയോളമായി വർദ്ധിപ്പിച്ചത് വടകരയിലെ ജനങ്ങൾ രമയുടെ നിലപാടുകൾക്ക് നൽകുന്ന വലിയ അംഗീകാരമായാണ് കാണുന്നത്.
2021-ൽ 57,602 വോട്ടുകൾ നേടിയ എൽഡിഎഫിന് ഇക്കുറി അയ്യായിരത്തോളം വോട്ടുകൾ കുറഞ്ഞത് സി.പി.എമ്മിന് വലിയ തിരിച്ചടിയായി. അതേസമയം, ബിജെപി തങ്ങളുടെ വോട്ട് വിഹിതം വർദ്ധിപ്പിച്ചതും ഇത്തവണ ശ്രദ്ധേയമായി. വടകരയുടെ വികസനത്തിനൊപ്പം അക്രമരഹിത രാഷ്ട്രീയമെന്ന മുദ്രാവാക്യം വോട്ടർമാർ നെഞ്ചേറ്റിയതാണ് രമയുടെ ഈ ചരിത്രവിജയത്തിന് ആധാരമായത്.