വാഷിംഗ്ടണ്: പശ്ചിമേഷ്യന് യുദ്ധത്തെത്തുടര്ന്ന് ഹോര്മുസ് കടലിടുക്കില് ഇറാന് ഏര്പ്പെടുത്തിയ നിയന്ത്രണങ്ങള് ആഗോള എണ്ണ വിപണിയെ മാറ്റിമറിക്കുന്നു. ചരക്ക് നീക്കം തടസ്സപ്പെട്ടതോടെ ലോകരാജ്യങ്ങള് അമേരിക്കന് എണ്ണയ്ക്കായി ടെക്സസിലേക്ക് ഒഴുകുകയാണ്. ഇതോടെ അമേരിക്കയുടെ ക്രൂഡ് ഓയില് കയറ്റുമതി റെക്കോര്ഡ് വേഗത്തിലായി. യുഎസിലെ ഏറ്റവും വലിയ എണ്ണ കയറ്റുമതി കേന്ദ്രമായ ടെക്സസിലെ കോര്പ്പസ് ക്രിസ്റ്റി തുറമുഖത്ത് കഴിഞ്ഞ ആഴ്ചകളില് മാത്രം എണ്ണ നീക്കത്തില് 30 ശതമാനത്തിന്റെ വര്ദ്ധനവാണുണ്ടായത്.
ഫെബ്രുവരിയില് യുദ്ധം ആരംഭിച്ചത് മുതല് ഹോര്മുസ് കടലിടുക്ക് ഇറാന് ഭാഗികമായി തടഞ്ഞുവെച്ചിരിക്കുകയാണ്. ലോകത്തെ എണ്ണ-വാതക വ്യാപാരത്തിന്റെ അഞ്ചിലൊന്നും നടക്കുന്നത് ഈ ഇടുങ്ങിയ പാതയിലൂടെയാണ്. ഇവിടെ പ്രതിസന്ധി രൂക്ഷമായതോടെ ഏഷ്യന് രാജ്യങ്ങള് ഉള്പ്പെടെയുള്ളവര് അമേരിക്കന് ക്രൂഡ് ഓയിലിനായി വലിയ തോതില് ഓര്ഡറുകള് നല്കിത്തുടങ്ങി. ഏപ്രിലില് പ്രതിദിനം 5.2 ദശലക്ഷം ബാരല് എണ്ണയാണ് അമേരിക്ക കയറ്റുമതി ചെയ്തത്. ഫെബ്രുവരിയില് ഇത് 3.9 ദശലക്ഷം ബാരല് മാത്രമായിരുന്നു. ചരിത്രത്തിലാദ്യമായാണ് അമേരിക്ക ഇത്ര വലിയ അളവില് എണ്ണ വിദേശ രാജ്യങ്ങളിലേക്ക് അയക്കുന്നത്.
ടെക്സസ് തുറമുഖത്തെ തിരക്ക് 'കപ്പലുകളുടെ ഘോഷയാത്ര' പോലെയാണെന്ന് പോര്ട്ട് സിഇഒ കെന്റ് ബ്രിട്ടന് വിശേഷിപ്പിച്ചു. മാര്ച്ചില് മാത്രം പ്രതിദിനം 2.5 ദശലക്ഷം ബാരല് എണ്ണയാണ് ഇവിടെ നിന്ന് നീക്കം ചെയ്തത്. ഏപ്രിലില് അമേരിക്ക നടത്തിയ ആകെ കയറ്റുമതിയുടെ പകുതിയും കോര്പ്പസ് ക്രിസ്റ്റി വഴിയായിരുന്നു. ഇതോടെ ലോകത്തിലെ ഏറ്റവും വലിയ മൂന്നാമത്തെ എണ്ണ കയറ്റുമതി ടെര്മിനലായി ഈ തുറമുഖം മാറി. വരും ദിവസങ്ങളില് 60 ഓളം കൂറ്റന് എണ്ണക്കപ്പലുകള് കൂടി ഇവിടെ എത്തുമെന്നാണ് റിപ്പോര്ട്ടുകള് സൂചിപ്പിക്കുന്നത്.
അതേസമയം, യുദ്ധം തുടങ്ങുന്നതിന് തൊട്ടുമുമ്പ് ഹോര്മുസ് കടലിടുക്കില് നിന്ന് പുറപ്പെട്ട അവസാന എണ്ണക്കപ്പലുകള് ഈ ആഴ്ച കാലിഫോര്ണിയന് തീരത്തെത്തി. എന്നാല് വരും ദിവസങ്ങളില് കാലിഫോര്ണിയ ഉള്പ്പെടെയുള്ള അമേരിക്കന് സംസ്ഥാനങ്ങളില് എണ്ണക്ഷാമം രൂക്ഷമാകാന് സാധ്യതയുണ്ടെന്ന് വിദഗ്ധര് മുന്നറിയിപ്പ് നല്കുന്നു. നിലവില് ഒരു ഗാലന് പെട്രോളിന് 6 ഡോളര് (ഏകദേശം 500 രൂപ) എന്ന നിരക്കിലാണ് കാലിഫോര്ണിയയില് വില. ഇറാനില് നിന്നുള്ള ഇറക്കുമതി നിലയ്ക്കുന്നതോടെ ബ്രസീല്, കാനഡ, ഇക്വഡോര് തുടങ്ങിയ രാജ്യങ്ങളെ ആശ്രയിക്കേണ്ട അവസ്ഥയിലാണ് കാലിഫോര്ണിയയിലെ റിഫൈനറികള്.
അമേരിക്കന് എണ്ണയ്ക്ക് നിലവില് ആവശ്യക്കാര് ഏറെയുണ്ടെങ്കിലും മിഡില് ഈസ്റ്റില് നിന്നുള്ള എണ്ണയ്ക്ക് ഇത് പൂര്ണ്ണമായ പകരമാവില്ലെന്ന് വിപണി നിരീക്ഷകര് ചൂണ്ടിക്കാട്ടുന്നു. അമേരിക്ക ഉല്പ്പാദിപ്പിക്കുന്നത് 'ലൈറ്റ് സ്വീറ്റ് ക്രൂഡ്' വിഭാഗത്തില്പ്പെട്ട എണ്ണയാണ്. എന്നാല് ലോകത്തെ പല റിഫൈനറികളും മിഡില് ഈസ്റ്റില് നിന്നുള്ള മീഡിയം ക്രൂഡ് ഉപയോഗിക്കാനാണ് സജ്ജീകരിച്ചിരിക്കുന്നത്.
അതിനാല് ഹോര്മുസ് കടലിടുക്ക് ദീര്ഘകാലം അടഞ്ഞുകിടക്കുന്നത് ആഗോള സമ്പദ്വ്യവസ്ഥയെ ഗുരുതരമായി ബാധിക്കുമെന്നും ഇതിന് പരിഹാരം മിഡില് ഈസ്റ്റിലെ സമാധാനം മാത്രമാണെന്നും സാമ്പത്തിക വിദഗ്ധര് ഓര്മ്മിപ്പിക്കുന്നു.