പുതുച്ചേരി: നിയമസഭാ തിരഞ്ഞെടുപ്പ് ഫലം പുറത്തുവരുമ്പോള് കേന്ദ്രഭരണപ്രദേശമായ പുതുച്ചേരിയില് അധികാരം നിലനിര്ത്തി എന്.ഡി.എ. 30 അംഗ നിയമസഭയില് കേവലഭൂരിപക്ഷത്തിന് വേണ്ട 16 സീറ്റുകള് ഉറപ്പിച്ചുകൊണ്ടാണ് എന്.ഡി.എ. വീണ്ടും അധികാരത്തിലേക്ക് ചുവടുവെക്കുന്നത്. ഭരണവിരുദ്ധ വികാരത്തെ അതിജീവിച്ച് എന്.ഡി.എ. സഖ്യം നടത്തിയ മുന്നേറ്റം പുതുച്ചേരി രാഷ്ട്രീയത്തില് നിര്ണ്ണായകമായി.
എന്.ഡി.എ. സഖ്യത്തിലെ പ്രമുഖ കക്ഷിയായ ഓള് ഇന്ത്യ എന്.ആര്. കോണ്ഗ്രസ് (എ.ഐ.എന്.ആര്.സി) ഒന്പത് സീറ്റുകളില് വിജയിച്ചു. കൂടാതെ മൂന്ന് സീറ്റുകളില് അവര് ലീഡ് നിലനിര്ത്തുന്നുമുണ്ട്. സഖ്യകക്ഷിയായ ബിജെപി മണ്ണാടിപ്പേട്ട്, നെരവി-ടി.ആര് പട്ടണം എന്നീ മണ്ഡലങ്ങളുള്പ്പെടെ മൂന്ന് സീറ്റുകളില് വിജയം ഉറപ്പിച്ചു. ഒരു സീറ്റില് ബിജെപി ലീഡ് ചെയ്യുന്നു. എ.ഐ.എന്.ആര്.സി. സ്ഥാപകനും മുഖ്യമന്ത്രിയുമായ എന്. രംഗസ്വാമി തന്റെ തട്ടകമായ തട്ടാഞ്ചാവടി മണ്ഡലത്തില് നിന്നും മികച്ച ഭൂരിപക്ഷത്തോടെ വിജയിച്ചുകയറി. രംഗസ്വാമിയുടെ വ്യക്തിപ്രഭാവവും വികസന നേട്ടങ്ങളുമാണ് ഭരണത്തുടര്ച്ചയ്ക്ക് കളമൊരുക്കിയതെന്ന് രാഷ്ട്രീയ നിരീക്ഷകര് വിലയിരുത്തുന്നു.
ഇന്ത്യ മുന്നണിയുടെ ഭാഗമായ കോണ്ഗ്രസ്-ഡി.എം.കെ-വി.സി.കെ സഖ്യത്തിന് പുതുച്ചേരിയില് വലിയ ചലനമുണ്ടാക്കാന് സാധിച്ചില്ല. ഡി.എം.കെ. ഒരു സീറ്റില് വിജയിക്കുകയും നാല് സീറ്റുകളില് ലീഡ് ചെയ്യുകയും ചെയ്യുന്നുണ്ട്. നെല്ലിത്തോപ്പ് മണ്ഡലം ബിജെപിയില് നിന്നും പിടിച്ചെടുക്കാന് സാധിച്ചത് ഡി.എം.കെയ്ക്ക് നേട്ടമായി. എങ്കിലും മൊത്തത്തിലുള്ള പ്രകടനത്തില് പ്രതിപക്ഷ സഖ്യം പിന്നിലായിപ്പോയി.
തമിഴ്നാട്ടില് വന് തരംഗം സൃഷ്ടിച്ച നടന് വിജയ്യുടെ തമിഴക വെട്രി കഴകം (ടി.വി.കെ) പുതുച്ചേരിയിലും സാന്നിധ്യമറിയിച്ചു. കന്നിപ്പോരാട്ടത്തില് രണ്ട് സീറ്റുകളില് വിജയിക്കാന് ടി.വി.കെയ്ക്ക് സാധിച്ചു എന്നത് ശ്രദ്ധേയമായ കാര്യമാണ്. മൂന്ന് സീറ്റുകളില് സ്വതന്ത്ര സ്ഥാനാര്ത്ഥികളാണ് വിജയിച്ചത്. കതിര്കാമം, നെടുങ്കാട്, മാഹി മണ്ഡലങ്ങളിലാണ് സ്വതന്ത്രര് വിജയം കൊയ്തത്. ഇതില് മാഹിയില് വിജയിച്ച അഡ്വ. ടി. അശോക് കുമാര് എല്.ഡി.എഫ് പിന്തുണയോടെ മത്സരിച്ച സ്വതന്ത്രനാണ്.
ഏപ്രില് ഒന്പതിന് നടന്ന വോട്ടെടുപ്പില് മുഖ്യമന്ത്രി എന്. രംഗസ്വാമി ഉള്പ്പെടെ 294 സ്ഥാനാര്ത്ഥികളാണ് ജനവിധി തേടിയത്. പുതുച്ചേരി, കാരയ്ക്കല്, മാഹി, യാനം എന്നീ നാല് മേഖലകളിലായി വ്യാപിച്ചുകിടക്കുന്ന 30 മണ്ഡലങ്ങളിലും വോട്ടെണ്ണല് പൂര്ത്തിയാകുമ്പോള് എന്.ഡി.എ സഖ്യത്തിന് വ്യക്തമായ ആധിപത്യം ലഭിച്ചു കഴിഞ്ഞു. എ.ഐ.എന്.ആര്.സി, ബിജെപി, എ.ഐ.എ.ഡി.എം.കെ സഖ്യം വീണ്ടും അധികാരമേല്ക്കുന്നതോടെ പുതുച്ചേരിയില് വികസന പ്രവര്ത്തനങ്ങളുടെ തുടര്ച്ചയാണ് ജനങ്ങള് പ്രതീക്ഷിക്കുന്നത്.