സർ..എംജിആറിനേക്കാൾ ഡെയ്ഞ്ചറാണ് വിജയ്; അപ്പോഴും ആരും കാര്യമാക്കി എടുത്തില്ല; ഒരുമിച്ച് നിന്ന് ഒറ്റപ്പെടുത്തി കളിയാക്കി; അന്നേരം പറഞ്ഞതാണ് ഒരേയൊരു വായ്പ് കൊടുങ്കേ..; ആരെയും കഷ്ടപ്പെടുത്താനോ അപമാനിക്കാനോ വന്നതല്ല; ഭാവിയിൽ മുഖ്യമന്ത്രി ആയാൽ എന്ത് ചെയ്യും? വർഷങ്ങൾക്കിപ്പുറം വീണ്ടും കുത്തിപ്പൊക്കി ആ ചോദ്യം

ചെന്നൈ: തമിഴ്‌നാട് രാഷ്ട്രീയ ചരിത്രത്തിൽ എം.ജി.ആറിന് ശേഷം ഉണ്ടായ ഏറ്റവും വലിയ വിസ്ഫോടനമായി വിജയ്‌യുടെ 'തമിഴക വെട്രി കഴകം' മാറിക്കഴിഞ്ഞു. കേവലം സിനിമാ ഡയലോഗുകൾ കൊണ്ടും റോഡ് ഷോകൾ കൊണ്ടും വോട്ട് പിടിക്കാനാവില്ലെന്ന് പരിഹസിച്ച രാഷ്ട്രീയ ഭീമന്മാരുടെ മുഖത്തേറ്റ അടിയാണ് തിരഞ്ഞെടുപ്പിൽ നൂറിലധികം സീറ്റുകൾ നേടി വിജയ് നടത്തിയ പടയോട്ടം. 50 വർഷത്തെ രാഷ്ട്രീയ പാരമ്പര്യമുള്ള ഡി.എം.കെ, എ.ഐ.എ.ഡി.എം.കെ എന്നീ കക്ഷികളെ നിഷ്പ്രഭമാക്കിക്കൊണ്ട്, സാക്ഷാൽ എം.ജി.ആർ സൃഷ്ടിച്ച ഇലക്ഷൻ പെർസന്റേജിനെപ്പോലും വെല്ലുവിളിക്കുന്ന പ്രകടനമാണ് വെറും രണ്ട് വർഷം മാത്രം പ്രായമുള്ള ഈ പാർട്ടി കാഴ്ചവെച്ചിരിക്കുന്നത്. എതിരാളികൾ പ്രവചിച്ച പത്ത് സീറ്റ് പോലുമില്ലാത്ത തകർച്ചയല്ല, മറിച്ച് തമിഴ്നാടിന്റെ ഭരണചക്രം തിരിക്കാൻ പോന്ന ഒരു പുതിയ ശക്തിയായാണ് വിജയ് ഉയർന്നു വന്നിരിക്കുന്നത്. ഒരു സിനിമയുടെ ഓഡിയോ ലോഞ്ചിനിടെ "മുഖ്യമന്ത്രിയാകേണ്ട സാഹചര്യം വന്നാൽ എന്ത് ചെയ്യും?" എന്ന ചോദ്യത്തിന്, "മുഖ്യമന്ത്രിയായി അഭിനയിക്കില്ല, സത്യത്തിനൊപ്പം നിന്ന് പ്രവർത്തിക്കും" എന്ന് വിജയ് നൽകിയ മാസ് മറുപടി തമിഴ് മക്കൾ ഇരുകൈയും നീട്ടി സ്വീകരിച്ചിരിക്കുകയാണ്. തിരഞ്ഞെടുപ്പ് ഫലം പുറത്തുവന്നതോടെ താരം മുമ്പ് നടത്തിയ പ്രസംഗങ്ങൾ സോഷ്യൽ മീഡിയയിൽ വീണ്ടും തരംഗമായി മാറി. ആരെയും അപമാനിക്കാനോ പകരം വീട്ടാനോ ഉള്ളതല്ല തന്റെ ജീവിതമെന്നും, സാധിക്കുന്ന കാലത്തോളം നന്മ ചെയ്യുക എന്നതാണ് തന്റെ ലക്ഷ്യമെന്നും അദ്ദേഹം അന്ന് പറഞ്ഞിരുന്നു. പഴയ കാര്യങ്ങളെ ഉപേക്ഷിക്കുന്ന 'ഭോഗി' ആഘോഷം പോലെ, പതിറ്റാണ്ടുകളായി തമിഴ്‌നാട് ഭരിക്കുന്ന ചില പഴയ രാഷ്ട്രീയ ശക്തികളെ എറിഞ്ഞുകളയാനും പുതിയ ഭരണം കൊണ്ടുവരാനുമുള്ള വിജയ്‌യുടെ ആഹ്വാനം വോട്ടർമാർ നെഞ്ചേറ്റി. എല്ലാ രാഷ്ട്രീയ കക്ഷികളും ചേർന്ന് തന്നെ മാത്രം എതിർക്കുന്നത് എന്തിനാണെന്ന വിജയ്‌യുടെ ചോദ്യം തിരഞ്ഞെടുപ്പിൽ വലിയ ചർച്ചയായിരുന്നു. എല്ലാവരും ചേർന്ന് ഒരാളെ മാത്രം എതിർക്കുന്നുണ്ടെങ്കിൽ അവരെല്ലാം ഒരു പക്ഷമാണെന്നും താൻ മാത്രമാണ് മറുവശത്തെന്നുമാണ് വിജയ് ആഞ്ഞടിച്ചത്. സാധാരണക്കാർക്ക് വേണ്ടി രാഷ്ട്രീയത്തിൽ ഇറങ്ങുന്നതും, അഴിമതിയും കൈക്കൂലിയും ഇല്ലാത്ത ഭരണം സ്വപ്നം കാണുന്നതും, ലഹരിമുക്തമായ തമിഴ്‌നാടിനായി പരിശ്രമിക്കുന്നതും തെറ്റാണോ എന്ന അദ്ദേഹത്തിന്റെ ചോദ്യങ്ങൾക്ക് വോട്ടർമാർ ബാലറ്റിലൂടെ മറുപടി നൽകി. കർഷകരുടെയും മത്സ്യത്തൊഴിലാളികളുടെയും സ്ത്രീകളുടെയും സുരക്ഷ ഉറപ്പാക്കുമെന്ന വാഗ്ദാനം വിജയ്‌യുടെ വിജയത്തിൽ നിർണ്ണായകമായി. നടൻ വിക്രം ഉൾപ്പെടെയുള്ള തെന്നിന്ത്യൻ സിനിമാലോകം ഈ ചരിത്രവിജയത്തിൽ വിജയ്ക്ക് ആശംസകളുമായി എത്തിയിട്ടുണ്ട്. തമിഴ്‌നാട് രാഷ്ട്രീയത്തിലെ ഈ പുതിയ ഉദയം വരുംനാളുകളിൽ വലിയ മാറ്റങ്ങൾക്ക് വഴിതുറക്കുമെന്ന കാര്യത്തിൽ സംശയമില്ല.