സംവിധായകനും ബിഗ് ബോസ് മലയാളം സീസൺ 5 വിജയിയുമായ അഖിൽ മാരാർക്ക് പതിനൊന്നാം വിവാഹ വാർഷികം. പുതുവർഷ ദിനത്തിൽ ഭാര്യ ലക്ഷ്മിക്ക് ഡയമണ്ട് നെക്ലേസും മോതിരവും സമ്മാനിച്ചാണ് അദ്ദേഹം ഈ സുപ്രധാന ദിനം ആഘോഷിച്ചത്. ഒരു കാലത്ത് സാമ്പത്തിക ബുദ്ധിമുട്ടുകൾ കാരണം ഭാര്യയുടെ താലിമാല വിൽക്കേണ്ടി വന്ന തന്റെ ഭൂതകാലം ഓർമ്മിപ്പിച്ചുകൊണ്ടായിരുന്നു അഖിൽ ഈ സന്തോഷം പങ്കുവെച്ചത്.
സമൂഹമാധ്യമങ്ങളിലൂടെയാണ് അഖിൽ മാരാർ തന്റെ വൈകാരികമായ നിമിഷം ആരാധകരുമായി പങ്കുവെച്ചത്. "താലിമാല വിറ്റ ഭർത്താവിൽ നിന്നും ഡയമണ്ട് നെക്ലേസും, ഡയമണ്ട് മോതിരവും ഗിഫ്റ്റായി നൽകുമ്പോൾ ഈ മെയിൽ ഷോവനിസ്റ്റിന് ഒരഭിമാനം" എന്ന് അദ്ദേഹം കുറിച്ചു. 108 ഡയമണ്ടുകൾ പതിച്ച മാലയാണ് ലക്ഷ്മിക്ക് സമ്മാനിച്ചതെന്ന് അഖിൽ വീഡിയോയിൽ പറയുന്നുണ്ട്.
ഭാര്യ ലക്ഷ്മി തിരിച്ചൊരു സമ്മാനവും അഖിലിന് നൽകി. ത്രിശൂലം മാതൃകയിലുള്ള കമ്മലാണ് അഖിലിനുള്ള ലക്ഷ്മിയുടെ സമ്മാനം. ജനുവരി 1 തനിക്ക് വിവാഹം നടന്ന ദിവസവും ഒരു സിനിമ സംവിധാനം ചെയ്ത ദിവസവുമാണെന്നും അഖിൽ ഓർമ്മിപ്പിച്ചു.
'ഒരു താത്വിക അവലോകനം' എന്ന ചിത്രത്തിലൂടെയാണ് അഖിൽ മാരാർ സംവിധാന രംഗത്തേക്ക് കടന്നുവന്നത്. പിന്നീട് ബിഗ് ബോസ് മലയാളം സീസൺ 5-ലെ വിജയിയായി ജനശ്രദ്ധ നേടി. അടുത്തിടെ 'മുള്ളൻകൊല്ലി' എന്ന സിനിമയിലും അദ്ദേഹം അഭിനയിച്ചിരുന്നു. ഈ മനോഹര നിമിഷം പങ്കുവെച്ചതിന് പിന്നാലെ നിരവധി ആരാധകരും സുഹൃത്തുക്കളുമാണ് അഖിലിനും ലക്ഷ്മിക്കും ആശംസകളുമായി രംഗത്തെത്തിയത്.