ചെന്നൈ: തമിഴ്നാട് രാഷ്ട്രീയത്തിന്റെ ചരിത്രതാളുകളിൽ പുതിയൊരു അധ്യായം കുറിക്കപ്പെടുന്ന കാഴ്ചയ്ക്കാണ് ഇന്ന് വോട്ടെണ്ണൽ കേന്ദ്രങ്ങൾ സാക്ഷ്യം വഹിക്കുന്നത്. ദശാബ്ദങ്ങളായി തമിഴകം ഭരിച്ചുറപ്പിച്ച ദ്രാവിഡ രാഷ്ട്രീയ ഭീമന്മാരായ ഡിഎംകെയെയും എഐഎഡിഎംകെയെയും അപ്രസക്തരാക്കിക്കൊണ്ട്, നടൻ വിജയ്യുടെ തമിഴക വെട്രി കഴകം അവിശ്വസനീയമായ കുതിപ്പാണ് നടത്തുന്നത്. ആദ്യഘട്ട സൂചനകൾ പുറത്തുവരുമ്പോൾ സംസ്ഥാനത്തെ രാഷ്ട്രീയ നിരീക്ഷകരെപ്പോലും ഞെട്ടിച്ചുകൊണ്ടാണ് വിജയ് നയിക്കുന്ന ടിവികെ മുന്നേറുന്നത്.
234 അംഗ നിയമസഭയിൽ ഭരണത്തിലേറാൻ വേണ്ട 118 സീറ്റുകൾ എന്ന മാന്ത്രിക സംഖ്യയിലേക്ക് വിജയ് എത്തിയേക്കുമെന്നാണ് നിലവിലെ ട്രെൻഡുകൾ സൂചിപ്പിക്കുന്നത്. ഡിഎംകെ, എഐഎഡിഎംകെ എന്നീ രണ്ട് ധ്രുവങ്ങളിൽ മാത്രം കറങ്ങിയിരുന്ന തമിഴ് രാഷ്ട്രീയത്തെ മൂന്നാമതൊരു ശക്തി പിടിച്ചുകുലുക്കുന്നത് ദശാബ്ദങ്ങൾക്ക് ശേഷമാണ്.
നിലവിലെ ട്രെൻഡ് തുടരുകയാണെങ്കിൽ തമിഴ്നാട് രാഷ്ട്രീയത്തിൽ ഇതൊരു വലിയ അട്ടിമറിയാകും. കേവല ഭൂരിപക്ഷത്തിന് ഏതാനും സീറ്റുകൾ മാത്രം അകലെ നിൽക്കുന്ന ടിവികെയ്ക്ക്, സ്വതന്ത്രരുടെയും മറ്റ് ചെറിയ കക്ഷികളുടെയും പിന്തുണയോടെ അധികാരം പിടിക്കാൻ കഴിഞ്ഞേക്കാം. വോട്ടെണ്ണൽ പൂർത്തിയാകാൻ മണിക്കൂറുകൾ ബാക്കി നിൽക്കെ, തമിഴകം ആര് ഭരിക്കുമെന്ന ചോദ്യത്തിന് അപ്രതീക്ഷിതമായ ഒരു ഉത്തരം വിജയ് നൽകുമോ എന്നാണ് ഇന്ത്യ ഉറ്റുനോക്കുന്നത്.
ദ്രാവിഡ രാഷ്ട്രീയത്തിന്റെ കോട്ടകളിൽ വിള്ളൽ വീഴ്ത്തിയ ഈ 'ദളപതി' പ്രഭാവം തമിഴ്നാടിന്റെ ഭാവി തന്നെ മാറ്റിമറിക്കാൻ പോന്നതാണ്. അന്തിമ ഫലം പുറത്തുവരുമ്പോൾ തമിഴ്നാട് നിയമസഭയിൽ പുതിയൊരു സൂര്യോദയമാണോ അതോ ശക്തമായ ഒരു ത്രികോണ മത്സരത്തിന്റെ തുടക്കമാണോ സംഭവിക്കുക എന്ന് വ്യക്തമാകും.
ഇതോടെ, തമിഴ്നാടിന്റെ രാഷ്ട്രീയ ചരിത്രത്തിൽ വലിയൊരു അട്ടിമറിക്കാണ് നിലവിൽ കളമൊരുങ്ങുന്നത്. ചെന്നൈ നഗരമൊഴികെ സംസ്ഥാനത്തിന്റെ എല്ലാ മേഖലകളിലും ഡിഎംകെ സഖ്യത്തെ പിന്നിലാക്കാൻ ടിവികെയ്ക്ക് സാധിച്ചു. എഐഎഡിഎംകെ ജനറൽ സെക്രട്ടറി എടപ്പാടി പളനിസ്വാമിയുടെ കോട്ടയായ പടിഞ്ഞാറൻ തമിഴ്നാട്ടിലും വടക്കൻ തമിഴ്നാട്ടിലും എഐഎഡിഎംകെ മുന്നേറ്റം നടത്തുന്നുണ്ടെങ്കിലും സംസ്ഥാനാടിസ്ഥാനത്തിൽ ടിവികെ കരുത്തുകാട്ടിയിരിക്കുകയാണ്.
ടിവികെയുടെ ഈ മുന്നേറ്റം ഡിഎംകെ, എഐഎഡിഎംകെ എന്നീ ദ്രാവിഡ പാർട്ടികളുടെ വോട്ട് ബാങ്കിൽ വലിയ വിള്ളലുണ്ടാക്കിയതായാണ് വോട്ട് വിഹിതം വ്യക്തമാക്കുന്നത്. 32 ശതമാനം വോട്ട് വിഹിതത്തോടെ ഡിഎംകെ സഖ്യത്തിനൊപ്പമാണ് നിലവിൽ വിജയ്യുടെ പാർട്ടി. എഐഎഡിഎംകെ സഖ്യത്തിന് 30 ശതമാനം വോട്ട് വിഹിതമുണ്ട്.
234 അംഗ നിയമസഭയിൽ കേവല ഭൂരിപക്ഷത്തിന് 118 സീറ്റുകളാണ് വേണ്ടത്. നിലവിലെ ട്രെൻഡുകൾ തുടരുകയാണെങ്കിൽ തമിഴ്നാട്ടിലെ ഏറ്റവും വലിയ ഒറ്റക്കക്ഷിയായി ടിവികെ മാറാനുള്ള സാധ്യതയുണ്ട്. തമിഴകം ഉറ്റുനോക്കുന്ന ഈ തെരഞ്ഞെടുപ്പ് ഫലം ദ്രാവിഡ രാഷ്ട്രീയത്തിലെ പുതിയൊരു യുഗപ്പിറവിക്കാണോ സാക്ഷ്യം വഹിക്കുന്നതെന്ന് വരും മണിക്കൂറുകളിൽ വ്യക്തമാകും.