തിരുവനന്തപുരം: വെള്ളായണി ശിവോദയം റോഡിന് സമീപമുള്ള മാംഗ്ലിക്കരി പാടശേഖരത്തിൽ വ്യാപകമായ തീപിടിത്തം. വിവിധ വ്യക്തികളുടെ ഉടമസ്ഥതയിലുള്ള ഏകദേശം 150 ഏക്കറോളം വരുന്ന പാടശേഖരത്തിലെ അടിക്കാടാണ് ഞായറാഴ്ച ഉച്ചയ്ക്ക് 2.30-ഓടെ കത്തിയത്. ഉണങ്ങിയ പുല്ലും കാടും കത്തിനശിച്ചതോടെ പ്രദേശമാകെ പുകപടലങ്ങൾ കൊണ്ട് നിറഞ്ഞു.
സംഭവസ്ഥലത്തെത്തിയ ഫയർഫോഴ്സ് സ്ഥിതിഗതികൾ നിയന്ത്രണവിധേയമാക്കി. പാടശേഖരത്തിൽ പലയിടത്തും പച്ചപ്പുള്ളതിനാൽ തീ വലിയ രീതിയിൽ ആളിപ്പടർന്നില്ലെങ്കിലും, ഉണങ്ങിയ ഭാഗങ്ങൾ കത്തിയുണ്ടായ കനത്ത പുക പരിസരവാസികൾക്ക് വലിയ ബുദ്ധിമുട്ടുണ്ടാക്കി. തീ ജനവാസ മേഖലകളിലേക്ക് പടരാനുള്ള സാധ്യതയില്ലെന്നാണ് പ്രാഥമിക നിഗമനം.
വാർഡ് മെമ്പറെയും നാട്ടുകാരെയും നേരിൽക്കണ്ട് സ്ഥിതിഗതികൾ വിശദീകരിച്ച അധികൃതർ, ജാഗ്രത പാലിക്കണമെന്നും വീണ്ടും തീ പടരുന്ന സാഹചര്യം ശ്രദ്ധയിൽപ്പെട്ടാൽ ഉടൻ ഫയർഫോഴ്സിനെ വിവരമറിയിക്കണമെന്നും നിർദ്ദേശം നൽകി. വേനൽ കടുക്കുന്ന സാഹചര്യത്തിൽ അടിക്കാടുകൾക്ക് തീപിടിക്കുന്നത് തടയാൻ പൊതുജനങ്ങൾ ശ്രദ്ധിക്കണമെന്ന് അധികൃതർ ഓർമ്മിപ്പിച്ചു.