ചെന്നൈ: തമിഴ് രാഷ്ട്രീയത്തിന്റെ തറവാട് കോട്ടകള് തകര്ത്തെറിഞ്ഞ് ഇളയ ദളപതി വിജയ്യുടെ തമിഴക വെട്രി കഴകം തമിഴ്നാട്ടില് അവിശ്വസനീയമായ മുന്നേറ്റം കാഴ്ചവയ്ക്കുന്നു. വോട്ടെണ്ണല് പുരോഗമിക്കുമ്പോള് ദ്രാവിഡ രാഷ്ട്രീയത്തിലെ അതികായന്മാരായ ഡിഎംകെയെയും എഐഡിഎംകെയെയും അപ്രസക്തരാക്കി വിജയ്യുടെ പാര്ട്ടി ഏറ്റവും വലിയ ഒറ്റകക്ഷിയായി മാറുകയാണ്. എംജിആറിനും ജയലളിതയ്ക്കും ശേഷം സിനിമയില് നിന്ന് തമിഴ് ജനതയുടെ ഹൃദയം കീഴടക്കി മുഖ്യമന്ത്രി കസേരയിലേക്ക് ഒരു താരം കൂടി എത്തുന്നു എന്ന സൂചനയാണ് ചെന്നൈയില് നിന്നും വരുന്നത്.
രജനികാന്ത് രാഷ്ട്രീയത്തിലേക്ക് ഇറങ്ങാന് ഭയന്നു മാറിനിന്നപ്പോഴും, കമല്ഹാസന് ജനമനസ്സുകളില് അത്ഭുതം കാട്ടാന് കഴിയാതിരുന്നപ്പോഴും വിജയ് എന്ന താരത്തിന് തമിഴ് മണ്ണ് നല്കിയ അംഗീകാരം രാഷ്ട്രീയ നിരീക്ഷകരെ പോലും ഞെട്ടിച്ചിരിക്കുകയാണ്. ക്യാപ്റ്റന് വിജയകാന്തിന് പ്രതിപക്ഷ നേതാവ് എന്നതിനപ്പുറം വളരാന് കഴിഞ്ഞില്ല എന്ന ചരിത്രവും ശരത് കുമാര്, നഗ്മ തുടങ്ങിയ താരങ്ങളുടെ രാഷ്ട്രീയ പരാജയങ്ങളും നിലനില്ക്കെയാണ് 'ജോസഫ് വിജയ് ചന്ദ്രശേഖര്' എന്ന പേര് തമിഴകത്തെ പുതിയ അധികാര കേന്ദ്രമായി മാറുന്നത്. ചെറു കക്ഷികളുടെ പിന്തുണയില് വിജയിന് തമിഴകം ഭരിക്കാനാകും. ഇതാണ് അവിടുത്തെ തിരഞ്ഞെടുപ്പ് ചിത്രം.
തിരഞ്ഞെടുപ്പ് പ്രഖ്യാപിച്ചത് മുതല് വിജയിനെയും അദ്ദേഹത്തിന്റെ പാര്ട്ടിയെയും പുച്ഛിച്ചു തള്ളിയവര്ക്കുള്ള ശക്തമായ മറുപടിയാണ് ഈ ജനവിധി. വെറും സിനിമാ താരമെന്നും രാഷ്ട്രീയ പ്രാഗത്ഭ്യമില്ലാത്തവനെന്നും വിളിച്ചാക്ഷേപിച്ച ഡിഎംകെ-എഐഡിഎംകെ നേതൃത്വങ്ങള് ഇന്ന് വിജയ് തരംഗത്തിന് മുന്നില് പകച്ചുനില്ക്കുകയാണ്. ദ്രാവിഡ രാഷ്ട്രീയത്തിന്റെ വമ്പന് സ്രാവുകള് നീന്തിത്തുടിച്ച കടലില് സ്രാവിനെ പോലെ വിജയ് ആധിപത്യം ഉറപ്പിക്കുന്നത് ഇന്ത്യന് രാഷ്ട്രീയവും കൗതുകത്തോടെയാണ് നോക്കിക്കാണുന്നത്.
ഭരണകക്ഷിയായ ഡിഎംകെയുടെ സകല കണക്കുകൂട്ടലുകളും തെറ്റിച്ചുകൊണ്ടാണ് മണ്ഡലങ്ങളില് ടിവികെ സ്ഥാനാര്ത്ഥികള് മുന്നേറുന്നത്. മുഖ്യമന്ത്രി എം.കെ. സ്റ്റാലിന്റെ ഭരണനേട്ടങ്ങള് ഉയര്ത്തിക്കാട്ടിയുള്ള പ്രചാരണം വിജയ് ഉയര്ത്തിയ 'മാറ്റത്തിനായുള്ള ആഹ്വാന'ത്തിന് മുന്നില് വിലപ്പോയില്ല. യുവാക്കളുടെയും സ്ത്രീകളുടെയും വോട്ടുകള് വന്തോതില് വിജയ്യുടെ പെട്ടിയില് വീണതാണ് ഈ അപ്രതീക്ഷിത വിജയത്തിന് പിന്നിലെ രഹസ്യം.
വിജയിനെ കേവലം ഒരു ഗ്ലാമര് താരമായി കണ്ടവര്ക്ക് അദ്ദേഹത്തിന്റെ കൃത്യമായ രാഷ്ട്രീയ നിലപാടുകള് തിരിച്ചടിയായി. ദ്രാവിഡ പാരമ്പര്യവും തമിഴ് ദേശീയതയും സമന്വയിപ്പിച്ചുകൊണ്ടുള്ള വിജയ്യുടെ പ്രസംഗങ്ങള് സാധാരണക്കാരുടെ ഉള്ളില് സ്പര്ശിച്ചു. തമിഴ്നാടിന്റെ ഭാവി ഇനി ഈ കൈകളില് സുരക്ഷിതമാണെന്ന് വോട്ടര്മാര് വിശ്വസിച്ചതിന്റെ ഫലമാണ് ഈ വിജയം.
എഐഡിഎംകെയുടെ തകര്ച്ചയും വിജയ്യുടെ ഉദയത്തിന് ആക്കം കൂട്ടി. ജയലളിതയ്ക്ക് ശേഷം ശക്തമായൊരു നേതൃത്വത്തിന്റെ അഭാവം നേരിടുന്ന എഐഡിഎംകെ അണികള് കൂട്ടത്തോടെ വിജയ്യുടെ പാളയത്തിലേക്ക് എത്തിയതായാണ് കണക്കുകള് സൂചിപ്പിക്കുന്നത്. ഇതോടെ തമിഴ്നാട് രാഷ്ട്രീയം ഡിഎംകെ - എഐഡിഎംകെ എന്ന ദ്വിമുഖ പോരാട്ടത്തില് നിന്ന് വിജയ് എന്ന ഏകമുഖ പോരാട്ടത്തിലേക്ക് വഴിമാറിയിരിക്കുകയാണ്. ഇതിനൊപ്പം ഡിഎംകെ വോട്ടുകള് വിജയ് പിടിക്കുകയും ചെയ്തു.
രജനികാന്തിന്റെ രാഷ്ട്രീയ പിന്മാറ്റം തമിഴ് മണ്ണില് ഉണ്ടാക്കിയ വലിയൊരു ശൂന്യത നികത്താന് വിജയ്ക്ക് കഴിഞ്ഞു. സൂപ്പര് സ്റ്റാര് വരാന് മടിച്ച വഴിയിലൂടെ താന് വരുമെന്ന് പ്രഖ്യാപിച്ച വിജയ്, പറഞ്ഞത് പ്രവര്ത്തിച്ചു കാണിച്ചിരിക്കുകയാണ്. സിനിമയിലെപ്പോലെ തന്നെ രാഷ്ട്രീയത്തിലും തന്റെ എന്ട്രി മാസ്സ് ആക്കാന് അദ്ദേഹത്തിന് സാധിച്ചു. കമല്ഹാസന്റെ മക്കള് നീതി മയ്യം കാഴ്ചവച്ച പരാജയങ്ങള് വിജയ്ക്ക് വലിയൊരു പാഠമായിരുന്നു. ജനകീയ വിഷയങ്ങളില് നേരിട്ട് ഇടപെടുകയും കൃത്യമായ താഴെത്തട്ടിലുള്ള സംഘടനാ പ്രവര്ത്തനം നടത്തുകയും ചെയ്തതാണ് ടിവികെയെ വിജയത്തിലേക്ക് നയിച്ചത്. മക്കള് ഇയക്കം എന്ന സംഘടനയെ ഒരു രാഷ്ട്രീയ പാര്ട്ടിയാക്കി മാറ്റുന്നതില് അദ്ദേഹം പുലര്ത്തിയ കൃത്യത രാഷ്ട്രീയ പാഠപുസ്തകങ്ങളില് ഇടംപിടിക്കും.
തമിഴ്നാട്ടിലെ ഗ്രാമീണ മേഖലകളില് വിജയ് തരംഗം ആഞ്ഞടിച്ചു. വിലക്കയറ്റവും തൊഴിലില്ലായ്മയും മൂലം വലഞ്ഞ ജനങ്ങള് പുതിയൊരു മാറ്റത്തിനായി ആഗ്രഹിച്ചിരുന്നു. ഡിഎംകെ സര്ക്കാരിനെതിരെയുള്ള നിശബ്ദ വിപ്ലവമാണ് ഇപ്പോള് വോട്ടുകളായി മാറുന്നത്. സ്റ്റാലിന്റെ കോട്ടകളില് പോലും വിജയ് വിജയിച്ചു കയറുന്നത് രാഷ്ട്രീയ അത്ഭുതമായാണ് വിശേഷിപ്പിക്കപ്പെടുന്നത്. ജോസഫ് വിജയ് ചന്ദ്രശേഖര് എന്ന പേര് മാറ്റത്തിന്റെ പര്യായമായി തമിഴ്നാട് ഏറ്റെടുത്തുകഴിഞ്ഞു. ഒരു ക്രിസ്ത്യന് നാമം രാഷ്ട്രീയത്തില് തിരിച്ചടിയാകുമെന്ന് കരുതിയവര്ക്ക് തമിഴ് ജനതയുടെ മതനിരപേക്ഷ മനസ്സ് തിരിച്ചടിയായി. ജാതിക്കും മതത്തിനും അതീതമായി വിജയ് എന്ന വ്യക്തിയെ ജനങ്ങള് നെഞ്ചേറ്റിയത് തമിഴ് രാഷ്ട്രീയത്തിന്റെ പുതിയ മുഖമാണ് വെളിപ്പെടുത്തുന്നത്.
സിനിമയിലെ ദളപതിയില് നിന്ന് തമിഴകത്തെ വലിയ ദളപതിയിലേക്കുള്ള വിജയ്യുടെ മാറ്റം അത്ഭുതകരമാണ്. തന്റെ സിനിമകളിലൂടെ അദ്ദേഹം നല്കിയ സന്ദേശങ്ങള് വെറും സംഭാഷണങ്ങളല്ലെന്നും അവ രാഷ്ട്രീയ നിലപാടുകളാണെന്നും ഈ വിജയം തെളിയിക്കുന്നു. ഒരു നടന് എന്നതിലുപരി ഒരു നേതാവായി തമിഴ് ജനത അദ്ദേഹത്തെ അംഗീകരിച്ചു കഴിഞ്ഞു. സ്റ്റാലിന്റെ മകന് ഉദയനിധി സ്റ്റാലിനെതിരെ വിജയ് ഉയര്ത്തിയ വെല്ലുവിളികള് ഫലം കണ്ടു. വംശീയ രാഷ്ട്രീയത്തിനെതിരെയുള്ള പോരാട്ടമായും പലരും ഈ വിജയത്തെ കാണുന്നു. കുടുംബ ഭരണത്തിനെതിരെയുള്ള ജനങ്ങളുടെ രോഷം വിജയ് എന്ന ബദലിലേക്ക് കേന്ദ്രീകരിക്കപ്പെട്ടു.
ഇനി കോട്ട സെന്റ് ജോര്ജില് വിജയ് എന്ന പേര് മുഴങ്ങും. തമിഴ്നാടിന്റെ മുഖ്യമന്ത്രിയായി അദ്ദേഹം സത്യപ്രതിജ്ഞ ചെയ്യുമ്പോള് അത് തമിഴ് രാഷ്ട്രീയത്തിലെ ഒരു പുതിയ യുഗത്തിന്റെ തുടക്കമാകും. ദ്രാവിഡ രാഷ്ട്രീയത്തിന്റെ അടിസ്ഥാന ശിലകളില് തൊട്ടുകൊണ്ടുള്ള വികസന മാതൃകയായിരിക്കും വിജയ് മുന്നോട്ട് വയ്ക്കുക എന്ന് അദ്ദേഹത്തിന്റെ അനുയായികള് ഉറച്ചു വിശ്വസിക്കുന്നു. സിനിമയും രാഷ്ട്രീയവും ഒരേപോലെ കൊണ്ടുപോകുന്ന തമിഴ് സംസ്കാരത്തിന്റെ ഏറ്റവും പുതിയ കണ്ണിയാണ് വിജയ്. എംജിആറിനും ജയലളിതയ്ക്കും ശേഷം തമിഴ്നാടിനെ നയിക്കാന് ജനങ്ങള് തിരഞ്ഞെടുത്ത ഈ സിനിമാ മുഖ്യമന്ത്രി തമിഴ്നാടിന് എന്ത് മാറ്റം കൊണ്ടുവരും എന്നത് കണ്ടുതന്നെ അറിയണം.
ചെന്നൈയിലെ ടിവികെ ആസ്ഥാനത്ത് പ്രവര്ത്തകരുടെ വലിയ ആഘോഷങ്ങളാണ് നടക്കുന്നത്. തമിഴ്നാടിന്റെ എല്ലാ കോണുകളില് നിന്നും വിജയാഘോഷങ്ങളുടെ വാര്ത്തകള് പുറത്തുവരുന്നു. ഡിഎംകെയും എഐഡിഎംകെയും ഈ പരാജയം എങ്ങനെ ഉള്ക്കൊള്ളുമെന്നത് വരും ദിവസങ്ങളില് ചര്ച്ചയാകും. തമിഴക മണ്ണ് ഇനി പുതിയ ദളപതിയുടെ കീഴില് അണിനിരക്കുകയാണ്.