ചെന്നൈ: തമിഴ്നാട് നിയമസഭാ തിരഞ്ഞെടുപ്പിൽ തമിഴക വെട്രി കഴകം (TVK) ചരിത്രപരമായ വിജയത്തിലേക്ക് കുതിക്കുമ്പോൾ, തമിഴ് രാഷ്ട്രീയത്തിന്റെ പുതിയ നായകന് ആശംസകളുമായി തെലുങ്ക് സൂപ്പർതാരം വിജയ് ദേവരകൊണ്ട. തമിഴ് രാഷ്ട്രീയത്തിലെ പുതിയ ഘട്ടത്തെയും പുതിയ മുഖത്തെയും കാണാൻ താൻ ആകാംക്ഷയോടെ കാത്തിരിക്കുകയാണെന്ന് താരം തന്റെ സോഷ്യൽ മീഡിയ പോസ്റ്റിൽ കുറിച്ചു.
"പുതിയ തുടക്കം വിജയ് ഗാരു! ജനങ്ങൾ ഒന്നടങ്കം വോട്ട് രേഖപ്പെടുത്താനും അവർക്കു വേണ്ടി നിലകൊള്ളാനും കാണിച്ച ഈ കരുത്തിന് തമിഴ്നാട്ടിലെ ജനങ്ങളോട് എനിക്കുള്ള ആദരവും അഭിനന്ദനങ്ങളും അറിയിക്കുന്നു," എന്ന് താരം കുറിച്ചു. തമിഴ്നാട്ടിലെ ജനങ്ങൾക്കും പുതിയ മുഖ്യമന്ത്രിക്കും ഐശ്വര്യവും കൂട്ടായ വളർച്ചയും ഉണ്ടാകട്ടെ എന്നും ദേവരകൊണ്ട ആശംസിച്ചു.
സിനിമയിൽ നിന്ന് രാഷ്ട്രീയത്തിലേക്ക് ചുവടുവെച്ച വിജയിന്റെ ഈ പടയോട്ടത്തെ ഇന്ത്യയിലെ ഇതര സിനിമാ വ്യവസായങ്ങൾ എത്രത്തോളം ഗൗരവത്തോടെയാണ് കാണുന്നതെന്ന് ദേവരകൊണ്ടയുടെ വാക്കുകൾ വ്യക്തമാക്കുന്നു.
സിനിമാ മേഖലയിലെ സഹപ്രവർത്തകർക്കപ്പുറം രാഷ്ട്രീയത്തിലെ പുതിയ മാറ്റത്തെ വരവേൽക്കുന്ന യുവതലമുറയുടെ പ്രതിനിധിയായി താരം മാറി. ദേവരകൊണ്ടയുടെ പോസ്റ്റ് ഇതിനോടകം തന്നെ സോഷ്യൽ മീഡിയയിൽ തമിഴ്-തെലുങ്ക് ആരാധകർ ഏറ്റെടുത്തു കഴിഞ്ഞു. വിജയിയുടെ ഈ ഭരണമാറ്റം തെന്നിന്ത്യൻ രാഷ്ട്രീയത്തിൽ പുതിയ ചർച്ചകൾക്ക് തുടക്കമിടുമെന്നുറപ്പാണ്.